ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅިގެން ދައުވާ އުފުލި މީހުންގެ ޝަރީއަތުގެ އަޑުއެހުން އަންނަ ހޮނިހިރު ދުވަހަށް ތާވަލްކޮށްފި އެވެ.
ކްރިމިނަލް ކޯޓުގައި އެ ޝަރީއަތް ތާވަލްކޮށްފައިވަނީ އެ ދުވަހުގެ ހެނދުނު 10:00 އަށެވެ.
މިދިޔަ މަހުގެ 30 ވަނަ ދުވަހަށް ވެސް ބޮމުގެ ޝަރީއަތެއް ތާވަލްކުރި ނަމަވެސް، މޫސުން ގޯސްވެ، ޖަލުގައި ތިބި ދައުވާ ލިބޭ މީހުން ކޯޓަށް ހާޒިރުކޮށް ނުދެވުމުން އެ ދުވަހުގެ އަޑުއެހުން ކެންސަލް ކުރި އެވެ.
މިދިޔަ އަހަރުގެ މެއި މަހުގެ ހަވަނަ ދުވަހު ގޮއްވާލި ބޮމާ ގުޅިގެން 10 މީހެއްގެ ޝަރީއަތް މިވަގުތު ކޯޓުގައި ކުރިއަށްދެ އެވެ. އޭގެ ތެރެއިން ސީދާ ބޮމުގެ ހަމަލާއާ ގުޅޭ ދައުވާތައް ކުރެވޭ މީހުންނާއި ޓެރަރިޒަމްގެ އެހެން ދައުވާތައް ކުރެވޭ މީހުން ހިމެނެ އެވެ.
އަޑުއެހުން ތާވަލުކޮށްފައިވަނީ ހަމަލާއާ ގުޅޭ ދައުވާތައް އުފުލި ތަހްނީމް އަހުމަދާއި މުޖާޒު އަހުމަދާއި އިސްހާގު އާއި ފަހުމީ އަލީ އާއި އަލީ ހައިޝަމް އާއި ފަހުމީ އަލީ އާއި މުހައްމަދު ނާޒިމް އަދި އިސްހާގުގެ މައްޗަށް ޝަރީއަތް ހިންގުމަށެވެ.
ނަޝީދަށް އަމާޒުކުރި ހަމަލާއާ ގުޅިގެން އަމިއްލަ އިއުތިރާފާ އެކު މިހާތަނަށް ކުށް ސާބިތުވެފައިވަނީ އަހުމަދު އަދުހަމަށް އެކަންޏެވެ. ނަޝީދުގެ ވަކީލުންގެ ފަރާތުން އެ ޝަރީއަތްތައް އޮބްޒާވްކުރުމުގެ ފުރުސަތަކަށް ކޯޓުގައި އެދިފަ އެވެ. އެހެންވެ, ކްރިމިނަލް ކޯޓުގެ އިސްގާޒީ އަހުމަދު ޝަކީލް ވަނީ ނަޝީދުގެ ވަކީލުންނަށް އެ ހުއްދަ ދެއްވާފަ އެވެ.
ނަޝީދަށް ދިން ހަމަލާގެ ޝަރީއަތް ލަސްކަމުގެ ޝަކުވާ އެމަނިކުފާނާއި އާއިލާއިން އަދި ރައްޔިތުންގެ މަޖިލީހުން ވަނީ ފާޅުކުރައްވާފަ އެވެ. ނަމަވެސް, ސަރުކާރުން ބުނެފައިވަނީ އެ ޝަރީއަތް ހިންގައި ހަމަލާގެ ފަހަތުގައި ތިބި މީހުންނަށް އަދަބު ދިނުމުގައި ސަރުކާރުގެ އަޒުމު ނުގުޑާނެ ކަމަށެވެ.
