މިއަހަރުގެ ޕީއެސްއައިޕީގެ ބަޖެޓުން، ގއ. ވިލިނގިލީގައި އެޅުމަށް ހަމަޖެހިފައިވާ 50 ހައުސިން ޔުނިޓު އަޅަން މިއަދު ހަވާލުކޮށްފި އެވެ.
ޑިޒައިން އެންޑް ބިލްޑް އުސޫލުން މި މަޝްރޫއު ހަވާލުކޮށްފައިވަނީ ދޮންބޭޒް ޕްރައިވެޓް ލިމިޓެޑާ އެވެ. ނުވަ މަސް ދުވަހުގެ ތެރޭގައި ނިންމާ ގޮތަށް ހަވާލުކުރި މި މަޝްރޫއުގެ އަގު 48 މިލިއަން ރުފިޔާއަށް އަރަ އެވެ.
މި ހައުސިން ޔުނިޓުތައް އަޅަން ހަމަޖެހިފައިވަނީ ދެ ފަންގިފިލާގެ ރޯހައުސްތަކެއްގެ ގޮތުގަ އެވެ. ތިން ކޮޓަރާއި ތިން ފާހަނާ، ސިޓިން ރޫމް، ކާގެ އާއި ބަދިގެ، ލޯންޑްރީ އަދި ގުދަނެއް ހިމެނޭހެން، ކޮންމެ ބައެއްގައި ބެލްކަނީއެއް ވެސް ހުންނާނެ ކަމަށް ޕްލޭނިން މިނިސްޓްރީން ބުނެ އެވެ.
މިނިސްޓްރީން ބުނީ 700 އަކަފޫޓުގެ ޖާގައަށް ހަދާ ޔުނިޓުތައް ހުންނަ ސަރަހައްދުގައި ޕާކަކާއި ވެހިކަލް ޕާކުކުރާނެ ސަރަހައްދެއް ވެސް ގާއިމްކުރާނެ ކަމަށެވެ.
މިއަދު ސޮއިކުރި އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ އެ މިނިސްޓްރީގެ ހައުސިން ޑިޕާޓްމެންޓްގެ ޑިރެކްޓަ ޖެެނެރަލް އަހްމަދު ވިޝާނެވެ. އަދި ދޮންބޭޒް ކުންފުނީގެ ފަރާތުން ސޮއިކުރެއްވީ އެ ކުންފުނީގެ ހެޑް އޮފް އޮޕްރޭޝަން އަލީ ހަމްދޫނެވެ.
އެއްބަސްވުމުގައި ސޮއިކުރަން ބޭއްވި ރަސްމިއްޔާތުގައި ވިލިނގިލީ ދާއިރާގެ މެންބަރު ސައުދު ހުސެއިން ވެސް ބައިވެރިވެވަޑައިގެންނެވި އެވެ.
