މާލޭގެ ގެއެއް ބަލައި ފާސްްކޮށް، 42 ކިލޯއަށްވުރެ ގިނަ މަސްތުވާތަކެތި ހޯދި މައްސަލައިގައި ފުލުހުން ހައްޔަރުކޮށްފައިވާ ދެ މީހުން ދޫކޮށްލައިފި އެވެ.
މި މައްސަލާގައި ހައްޔަރު ކޮށްފައި ވަނީ ޕީޕަލްސް ނެޝަނަލް ކޮންގްރެސް ޕާޓީގެ ކުރީގެ ކައުންސިލް މެމްބަރު އަހުމަދު ހުސެއިން (39އ.) އާއި އަބްދުﷲ ނަޝީދު (46އ.) ކިޔާ މީހެކެވެ.
މި ދެ މީހުން ވެސް ދޫކޮށްލާފައިވާކަން ފުލުހުން ވަނީ މި ނޫހަށް ކަށަވަރުކޮށްދީފަ އެވެ. އެކަމަކު އިތުރު ތަފްސީލް އަދި ނުދޭތީ ދޫކޮށްލި ސަބަބެއް ސާފެއް ނޫނެވެ.
އެ އޮޕަރޭޝަނުގައި މަސްތުވާތަކެތި ހޯދާފައި ވަނީ މިދިޔަ މާޗު މަހު 24 ވަނަ ދުވަހުގަ އެވެ. އެ ތަކެތި ހޯދާފައި ވަނީ މ. ލަވްނެސްޓްގެ ތަޅުންގަނޑުގެ އަޑީގައި ކޮނެފައި ހުރި ކުޑަ ވަޅެއްގެ ތެރޭގަ އެވެ.
އަހްމަދު ހުސައިންގެ މައްޗަށް ފުލުހުން ކުރާ މަސްތުވާތަކެތީގެ ތުހުމަތާ ގުޅިގެން ޕީއެންސީން ވަނީ އެ ޕާޓީގެ ކައުންސިލް މެމްބަރު ކަމުން އޭނާ ވަކިކޮށް ޕާޓީގެ ހަރަކާތްތަކުން ސަސްޕެންޑްކޮށްފަ އެވެ.
ދައުވާ ނުކުރަން ނިންމުން
އޭގެ ފަހުން ޕްރޮސެކިޔުޓާ ޖެނެރަލް (ޕީޖީ) އޮފީހުން ނެރުނު ބަޔާނެއްގައި ބުނީ އެ މައްސަލައިގައި ދައުވާ ނުކުރަން ނިންމާފައިވާ ކަމަށެވެ.
އެގޮތަށް ނިންމީ ޕީޖީ އޮފީހުން ބުނި ގޮތުގައި މ. ލަވްނެސްޓްގެ ބަލައި ފާސްކުރުމަށް ކޯޓު އަމުރަކަށް އެދި ހުށަހެޅުމުގެ އެކަށީގެންވާ ވަގުތާއި ފުރުސަތު ފުލުހުންނަށް ލިބިފައިވީ ނަމަވެސް، އެގެ ބަލައިފާސްކޮށްފައިވަނީ ކޯޓު އަމުރަކާ ނުލައި ކަމަށްވުމާއި، ގޭގެ ވެރިފަރާތަކީ ކާކުކަން އެނގެން އޮތްއިރު، އެގެ ބަލައިފާސްކުރުމުގެ ހުއްދަ އެހެން މީހަކު އަތުން ހޯދާފައިވާތީ، ބަލައިފާސްކުރީ ގާނޫނާ ހިލާފަށް ކަމަށް ވާތީ އެވެ.
މީގެ އިތުރުން، މި މައްސަލައިގެ ސީންގައި ކަންވީގޮތާމެދު ސުވާލު އުފެދޭ ގިނަ ކަންތައްތަކެއް ހުރިކަން ފާހަގަވެފައިވާ ކަމަށް ވެސް ޕީޖީން ބުންޏެވެ.
މިގޮތުން، މައްސަލައިގައި ތުހުމަތުކުރެވޭ މީހުންނާ ގުޅުންހުރި ތަންތަން ބަލައިފާސްކުރިއިރު އެ ތަންތަނުގައި ހުރި، ހެކީގެ ގޮތުގައި ބޭނުންކުރެވިދާނެކަމަށް ފެންނަ ބައެއް ތަކެތި ތަހުގީގަށް ނަގައި، ތަހުލީލު ކޮށްފައިވާކަން ހުށަހެޅި ލިޔުންތަކުން އެނގެން ނެތަތީއާއި، މައްސަލައިގައި ހޯދިދާނެކަމަށް ފެންނަ މުހިންމު ހެކިތަކެއް ހޯދިފައި ނުވާތީ، މި މައްސަލައިގައި ތުހުމަތުކުރެވޭ މީހުންނާ، ފެނުނު މަސްތުވާތަކެއްޗާ ގުޅުވައިދެވޭ މިންވަރަށް ހެކި ގަރީނާ ހޯދިފައި ނުވާކަމަށް ވެސް ބުނެފައިވެ އެވެ.
