މިއީ އިމާރާތްކުރުމުގެ މަޝްރޫއުތައް ބާރަށް ކުރިއަށް ގެންދަން ރަނގަޅު ވަގުތެއް ނޫން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި ޕްލޭނިން މިނިސްޓަރު މުހައްމަދު އަސްލަމާ މެމްބަރަކު ކުރެއްވި ސުވާލަކާ ގުޅުވައި ނަޝީދު ވިދާޅުވީ ސަރުކާރުގެ ވައުދުތައް ފުއްދުމުގެ ގޮތުން ހިންގާ މަޝްރޫއުތައް މިވަގުތު މަޑުޖައްސައިލަން ޖެހޭ ކަމަށެވެ. އެއީ އެމަނިކުފާނު ވިދާޅުވި ގޮތުގައި ރާއްޖޭގެ މާލީ ހާލަތާއި ދުނިޔޭގެ ކަންކަމަަށް ބަދަލުތަކާ ހެދި އެވެ.
"މިއީ އަޅުގަނޑުމެން ވިސްނުންތެރިކަމާ އެކީގައި ތިބެންވީ ވަގުތެއް. އަޅުގަނޑު ދެކޭ ގޮތުގައި ޕްރޮޖެކްޓްތައް މަޑުޖައްސައިލުމަކީ ބޭނުންތެރި ކަމެއް،" ނަޝީދު ވިދާޅުވި އެވެ.
އެމަނިކުފާނު ވިދާޅުވީ ޕްރޮޖެކްޓްތައް މަޑުޖައްސައިލާ ވާހަކަ ދައްކަން ދައްކަން މަޖިލީހުގެ މެމްބަރުންނާއި ސަރުކާރަށް ވެސް ދަތިވާނެ ކަން އެނގިވަޑައިގަންނަވާ ކަމަށެވެ. އެހެން ނަމަވެސް އެ ވާހަކަ އެމަނިކުފާނު ވިދާޅުވާން ޖެހިވަޑައިގަންނަވާ ކަމަށް ވެސް ވިދާޅުވި އެވެ.
"މީކީއެއް ބާރަށް، ކޮންކްރީޓްގެ ޕްރޮޖެކްޓްތައް ހިންގާވީ ވަގުތު ކަމަކަށެއް އަޅުގަނޑަކަށް ނުފެނޭ،" ނަޝީދު ވިދާޅުވި އެވެ.
ދުނިޔޭގެ އިގުތިސާދަށް ބޮޑެތި މައްސަލަތައް ކުރިމަތިވެފައިވާ ކަމަށް ވިދާޅުވެ، އޭގެ މިސާލެއްގެ ގޮތުގައި އެމަނިކުފާނު ދެއްކެވީ ތެލުގެ އަގު އުފުލެމުން ދިއުމެވެ. އިގުތިސޯދީ މައްސަލަތަކުގެ މިސާލެއްގެ ގޮތުގައި އެމަނިކުފާނު ދެއްކެވީ އަވަށްޓެރި ސްރީލަންކާއަށް މެދުވެރިވެފައިވާ މައްސަލަތަކެވެ.
ނަޝީދު މިމޭރުމުން ވާހަކަ ދެއްކެވީ ރައީސް އިބްރާހީމް މުހައްމަދު ސޯލިހުގެ ރިޔާސީ ވައުދުތަކުގެ ތެރެއިން ޕްލޭނިން މިނިސްޓްރީއާ ގުޅޭ ވައުދުތައް ފުއްދަވައިދެއްވާނެ ކަމުގެ ޔަގީންކަން ދެއްވިދާނެތޯ، ހޯރަފުށި ދާއިރާގެ މެމްބަރު އަހުމަދު ސަަލީމް މިނިސްޓަރު އަސްލަމާ ސުވާލުކުރެއްވުމުންނެވެ.
ސަލީމްގެ ސުވާލަށް ޖަވާބުދެއްވަމުން އަސްލަމް ވިދާޅުވީ ރައީސް ވިޔަސް، އަދި މިނިސްޓްރީތަކުން ވެސް ވައުދު ވަނީ ފުއްދަން ކަމަށާއި އެހެން ނަމަވެސް ނުކުރެވޭ ކަންތައްތައް ހުންނަ ކަަމަށެވެ. އެހެން ނަމަވެސް މިނިސްޓްރީތަކުން މަސައްކަތް ކުރަނީ ވައުދުތައް ފުއްދަން ކަމަށް ވެސް އަސްލަމް ވިދާޅުވި އެވެ.
