ރާއްޖެ އިން މި އަހަރު ހައްޖަށް ދާ ދިވެހިންގެ ކަންކަން ބަލަހައްޓަން "އަމީރުލް ހައްޖު"ގެ ގޮތުގައި އިސްލާމިކް މިނިސްޓަރު ޑރ. އަހްމަދު ޒާހިރު ހަމަޖައްސަވައިފި އެވެ.
އިސްލާމިކް މިނިސްޓަރު ޑރ. ޒާހިރު އެ މަގާމަށް ހަމަޖެއްސެވި ކަން އެ މިނިސްޓްރީން ކުރި ޓްވީޓަކުން ވަނީ ހާމަކޮށްފަ އެވެ.
އަމީރުލް ހައްޖުގެ ގޮތުގައި ވަޑައިގަންނަވާނެ ބޭފުޅުން ރާއްޖޭގައި ކަނޑައަޅަނީ އަބަދުވެސް ރައީސެވެ. އެ މީހަކީ އެ އަހަރު ރާއްޖޭން ހައްޖަށް ދާ އެންމެންގެ ކަންކަން ކައިރިން ބަލަހައްޓަން ރައީސް ކަނޑައަޅުއްވާ ބޭފުޅެކެވެ.
ރައީސް އިބްރާހީމް މުހައްމަދު ސޯލިހް ވެރިކަމާ ހަވާލުވެވަޑައިގެންނެވި ފަހުން މިއީ ހައްޖަށް ދިވެހިންނަށް ދެވޭ ދެވަނަ ފަހަރެވެ.
ދެހާސްނަވާރަވަަނަ އަހަރު ހައްޖުގެ އަޅުކަމަށް ދިޔަ ދިވެހިންގެ ކަންކަން ބަލަހައްޓަން އަމީރުލް ހައްޖަކަށް ކަނޑައެޅުއްވި ބޭފުޅަކީ ޕްލޭނިން މިނިސްޓަރު މުހައްމަދު އަސްލަމެވެ.
ދެހާސްވިހިވަނަ އަހަރާއި މިދިޔަ އަހަރު ހައްޖުގެ އަޅުކަމަށް ދުނިޔޭގެ ގައުމުތަކުން ސައުދީގެ މައްކާއަށް ގޮސްފައެއް ނުވެ އެވެ. އެއީ ކޮވިޑް-19 ގެ ބަލިމަޑުކަން ކުރިމަތިވުމުން ރައްކާތެރި ކަމަށް ސައުދީ ސަރުކާރުން އެޅި ފިޔަވަޅެކެވެ.
އާންމު ގޮތެއްގައި ރާއްޖެއަށް 2،000 މީހުންގެ ހައްޖު ކޯޓާ ސައުދީން ދިން ނަމަވެސް މި ފަހަރު ދޫކުރީ 453 ހައްޖު ކޯޓާ އެވެ. އެއީ އަދިވެސް ކޮވިޑް ކޮންމެވެސް ވަރަކަށް ދުނިޔޭގެ ކަންކޮޅުތަކުގައި ފެތުރޭތީ އެޅި ފިޔަވަޅެއްގެ ގޮތުގައި ބެލެވެ އެވެ.
މިފަހަރު ހައްޖަށް އެއް މިލިއަން މީހުންނަށް ސައުދީ އަރަބިއްޔާއިން ވަނީ ހުއްދަ ދީފަ އެވެ. އެކަމަކު މި ފަހަރު ވެސް ހައްޖަށް ދެވޭނީ ކޮވިޑް ވެކްސިންގެ ޑޯޒުތައް ފުރިހަމަކޮށް، ސައުދީއަށް ފުރުމުގެ 72 ގަޑިއިރުގެ ތެރޭގައި ޕީސީއާރް ޓެސްޓެއް ވެސް ހަދައިގެންނެވެ.
