ކުޅިވަރު އެޕެރަލް އާއި ބޫޓާއި އެކްސެސަރީޒް ތައްޔާރުކުރާ ދުނިޔޭގެ އެންމެ ބޮޑު އެއް ބްރޭންޑް ޕޫމާ އިން އެ ބްރޭންޑަށް ހާއްސަ ފިހާރައެއް އިއްޔެ ހުޅުވައިފި އެވެ.
ޕޫމާ ބްރޭންޑުގެ ގިނަ އުފެއްދުންތަކަށް މި ފިހާރައަކީ ޕޫމާ އިންޑިއާ އާއި ސޮނީ ސްޕޯޓްސް ގުޅިގެން ހުޅުވި މި ފިހާރައިގައި ކުޅިވަރަށް ލޯބިކުރާ މީހުންނަށާއި ފަތުރުވެރިންނަށް ވެސް ޕޫމާގެ ފަހުގެ އުފެއްދުންތައް ލިބެން ހުންނާނެ އެވެ.
ޕޫމާގެ ނޫސް ބަޔާނެއްގައި ބުނި ގޮތުގައި ރާއްޖޭގެ މާކެޓަށް ވަނުމުގެ މައިގަނޑު މަގުސަދަކީ ކުރިއަރަމުން އަންނަ ފުޓުބޯޅަ އަދި ފުޓްސަލް ކުޅުންތެރިންގެ މުޖުތަމައަށް ހިދުމަތް ކޮށްދިނުމާއި، ފަތުރުވެރިން އަދަދު އިތުރުކުރުމެވެ.
މާލޭގައި އެންމެ ވިޔަފާރިތައް ގިނަ މަޖީދީ މަގުގައި ހުންނަ ޕޫމާގެ ފިހާރަ ފަރުމާކޮށްފައި ވަނީ ކުޅިވަރާއި ސްޓައިލްއަށް ލޯބިކުރާ ފަރާތްތަކަށް ހުރިހާ އެއްޗެއް އެއް ތަނަކުން ހޯދުމުގެ ފުރުސަތު ލިބޭ ގޮތަށެވެ. މި ފިހާރައިން ފިރިހެނުންނާއި އަންހެނުންނާއި ކުޑަކުދިންނަށް ކުޅިވަރާއި ދިރިއުޅުމުގެ ވައްޓަފާޅިއަށް ބޭނުންވާ ބޫޓާއި ހެދުމާ އަދި އެކްސެސަރީޒްގެ ބޮޑު ކަލެކްޝަނެއް ލިބޭނެ އެވެ.
ޕޫމާ އާއި ސޮނީ ސްޕޯޓްސްއާ ގުޅިގެން އުފައްދާފައިވާ މި ޕާޓްނަޝިޕްގެ ދަށުން ރާއްޖޭގައި ޕޫމާގެ އުފެއްދުންތަކަށް އޮތް މާކެޓް ފުޅާކޮށް، އޮންލައިން އަދި ޑިޖިޓަލް ވަސީލަތްތަކާއި ކުޅިވަރު ކްލަބުތަކާ އަދި އެހެނިހެން ޑިސްޓްރިބިއުޝަން ޗެނަލްތައް ތަޖުރިބާކުރެވޭނެ ކަމަށް ވެސް ޕޫމާ ކުންފުނިން ބުންޏެވެ.
މި ޕާޓްނާޝިޕާ ގުޅިގެން ޕޫމާ އިންޑިއާގެ އެގްޒެކެޓިވް ޑިރެކްޓަރު ސޭލްސް އެންޑް އޮޕަރޭޝަންސް، އަތުލް ބަޖާޖް ވިދާޅުވީ، "ސޮނީ ސްޕޯޓްސްއާ އެކު، އަޅުގަނޑުމެންނަށް މިވަނީ، މާލޭގައި ކުޅިވަރާއި ލައިފްސްޓައިލް ވިޔަފާރި ކުރުމުގެ އެންމެ ތަޖުރިބާކާރު ބައިވެރިޔާ ލިބިފައި. ދިވެހި ކުޅުންތެރިންނަށް އެންމެ އެކަށީގެންވާ އާލާތްތަކާއި ވަސީލަތްތައް ފޯރުކޮށްދިނުމަށް ކުޅިވަރު ޖަމިއްޔާތަކާއި ކްލަބްތަކާ ގުޅިގެން މަސައްކަތްކުރެވޭނެ ކަމަށް އަޅުގަނޑުމެން އުއްމީދުކުރަން."
"ދުނިޔޭގެ އެންމެ ކުރިއަރާފައިވާ އަދި އެންމެ ބާރަށް ކުރިއަރަމުން އަންނަ ކުޅިވަރު ބްރޭންޑްތަކުގެ ތެރޭގައި ހިމެނޭ ޕޫމާ ރާއްޖެއަށް ތައާރަފްކުރުމަކީ އަޅުގަނޑުމެންނަށް ލިބޭ ވަރަށް ބޮޑު އުފަލެއް. އަޅުގަނޑުމެންގެ އަމާޒު އަދިވެސް ހުރީ ކުޅިވަރު ކުޅޭ މީހުންނާއި ފިޓްނަސް އަށް ލޯބިކުރާ މީހުންގެ ދިރިއުޅުން ދަނޑުމަތީގަ އާއި ދަނޑުން ބޭރުގައި ރަނގަޅު ކުރުމަށް ކަމަށްވާތީ، ޕޫމާ އަކީ މި އަމާޒަށް ވާސިލްވުމުގައި އެންމެ އެކަށޭނަ އެއް ބައިވެރިޔާކަން ޔަގީން." ސޮނީ ސްޕޯޓްސްގެ މެނޭޖިން ޑިރެކްޓަރު އަހްމަދު ކަލީމް ވިދާޅުވި އެވެ.
ޕޫމާއަކީ ދުނިޔޭގެ އެންމެ މަޝްހޫރު ކުޅިވަރު ބްރޭންޑްތަކުގެ ތެރޭގައި ހިމެނޭ، ފުޓްވެއާ އާއި އެޕެރަލް އަދި އެކްސެސަރީޒް ފަރުމާކުރުމާއި ވިއްކުމާއި މާކެޓްކުރުމުގެ 70 އަހަރަށް ވުރެ ގިނަ ތަޖުރިބާ ލިބިފައިވާ ކުންފުންޏެކެވެ. އެގޮތުން ފުޓްބޯޅަ، ދުވުމާއި ކަސްރަތު، ބާސްކެޓްބޯޅަ، ގޮލްފް، އަދި މޮޓޮސްޕޯޓްސް ފަދަ ކުޅިވަރުތަކަށް ހާއްސަ ޕާފޯމަންސް އަދި ސްޕޯޓް އިންސްޕަޔާޑް ލައިފްސްޓައިލް އުފެއްދުންތައް ފޯރުކޮށްދެ އެވެ.
ޖަރުމަނުގައި މަރުކަޒުވެފައިވާ ޕޫމާ ގްރޫޕަކީ ޕޫމާ، ކޯބްރާ ގޮލްފް އަދި ސްޓީޗްޑް ބްރޭންޑްތަކުގެ މައި ކުންފުންޏެވެ. ޕޫމާ އިން 120 އަށް ވުރެ ގިނަ ގައުމުގައި އެ ކުންފުނީގެ އުފެއްދުންތައް ވިއްކަ އެވެ. ޕޫމާ އިންޑިއާއަކީ މި ގްރޫޕުގެ ދަށުން ދެކުނު އޭޝިއާ އާއި ދެކުނު އިރުމަތީ އޭޝިއާގައި ވިޔަފާރިކުރާ ކުންފުންޏެވެ.
