ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ހަމަލާއާ ގުޅޭ ޝަރީއަތްތައް އޮބްޒާވްކުރުމުގެ ފުރުސަތު އެމަނިކުފާނުގެ ވަކީލުންނަށް ދޭން ކްރިމިނަލް ކޯޓުން ނިންމައިފި އެވެ.
ނަޝީދުގެ ގާނޫނީ ވަކީލު އަދި އެމަނިކުފާނު ކޮއްކޮ ނާޒިމް ސައްތާރު މި ނޫހަށް މައުލޫމާތު ދެއްވި ގޮތުގައި މާދަމާއިން ފެށިގެން މައްސަލައިގެ ކޮންމެ އަޑުއެހުމަކަށް ވަކީލުން ވަންނަން ހުއްދަ ދީފައިވާ ކަމަށެވެ.
ކްރިމިނަލް ކޯޓުގައި މިހާރު ހިނގަމުންދާ ގަޒިއްޔާތަކުގެ ތެރެއިން ދެ ގަޒިއްޔާއެއްގެ އަޑުއެހުން މާދަމާ ހެނދުނު 9:00 އަށް ވަނީ ތާވަލުކޮށްފައި އެވެ.
މިދިޔަ އަހަރުގެ މެއި މަހުގެ ހަވަނަ ދުވަހު ގޮއްވާލި ބޮމާ ގުޅިގެން 10 މީހެއްގެ ޝަރީއަތް މިވަގުތު ކޯޓުގައި ކުރިއަށްދެ އެވެ. އޭގެ ތެރެއިން ސީދާ ބޮމުގެ ހަމަލާއާ ގުޅޭ ދައުވާތައް ކުރެވޭ މީހުންނާއި ޓެރަރިޒަމްގެ އެހެން ދައުވާތައް ކުރެވޭ މީހުން ހިމެނެ އެވެ.
ނަޝީދަށް އަމާޒުކުރި ހަމަލާއާ ގުޅިގެން އަމިއްލަ އިއުތިރާފާ އެކު މިހާތަނަށް ކުށް ސާބިތުވެފައިވަނީ އަހުމަދު އަދުހަމަށް އެކަންޏެވެ. އަދުހަމަކީ ނަޝީދު އަވަހާރަކޮށްލަން މަޖީދީ މަގު މެދަށް ގޮއްވާލި ބޮން ކޮންޓްރޯލް ކުރާ ރިމޯޓް ހިފައިގެން އަތަމާ ޕްލޭސްގައި ހުރި މީހާ އެވެ.
އަދުހަމާއެކު ދެން ހަމަލާއާ ގުޅޭ ދައުވާތައް އުފުލީ ތަހްނީމް އަހުމަދާއި މުޖާޒު އަހުމަދާއި އިސްހާގު އާއި ފަހުމީ އަލީ އަދި އަލީ ހައިޝަމްގެ މައްޗަށެވެ.
ހަމަލާއަށްފަހު ހައްޔަރުކޮށް ޓެރަރިޒަމްގެ އެހެން ދައުވާތައް އުފުލާފައިވަނީ މުހައްމަދު ތަސްލީމާއި އަބްދުالله އަލީ މަނިކު އާއި މުހައްމަދު ނާޒިމާއި ހަސަން ޔާސީން އަދި މުހައްމަދު ޒޫމަލް ޒަރީރުގެ މައްޗަށެވެ.
