މިއަދު ހެނދުނު ޖަމާލުއްދީން ސްކޫލުގެ ކިޔެވުން ފެށި ވަގުތު އެ ސްކޫލަށް ވަދެ މާރާމާރީ ހިންގަން އުޅުނު މީހަކު ހައްޔަރުކޮށްފި އެވެ.
ފުލުހުން ބުނީ މި މައްސަލަ ފުލުހުންނަށް ރިޕޯޓުކުރީ މިއަދު ހެނދުނު 08:49 ހާއިރު ކަމަށެވެ.
"މައްސަލައާ ގުޅިގެން 37 އަހަރުގެ ދިވެހި ފިރިހެނަކު ވަނީ ހައްޔަރުކޮށްފައި،" މީޑިއާތަކަށް ފޮނުވި މެސެޖެއްގައި ފުލުހުން ބުނެފައިވެ އެވެ.
އަދި، އެ މީހާ ހައްޔަރުކޮށް ކޯޓަށް ހާޒިރުކުރުމުން، އޭނާ 15 ދުވަހަށް ބަންދުކުރަން ކްރިމިނަލް ކޯޓުން އަމުރު ދީފައިވާ ކަމަށް ވެސް ބުންޏެވެ.
ޖަމާލުއްދީން ސްކޫލަށް ވަދެ މާރާމާރީ ހިންގަން އުޅުނު މީހާ އެ ސްކޫލަށް ވަނީ ތޫނު އެއްޗެއް ހިފައިގެން ކަމަށް ސޯޝަލް މީޑިއާގައި ބައެއް ފަރާތްތަކުން ބުންޏެވެ.
އެކަމަކު އެ މީހަކު ހައްޔަރު ކުރުން ފިޔަވައި އިތުރު ތަފްސީލެއް އެ މައްސަލައާ ގުޅިގެން ފުލުހުން ހާމަކޮށްފައެއް ނުވެ އެވެ.
މި މައްސަލައިގައި މިހާތަނަށް ޖަމާލުއްދީން ސްކޫލާއި އެޑިއުކޭޝަން މިނިސްޓްރީން އެއްވެސް އެއްޗެއް ހާމަކޮށްފައެއް ނުވެ އެވެ.
