ހައްޖުގެ އަޅުކަން ކުރުމަށް މައްކާއަށް ދާން ހައްޖު ކޯޕަރޭޝަނަށް ފައިސާ ދެއްކި މީހުންގެ ކިއޫ ލިސްޓުގައި 3،500 އަށް ވުރެ ގިނަ މީހުން އެބަ ތިބި ކަމަށާއި ކިއޫ ތަރުތީބުން މި އަހަރު ފުރުސަތު ދެވޭނީ 353 މީހުނަށް ކަމަށް ހައްޖު ކޯޕަރޭޝަނުން މިއަދު ބުނެފި އެވެ.
މިއަހަރު ހައްޖަށް މީހުން ގެންދިއުމުގެ ފުރުސަތު ދޭން ނިންމާފައި ވަނީ ދައުލަތުގެ ކުންފުނި މޯލްޑިވްސް ހައްޖު ކޯޕަރޭޝަން ލިމިޓެޑަށް އެކަންޏެވެ. އަމިއްލަ ކުންފުނިތަކަށް މި ފަހަރު ފުރުސަތެއް ނެތެވެ.
ހައްޖު ކޯޕަރޭޝަންގެ މެނޭޖިން ޑިރެކްޓަރު އިސްމާއީލް ހަމީދު "އަދަދު"އަށް ވިދާޅުވީ ކޯޕަރޭޝަންގެ ކިއޫ ތަރުތީބުން ފުރަތަމަ ހިމެނޭ 353 މީހުނަށް މި ފަހަރު ހައްޖަށް ދެވޭނެ ކަމަށެވެ. އެކަމަކު ކިއޫގައި އަދިވެސް 3،500 އެއްހާ މީހުން ތިބި ކަން އޭނާ ފާހަގަ ކުރެއްވި އެވެ.
"ކިއޫގައި ތިބޭނީ ކޯޕަރޭޝަނުން ހައްޖަށް ގެންގޮސްދޭ އަގުގެ 75 އިންސައްތަ ފައިސާ ދައްކާފައި ތިބި މީހުން، ކޯޕަރޭޝަންގެ ހައްޖު އުސޫލުގައި އޮންނަ ގޮތަށް އެ މިންވަރަށް ފައިސާ ދެއްކުމާއެކު ކިއޫގައި އެ މީހަކު ހިމެނިގެންދާނެ،" އޭނާ ވިދާޅުވި އެވެ.
ހައްޖު ކޯޕަރޭޝަންގެ ކިއޫ ލިސްޓުގައި ގިނަ އަދަދެއްގެ ބަޔަކު ތިބިއިރު އޭގެ ތެރޭގައި މީގެ ކުރިން 2020 ވަނަ އަހަރު ހައްޖަށް ދިއުމަށް ފައިސާ ދައްކައި ދަތުރު ކެންސަލް ވުމުން ނުދެވުނު ގިނަ އަދަދެއްގެ ފަރާތްތައް ވެސް ހިމެނެ އެވެ. އެ އަހަރު ކެންސަލްވީ ކޮވިޑް-19 ގެ ސަބަބުން ސައުދީ ވެސް ލޮކްޑައުން ކުރުމުންނެވެ.
ހައްޖު ކޯޕަރޭޝަނުން ހައްޖަށް ގެންގޮސްދެނީ 69،000ރ. އަށެވެ. އޭގެ ތެރެއިން 75 އިންސައްތައަށްވާ 52،500 ރ. ދެއްކުމުން ކިއޫގައި ޖައްސައިދެ އެވެ. އަދިވެސް ކިއޫގައި ޖެހެން ފުރުސަތު އޮތީ ހުޅުވާލައިފަ އެވެ.
އިތުރު 100 ކޯޓާ ރާއްޖެއަށް ލިބުނުއިރު އެ ކޯޓާ އާންމުކޮށް ހުޅުވާލަން އިސްލާމިކް މިނިސްޓްރީން ވަނީ ނިންމައިފަ އެވެ. އެ މަސައްކަތް ވެސް ހަވާލު ކުރީ ހައްޖު ކޯޕަރޭޝަނަށެވެ. އިސްމާއީލް ހަމީދު ވިދާޅުވީ އެ ކަމަށް ބޭނުންވާ އުސޫލު ތައްޔާރު ކުރުމުގެ މަސައްކަތް ދަނީ ކުރަމުން ކަމަށެވެ.
"އަޅުގަނޑުމެން އެ އުސޫލު ތައްޔާރު ކުރުމަށް ޓަކައި މިނިސްޓްރީއާއެކު މިހާރު މި ދަނީ މަޝްވަރާ ކުރަމުން، އުސޫލު ކަނޑައަޅާ ނިމުމުން އުސޫލު އަޅުގަނޑުމެން ހާމަ ކުރާނެ،" އިސްމާއީލް ހަމީދު ވިދާޅުވި އެވެ.
