ގއ. ވިލިނގިލިއްޔަށް ދިޔަ ލޯންޗެއް އެ ރަށު ފަޅަށް ވަންނަން އުޅުމުގެ ތެރޭގައި ހިނގި އެކްސިޑެންޓެއްގައި ދެ މީހަކު މަރުވެ ތިން މީހަކަށް ބޮޑެތި އަނިޔާތަކެއް ލިބުނީ އިއްޔެ އެވެ.

ފުލުހުން އިއްޔެ އެ ހާދިސާ އާ ގުޅިގެން ބުނީ ލޯންޗު ފަޅަށް ވަންނަން އުޅުމުގެ ތެރޭގައި، ނެރުގައި ލޯންޗު ޖެހި ހިނގި އެކްސިޑެންޓެއްގައި ދެ މީހަކު ކަނޑަށް ވެއްޓި ގެއްލުނު ކަމުގެ ރިޕޯޓު ލިބުނު ކަމަށާއި އަދި ގެއްލުނު ދެ މީހުން ފެނިފައިވާ ކަމަށާއި ހޮސްޕިޓަލަށް ގެންދިޔައިރު ވެސް ދެ މީހުން މަރުވެފައިވާ ކަމަށެވެ.

މި ހާދިސާގައި ނިޔާވެފައިވަނީ ގއ. ވިލިނގިލީ، ދޫރެސް މިސްބާހު މުހްސިން އާއި ނ. ލަންދޫ އުރަހާ، މުހައްމަދު ޝާފިއު އެވެ.

އެކްސިޑެންޓް ހިނގި ވަގުތު ލޯންޗުގައި ދަތުރު ކުރަމުން ދިޔައީ ޖުމްލަ ފަސް މީހުންނެވެ. ލޯންޗުގައި ދެން ތިބި ތިން މީހުންނަށް އެ ރަށު ހޮސްޕިޓަލުގައި ފަރުވާ ދިނުމަށް ފަހު މާލެ ގެނައުމުގެ މަސައްކަތް ރޭ ވަނީ ފަށައިފަ އެވެ.

ވިލިނގިލީ ހޮސްޕިޓަލުން ރޭ ބުނި ގޮތުގައި އަނިޔާވި ތިން މީހުންގެ ތެރެއިން އެކަކު އޮތީ ވެންޓިލޭޓަރުގަ އެވެ. އަނެއް ދެ މީހުންނަށް ވެސް ހާލަތު ވެސް ގޯސް ކަމާއި ތިން މީހުން ވެސް މޭލެއަށް ފޮނުވުމުގެ މަސައްކަތް ކުރަމުން އަންނަ ކަމަށް އެ ހޮސްޕިޓަލްގެ އޮފިޝަލަކު ވިދާޅުވި އެވެ.

"ތިން މީހުންގެ ހާލު ވެސް ވަރަށް ސީރިއަސް، އެކަކަށް ފަރުވާ ދެމުން އަންނަނީ ވެންޓިލޭޓަރުގައި،" އެ ރަށު ހޮސްޕިޓަލު މެނޭޖަރު އަހުމަދު ޝަރީފް މި ނޫހަށް އިއްޔެ ވިދާޅުވި އެވެ.

އަހުމަދު ޝަރީފް ވިދާޅުވީ ފަރުވާ ދެމުން އަންނަ މީހުންގެ ބޮލަށް ވަރަށް ބޮޑަށް އަނިޔާވެފައިވާ ކަމަށެވެ.

މިކަމާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން ވަނީ ބުނެފަ އެވެ.

ބައެއް މުހިންމު ހަބަރުތައް

• ލާމަރުކަޒީ ގާނޫނަށް ގެނައި ބޮޑެތި އިސްލާހުތަކުގެ ދަށުން ކައުންސިލުތަކަށް ލިބިދޭ މާލީ ބާރުވެރިކަމާ ގުޅިފައިވާ ލޭންޑް ޔޫސް ޕްލޭންތައް ނުހެދި ދިގުލައިގެން ގޮސްފައިވާއިރު، އެ ޕްލޭންތައް ހަދަން އިންޑިއާގެ މާލީ އަދި ފަންނީ އެހީތެރިކަމަށް ލޯކަލް ގަވަމަންޓް އޮތޯރިޓީ (އެލްޖީއޭ) އިން އެދުނުކަން ރިޕޯޓުކުރީ އިއްޔެ އެވެ.

• ގދ. ހޯނޑެއްދޫގައި ހޮރައިޒަން ފިޝަރީޒް އިން ތަރައްގީކުރަމުން އަންނަ ކޯލްޑް ސްޓޯރޭޖުގެ ހިދުމަތް މިއަދާ ހަމައަށް ވެސް ފެށިފައިނުވާތީ، އެ ކަމުގެ ކަންބޮޑުވުން ފާޅުކޮށް އެ ރަށުގެ ރައްޔިތުން ޕެޓިޝަނެއްގައި ސޮއިކުރަން ފެށީ އިއްޔެ އެވެ.

• އިދިކޮޅު ޕީޕީއެމުން ކުރިއަށްގެންދާ "އިންޑިއާ އައުޓް" ކެމްޕެއިނު ހަރަކާތުގައި އިސްކޮށް އުޅުއްވާ ކަމަށް ތުހުމަތުކޮށް، ރައްޔިތުންގެ މަޖިލީހުގެ ހޯރަފުށި ދާއިރާގެ ކުރީގެ މެންބަރު އަދި ޕީޕީއެމްގެ ހަރަކާތު ކޮމިޓީގެ ޗެއާ މުހައްމަދު އިސްމާއީލް އަނެއްކާ ވެސް ހައްޔަރުކުރިކަން ރިޕޯޓުކުރީ އިއްޔެ އެވެ.

ދުވަހުގެ ކޯޓޭޝަން

މާލެ ސިޓީގައި މަދިރި އާލާވާ ތަންތަން ނައްތާލުމަށް "މަދިރި ހޯހޯ" ނަމުގައި ކެމްޕޭނެއް ފެށުމަށް ބޭއްވި އިވެންޓުގައި މޭޔަރު ޑރ. މުހައްމަދު މުއިއްޒު ވިދާޅުވީ:

އަޅުގަނޑުމެން އިސްކަންދޭންވީ ފަރުދީ ޒިންމާއެއްވެސް އޮތްކަން ގަބޫލު ކޮށްގެން، ކޮންމެ ދުވަހަކުވެސް އަޅުގަނޑުމެން އަތްފޯރާފަށުގައި ހުރި ތަންތަން އަމިއްލަ ޒިންމާއެއް ކަމުގައި ދެކިގެން ރައްކާތެރި ކަމާއި ސާފުތާހިރު ކަމުގައި ދެމެހެއްޓުމަށް،

ދުވަހުގެ ފޮޓޯ

ގއ. ވިލިނގިލީގައި ގާއިމުކޮށްފައިވާ ބާސްކެޓު ކޯޓު. ފީބާ އޭޝިއަން ޗެމްޕިއަންޝިޕްގެ ސާބާ ކޮލިފައިންގައި ވާދަކުރާ 18 އަހަރުން ދަށުގެ ގައުމީ ބާސްކެޓު ޓީމުން ތަމްރީނު ކޭމްޕް ފުރިހަމަކުރީ އެ ރަށުގައި. ފީބާ އާއި އެމްބީއޭ އިން ކުރިއަށްގެންދާ "ބޯލް އިން ސްކޫލް ޕްރޮގްރާމް" މިއަހަރު ފެށި އެންމެ ފުރަތަމަ ރަށަކީ ވެސް ގއ. ވިލިނގިލި --- ފޮޓޯ: އެމްބީއޭ

ދިރާސާތަކުން ކިޔާލުމަށް

"މޯލްޑިވްސް އެޑިއުކޭޝަން ރެސްޕޮންސް ޕްލޭން ފޯ ކޮވިޑް-19"

މިއީ ކޮވިޑް-19 ރާއްޖެއިން ފެނުމާއި ގުޅިގެން ހުއްޓުމެއް ނެތި ތައުލީމީ ދާއިރާގެ ހިދުމަތްތައް ރައްޔިތުންނަށް ފޯރުކޮށްދިނުމުގެ ގޮތުން އެޑިއުކޭޝަން މިނިސްޓްރީ އާއި ޔުނިސެފް އަދި ގްލޯބަލް ޕާޓްނާޝިޕް ފޯ އެޑިއުކޭޝަން ގުޅިގެން އެކުލަވާލާފައިވާ ޕްލޭނެކެވެ.