އިގުތިސާދީ ގޮތުން ފުން ވަޅުގަނޑަކަށް ވެއްޓިފައިވާ ސްރީ ލަންކާގެ ހާލަތާއި ގުޅޭގޮތުން އެ ގައުމުގެ ކުރީގެ ރައީސް މައިތުރިޕާލާ ސިރިސޭނާ އާ ބައްދަލުކުރައްވައި ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޝްވަރާކުރައްވައިފި އެވެ.
ލަންކާއަށް ބޭރުގެ އެހީ ހޯދުމުގެ މަސައްކަތްތައް ކޯޑިނޭޓް ކުރައްވަން ރައީސް ނަޝީދު އާއި އެގައުމުގެ މިހާރުގެ ބޮޑުވަޒީރު ރަނިލް ވިކްރަމްސިން ވަނީ ހަވާލުކުރައްވާފަ އެވެ. އެ މަސަކަތް ކޮށްދެއްވަން ހުށަހެޅުއްވީ ރައީސް ނަޝީދު ކަމަށް ލަންކާގެ މީޑިއާތަކުން ބުނެ އެވެ. އެ މަސައްކަތް ކުރެއްވުމަށް ނަޝީދު މިވަގުތު ހުންނެވީ ލަންކާގަ އެވެ.
"ލަންކާގެ ރައްޔިތުން ތަހައްމަލު ކުރަމުންދާ ދަތި ހާލާއި ގުޅޭގޮތުން މަޝްވަރާ ކުރިން،" ނަޝީދު މިރޭ ކުރެއްވި ޓްވީޓެއްގައި ވިދާޅުވި އެވެ.
ލަންކާގެ ހުރިހާ ސިޔާސީ ޕާޓީއަކުން ވެސް އެއް މިސްރާބަކަށް މަސައްކަތް ކުރަން ޖެހުމުގެ މުހިންމު ކަމާއި ގުޅޭގޮތުން ވާހަކަ ދެއްކެވި ކަމަށް ނަޝީދުގެ ޓްވީޓުގައި ވިދާޅުވެފައިވެ އެވެ.
އަލަށް އެކުލަވާލާފައިވާ ލަންކާގެ ސަރުކާރަށް ސިރިސޭނާގެ ޕާޓީން ތާއީދުކުރެ އެވެ.
އަވަށްޓެރި ސްރީ ލަންކާއަކީ ނަޝީދުގެ ސިޔާސީ މަސައްކަތްތަކުގައި ވަރަށް ކުރިއްސުރެ ބޮޑެތި އެހީތައް ވަމުން އަންނަ ގައުމެކެވެ. ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގައި އެމްޑީޕީ ފުރަތަމަ އުފެއްދީ ވެސް ލަންކާގަ އެވެ.
ލަންކާ އަށް ބޭރުގެ އެހީ ހޯދުމުގެ މަސައްކަތް ރަނިލް، ނަޝީދާ ހަވާލުކުރެއްވުމުން ސޯޝަލް މީޑިއާގައި ލަންކާގެ ބައެއް މީހުން ތައުރީފު ކުރި އިރު އަނެއް ބައިމީހުން ދަނީ އެކަމަށް ފާޑުކިޔަމުންނެވެ. ލަންކާގައި އެވަރުގެ ބޭފުޅަކު ނެތީތޯ ބައެއް މީހުން ސުވާލު އުފެއްދި އެވެ.
