"އިންޑިއާ އައުޓް" ހަރަކާތް ހުއްޓުވާތީ އިދިކޮޅު ޕީޕީއެމްއާއި ޕީއެންސީ ސަޕޯޓަރުން ރޭ މަގުމަތީ ކުރި މުޒާހަރާ ކަވަރުކުރަން ތިބި ނޫސްވެރިންނަށް ފުލުހަކު އިންޒާރު ދިން މައްސަލަ ބަލައިދޭން މޯލްޑިވްސް މީޑިއާ ކައުންސިލް (އެމްއެމްއޭ) އާއި މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ)އިން ގޮވާލައިފި އެވެ.
މުޒާހަރާ ކަވަރު ކުރަން ތިބި ނޫސްވެރިންނާ ދިމާއަށް "ސޯލިހް" ނަމަކަށް ކިޔާ ފުލުހަކު "ހޭއަރުވާލާނެ" ކަމަށް ބުނާ އަޑު އިވޭ ވީޑިއޯއެއް ސޯޝަލް މީޑިއާގައި ދައުރުވަމުން ދިއުމާ ގުޅިގެން، މިޑިއާ ކައުންސިލުން ބުނީ އެ މައްސަލަ އެ ކައުންސިލްގެ ސަމާލު ކަމަށް އައިސްފައިވާ ކަމަށެވެ.
"މި މައްސަލަ ބައްލަވައި ދެއްވައި، ކަން ހިނގައިދިޔަ ގޮތުގެ ތަފްސީލު ކައުންސިލާ ހިއްސާކޮށްދެއްވަން ކައުންސިލުން މިހާރުވާނީ ދިވެހި ފުލުހުންގެ ހިދުމަތަށް ސިޓީ ފޮނުވާފައި،" މީޑިއާ ކައުންސިލުން ކުރި ޓްވީޓެއްގައިވެ އެވެ.
މީގެ އިތުރުން، އެމްޖޭއޭއާއި ޓްރާންސްޕޭރެންސީ މޯލްޑިވްސް ގުޅިގެން ނެރުނު ނޫސް ބަޔާނެއްގައި ވަނީ އެންމެ ފަހުން ބޭއްވި މުޒާހަރާ ކަވަރު ކުރަން ތިބި ނޫސްވެރިންނާ މެދު ފުލުހުން އަމަލު ކުރަމުންދާ ގޮތާ މެދު ކަންބޮޑުވުން ފާޅުކޮށްފަ އެވެ.
"މުޒާހަރާ ކަވަރުކުރަން ތިބި ނޫސްވެރިންނަށް ފުރައްސާރަކޮށް، އިންޒާރުދީ، އަނިޔާކޮށްފައިވާ މައްސަލަތައް ވަރަށް ވެސް ސީރިއަސްކޮށް ބަލަން ބަލައި، ނޫސްވެރިންނަށް ރައްކާތެރި މާހައުލެއް ކަށަވަރުކޮށްދިނުމަށް ކަމާ ގުޅުން ހުރި އެންމެހާ މުއައްސަސާތަކަށް ގޮވާލަން،" އެމްޖޭއޭގެ ބަޔާނުގައިވެ އެވެ.
ރޭގެ މުޒާހަރާ ވެސް ފެށީ އާދައިގެ މަތިން ޕީޕީއެމްގެ އޮފީސް ކައިރިންނެވެ. ހެންވޭރު، އާޓިފިޝަލް ބީޗް ކައިރީގައި ހުންނަ އެ އޮފީސް ކައިރިން ފަށައިގެން މުޒާހަރާގެ ބައިވެރިން މަޖީދީމަގުން ކުރިއަށް ގޮސް އަލިކިލެގެފާނު މަގުން އުތުރަށް، ކުޑަތަންކޮޅަކަށް ކުރިއަށް ދިޔަ ތަނާ ފުލުހުން އެމީހުނަށް ހުރަސް އަޅައި ހުއްޓުވި އެވެ.
ފުލުހުންގެ އަމުރަށް ނުކިޔަމަންތެރިވި ކަމަށް ބުނެ ދެ އަންހެނުންނާއި ފިރިހެނަކު ފުލުހުންގެ ބެލުމުގެ ދަށަށް ގެންދިޔަ އެވެ. އެކަމަކު އެ މީހުން ވަނީ މިއަދު ދޫކޮށްލައިފަ އެވެ.
ޕީޕީއެމްއާއި ޕީއެންސީ ސަޕޯޓަރުން މަގުމައްޗަށް ނުކުތީ، "އިންޑިއާ އައުޓް" ހަރަކާތް ހިންގާ މައްސަލަގާއި އިއްޔެ މެންދުރުފަހު ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލާއި ޕީޕީއެމްގެ އެކްޓިވިސްޓް އަލީ ނަސީމް (ތަކަނޭ) ހައްޔަރު ކުރުމުން އެ މީހުން ދޫކޮށްލަން ގޮވާލުމަށެވެ.
ޕީޕީއެމް އާއި ޕީއެންސީ ކޯލިޝަނުން ހިންގާ އެ ހަަރަކާތް ހުއްޓުވަން ގާނޫނު ތަންފީޒު ކުރާ އިދާރާތަކަށް އަންގައި، ރައީސް އިބްރާހީމް މުހައްމަދު ސޯލިހް ކުރިން ވަނީ ރިޔާސީ ގަރާރެއް ނެރުއްވައިފަ އެވެ. އިންޑިއާ އައުޓް ހަރަކާތާ ދެކޮޅަށް ފުލުހުން ފިޔަވަޅުތައް އަޅަމުން ދަނީ އެ ގަރާރުގެ ދަށުންނެވެ.
