އޭއެފްސީ ޕްރެޒިޑެންޓްސް އިންފްރާސްޓްރަކްޗަ އިނީޝިއޭޓިވް ޕްރޮޖެކްޓުގެ ދަށުން ވިލިމާލޭގައި ދާދި ފަހުން ހުޅުވި ޓާފް ދަނޑާ އެކު ކްލަބްތަކަށް އިތުރު ޓްރެއިނިން ފެސިލިޓީއެއް ހަމަޖެހިއްޖެ އެވެ.
ވިލިމާލޭ ދަނޑު އެޅީ ދެކުނު ކޮރެއާގެ ސްކައިވިންޑް ގްލޯބަލްއާ އެވެ. މިއީ 2019 ވަނަ އަހަރު އެފްއޭއެމުން ހަވާލުކުރި ޕްރޮޖެކްޓެކެވެ. ކޮވިޑް-19ގެ ސަބަބުން އައި ހުއްޓުމާ ހެދި މި ޕްރޮޖެކްޓް ކަނޑައެޅި ތާރީހަށް ނިންމުމުގައި ގޮންޖެހުންތަކެއް ކުރިމަތިވި އެވެ.
އެފްއޭއެމުން މިދިޔަ އަހަރު ވަނީ ދިވެހި ޕްރިމިއާ ލީގުގެ ތިން ވަނަ ބުރުގެ ބައެއް މެޗުތައް ވިލިމާލެ ޓާފް ދަނޑުގައި ބޭއްވޭތޯ މަސައްކަތްކޮށްފަ އެވެ. އެކަަމަކު، އޭރު އެކަން އެ ގޮތަށް ކުރެވޭގޮތެއްނުވި އެވެ.
އެފްއޭއެމްގެ ރައީސް ބައްސާމް އަދީލް ޖަލީލް ވިދާޅުވީ ރަނގަޅު ފެންވަރުގެ ދަނޑެއް ވިލިމާލޭގައި ހަދާ ނިންމައި، ހުޅުވުމަކީ ވަރަށް ގިނަ ދުވަސް ވީ އުންމީދެއް ހާސިލްވުން ކަމަށެވެ.
މިދިޔަ އާދިއްތަ ދުވަހު ވިލިމާލެ ދަނޑު ހުޅުވުމުގެ ގޮތުން ވިލިމާލެ ޔުނައިޓެޑްގެ ޓީމަކާއި އެފްއޭއެމްގެ ޓީމެއް ވަނީ މެޗެއް ކުޅެފަ އެވެ. ގައުމީ ޓީމުގެ ޖޯޒީގައި ކުުޅުނު އެފްއޭއެމް ޓީމުގައި ރާއްޖޭގެ ފުޓްބޯޅައިގެ ކުރީގެ މަޝްހޫރު ކުޅުންތެރިން ވަނީ ކުޅެފަ އެވެ.
ސަތާރަ އަހަރު ވަންދެން ގައުމީ ޓީމުގެ ގޯލު ބެލެހެއްޓި އިމްރާން މުހައްމަދު، ކުޅުނީ ގޯލަކަށް ނޫނެވެ. ގޯލަށް ހުރީ ކުރިން ގިނަ ކްލަބްތަކެއްގައި ގިނަ ކާމިޔާބީތަކެއް ހޯދި އަސްލަމް އަބްދުއްރަހީމް އެވެ. އެފްއޭއެމް ޓީމަށް ކުޅުނު އެންމެ ދުވަސްވީ ކުޅުންތެރިއަކީ، 1997 ވަނަ އަހަރު ބޭއްވި ސާފް ޗެމްޕިއަންޝިޕުގެ ފައިނަލުގައި ރާއްޖޭގެ ކެޕްޓަން، އަންދަރުސަވާ އިބްރާހިމް ރަޝީދު (އަންދަރޭ) އެވެ.
ވިލިމާލެ ޔުނައިޓެޑްގެ އާކޭ (ކ) އާއި އެފްއޭއެމްގެ ރައީސް ބައްސާމް
ވިލިމާލެ ޓީމަށް ބަލާއިރު، ކުރިން ފުރަތަމަ ޑިވިޝަނުގައި ކުޅުނު، ވިޔަންސާ ޓީމަށް ކުޅުނު ކުޅުންތެރިންނާއި ރާއްޖޭގެ ފުޓްބޯޅައިގެ އެކި ލެވަލްތަކުގައި ގިނަ އަހަރުތަކެއް ވަންދެން ކުޅުނު ކުޅުންތެރިން ހިމެނެ އެވެ. ވިލިމާލެ ޓީމުގެ ހާއްސަ ކުޅުންތެރިއަކަށް ހުރީ ގައުމީ ޓީމުގެ ކުރީގެ މިޑްފީލްޑަރު، އަހުމަދު ނާޒު (އާކޭ) އެވެ.
ދަނޑު ހުޅުވާފައިވާއިރު، އެފްއޭއެމްގެ ވިސްނުމަކީ ޓީމުތަކުގެ ޕްރެކްޓިހަށް ދަނޑު ދޫކުރުމުގެ އިތުރުން ވިލިމާލޭގެ ރައްޔިތުންނަށް ވެސް ބޭނުންކުރެވޭ ގޮތަށް ދަނޑު ބޭއްވުމެވެ.
ދަނޑު ބެލެހެއްޓުމުގެ ޒިންމާ ހަވާލުކުރީ ވިލިމާލެ ޔުނައިޓެޑާ އެވެ.
ވިލިމާލެ ދަނޑު ހުޅުވުމުގެ ގޮތުން ކުޅުނު މެޗުގެ ތެރެއިން.
ދަނޑު ހުޅުވި މެޗުގައި ވިލިމާލެ ޓީމަށް، ރައްޔިތުންގެ މަޖިލީހުގެ ވިލިމާލެ ދާއިރާގެ މެމްބަރު، އަހުމަދު އުޝާމް ވަނީ ކުޅުއްވައިފަ އެވެ. އުޝާމް ވިދާޅުވީ ރަނގަޅު ފެންވަރުގެ ދަނޑެއް ވިލިމާލޭގައި އޮތުމަކީ އެ ތަނުގައި ދިރިއުޅޭ ޒުވާނުންނަށް ވަރަށް އުފާވެރި ހަބަރެއް ކަމަށެވެ.
މީގެ އިތުރުން އޭއެފްސީ ޕްރެޒިޑެންޓްސް އިންފްރާސްޓްރަކްޗަ އިނީޝިއޭޓިވް ޕްރޮޖެކްޓުގެ ދަށުން ވިލިމާލޭގައި ޓްރެއިނިން ސެންޓަރެއް ގާއިމްކުރާނެ އެވެ. އޭގެ ހިމެނެނީ އެކޮމަޑޭޝަން ބިލްޑިން އަކާއި ފެސިލިޓީ ބިލްޑިން އެކެވެ. ފުރަތަމަ ޑިވިޝަނުގެ ކްލަބްތަކަށް ހާއްސަކޮށް ހަދާ އެކޮމަޑޭޝަން ބިލްޑިންގައި ދެ ކޮޓަރި ހިމެނޭ އަށް އެޕާޓްމެންޓެއް ހުންނާނެ އެވެ. ފެސިލިޓީ ބިލްޑިންގައި ހިމެނެނީ ދެ ޗޭންޖިން ރޫމާއި ފާހަނައިގެ އިތުރުން ރެފްރީންނަށް ހާއްސަ ކޮޓަރި އަކާއި އަކާއި މެޗު ކޮމިޝަނަރަށް ހާއްސަ ކޮޓަރިއެކެވެ.
