ޕްލޭނިން މިނިސްޓްރީން ކުރިއަށް ގެންދާ ދެ މަޝްރޫއުއަކާ ގުޅޭގޮތުން ސުވާލުކުރުމަށް މިނިސްޓަރު މުހައްމަދު އަސްލަމް ހާޒިރުކޮށް ސުވާލު ކުރުމަށްފަހު ކުރާނެ އިތުރު މަސައްކަތެއް ނެތް ކަމަށް ރިޔާސަތުން އިއުލާނުކޮށް ރައްޔިތުންގެ މަޖިލީހުގެ މިއަދުގެ ޖަލްސާ ވެސް ނިންމާލައިފި އެވެ.
މަޖިލީހުގެ މިއަހަރުގެ ދެވަނަ ދައުރު ފެށީ އިއްޔެ އެވެ. ޓޫރިޒަމް މިނިސްޓަރު ޑރ. އަބްދުﷲ މައުސޫމާ ސުވާލުކުރުމުގެ 30 މިނިޓު ހަމަވުމުން، ކުރާނެ އިތުރު މަސައްކަތެއް ނެތިގެން އިއްޔެގެ ޖަލްސާ ވެސް ވަނީ ނިންމާލަފަ އެވެ.
"އަޅުގަނޑުމެން އިއްޔެ ވެސް މަޖިލިސް ނިންމާލީ އިތުރު މަސައްކަތެއް މަޖިލީހުގައި ނެތުމުން، އަޅުގަނޑު މިއަދު އަނެއްކާ ވެސް ފާހަގަކުރަން އޮތީ ހަމަ އެ ނުކުތާ،" މިއަދު ޖަލްސާ ނިންމަވާ ލައްވަމުން ރިޔާސަތުގައި އިންނެވި މަޖިލިސް ރައީސް މުހައްމަދު ނަޝީދު ވިދާޅުވި އެވެ.
ޖަލްސާ ނިންމަވާލައްވަމުން ނަޝީދު ވަނީ މަޖިލީހުގެ މަސައްކަތްތައް ހިނގާ ގޮތުގެ ހުލާސާއެއް ވެސް ދެއްވާފަ އެވެ. އެގޮތުން މަޖިލީހުން ކުރަނީ ދެ ކަމެއް ކަމަށާއި އެއީ ސަރުކާރު ޖަވާބުދާރީ ކުރުމާއި ގާނޫނު ހެދުމުގެ މަސައްކަތް ކަމަށެވެ.
މީގެ ތެރެއިން ގާނޫނު ހެދުމުގެ މަސައްކަތް ކުރިއަށް ދަނީ ސަރުކާރުން މަޖިލީހަށް ބިލު ފޮނުވައިގެންނާއި މެންބަރުން ބިލު ހުށަހަޅައިގެން ކަން ފާހަގަކުރައްވާ ނަޝީދު ވިދާޅުވީ "އެ ބާވަތުގެ އެއްވެސް ކަމެއް މިއަދަކު ނެތް" ކަމަށެވެ.
މަޖިލިސް ތަޅުމުގައި ކުރާނެ މަސައްކަތެއް ނެތިގެން ޖަލްސާ ނިންމާލިއިރު، ކޮމިޓީތަކުގައި މިވަގުތު 20 ބިލެއްގެ މަސައްކަތް އަންނަނީ ކުރަމުންނެވެ.
