މޯލްޑީވްސް މީޑިއާ ކައުންސިލްގެ ރައީސް ޝަހުބާން ފަހުމީގެ މައްޗަށް ވެސް މަނީ ލޯންޑްރިން ކުރާ ކަމުގެ ތުހުމަތު ކޮށްފި އެވެ.
ޝަހުބާންގެ މައްޗަށް މަނީ ލޯންޑާ ކުރި ކަމުގެ ތުހުމަތު ކޮށްފައި ވަނީ އޭނާގެ ބޭބެ އަލްހާން ފަހުމީ އާއި އާއިލާގެ ހިއްސާ އޮންނަ ކިންގްސް ކެޕިޓަލް ހޯލްޑިންގްސްއިން ފޮރެކްސް ޓްރޭޑު ކުރަމުން އަންނަ މައްސަލައިގަ އެވެ.
މި މައްސަލައިގެ ތަހުގީގަށް ބަޔާން ނެގުމަށް ބުދަ ދުވަހު ޝަހުބާން ފުލުހަށް ހާޒިރު ވުމަށް އޭނާއަށް ވަނީ ޗިޓު ފޮނުވައިފަ އެވެ. ތުހުމަތުތަކާ ގުޅިގެން އޭނާ ވަނީ އެއީ "އެއްވެސް އަސާސެއް ނެތް މައްސަލައެއް" ކަމަށް ވިދާޅުވެފަ އެވެ.
ޝަހުބާންގެ އިތުރުން އަލްހާނަށް ވެސް މި ތުހުމަތުކޮށްފައިވާއިރު، އަލްހާން ފުލުހަށް ހާޒިރުވާން އަންގައިފައިވަނީ އަންގާރަ ދުވަހު އެވެ.
ފުލުހަށް ހާޒިރުވުމަށް އަންގައި ފޮނުވާފައިވާ ޗިޓުގައި ބުނެފައިވާ ގޮތުން ރާއްޖޭގެ މާލީ ސެކިއުރިޓީގެ ގާނޫނާއި ގަވައިދުތަކާ ހިލާފަށް އިންވެސްޓްމަންޓް ސްކީމެއް ތައާރަފްކޮށް މަކަރާއި ހީލަތުން ގިނަ އަދަދެއްގެ ފައިސާ ހޯދައި އެ ފައިސާ ލޯންޑާކޮށްފައިވާ ކަމުގެ ތުހުމަތު އެ ކުންފުނީގެ މައްޗަށް ކުރެވޭ ކަމަށެވެ.
މިދިޔަ މާޗް މަހުގެ 10 ވަނަ ދުވަހު، އެމްއެމްއޭ އިން ނުސީދާކޮށް ކިންގްސް ފޮރެކްސްއާ ދެކޮޅަށް ބަޔާން ނެރެ، ބީއެމްއެލްގައި ހުޅުވާފައިވާ ކިންގްސް ކެޕިޓަލް ހޯލްޑިންސްގެ އެކައުންޓްތައް ފްރީޒް ކުރީ، ކުޑަ މުއްދަތެއްގައި ބޮޑު ފައިދާއެއް ހޯދައިދޭނެ ކަމަށް ބުނެ މީހުންގެ އަތުން ފައިސާ ނަގައިގެން ބޮޑު ފްރޯޑެއް ހިންގަމުން އަންނަ ކަމަށް ތުހުމަތު ކޮށްފަ އެވެ.
