ހަސަތޭކައެއްހާ މީހުން އުޅޭ ފ. ދަރަނބޫދޫގައި މީގެ ހަތަރު މަސް ކުރިން ހައްދަންފެށި ދަނޑުތަކުން ރޯދައަށް ކެނޑުމަށްފަހު މޭވާތައް ދޮންވި މިއީ ފުރަތަމަ ފަހަރެވެ. އެކަމަކު އިއްޔެ ބަޔަކު ކުރި ކަމަކުން އެތައް ދުވަހެއްގެ ބުރަ މަސައްކަތުގެ ފޮނި މޭވާ ގެއްލި ދިޔައީ އެވެ. އެ ދަނޑުގައި ހުރި ބައެއް ގަސްތައް ވަޅިން ކޮށާފައި ހުރި އިރު ކަރަލާއި މެލަންތައް ހުރީ ކުދިކޮށް ކޮށައި ދަނޑުތަކަށް އަޅައިލައިފަ އެވެ. ކިއުކަމްބާ ވެޔޮތައް ހުރީ ބިމާ ހަމައިން ބުރިކޮށްފަ އެވެ.
މި އަހަރު މާޗް މަހުން ފެށިގެން މޭވާ ލިބެމުން އަންނަ އެ ދަނޑުތަކުން މަހެއްގެ މައްޗަށް އެތައް ހާސް ރުފިޔާއެއް ލިބޭއިރު، ކޮށައިލި ތަކެތި ސަލާމަތުން ލިބުނު ނަމަ 5000ރ. ގެ އަދަދެއްގެ އާމްދަނީ ލިބުނީސް ކަމަށް ދަނޑުވެރިޔަކު ބުންޏެވެ.
ކޮންމެ އިންތިހާބަކާ ދިމާކޮށް ފ. ދަރަނބޫދޫގެ ދަނޑުތައް ކޮށާ މައްސަލަ ބޮޑުވެއްޖެ އެވެ.
ދަރަނބޫދުއަކީ ސިޔާސީ ގޮތުން މާ ހަރަކާތްތެރި ބަޔަކު އުޅޭ ރަށަކަށް ނުވިޔަސް މިހާރު ސިޔާސީ ހަމަނުޖެހުންތައް މިހާރު އޮތީ އާންމު ދިރިއުޅުމަށްވެސް ދަތިވާ ވަރަކަށެވެ. ރައްޔިތުން ކާންބޯން ކުރާ މަސައްކަތަށްވެސް ހުރަސް އަޅަނީ އެވެ. ސިޔާސީ ހިޔާލުތަފާތުވުންތަކުން ގޮސް މީހުންގެ ތަކެއްޗަށް ގެއްލުންދޭ ހިސާބަށް ދިޔައީ އެވެ. އެ ރަށުން ވާހަކަދެއްކި ބައެއް މީހުން ބުނިގޮތުގައި ކޮންމެ އިންތިހާބަކާ ދިމާކޮށްވެސް އެ ރަށުގެ ދަނޑުތަކަށާއި އާންމުންގެ ތަކެއްޗަށް ގެއްލުން ދިނުން މިހާރު ވަނީ އާންމު ކަމަކަށް ވެފަ އެވެ.
"ބޮޑަށް އެކަހަލަ ކަންކަން ހިނގާފަ ހުރީ ކޮންމެވެސް ވޯޓަކާ ގުޅިގެން. އަޅުގަނޑުމެންނަށް ވަރަށް ދަތި ކުރީ ކޮންމެ ވޯޓެއްގަވެސް،" ދަރަނބޫދޫން ވާހަކަ ދެއްކި ދަނޑުވެރިއަކު ބުންޏެވެ.
ދަރަނބޫދޫ ދަނޑެއްްގެ ކިޔުކަމްބާ ދަނޑެއް ކޮށާލާފައި-- ފޮޓޯ: ދަނޑުވެރިއެއް
އެ ރަށުގެ ބައެއް ދަނޑުވަރިންނަށް މިއަދު ހެނދުނު ފެނުނު ހިތްދަތި މަންޒަރަކީ ވެސް އެފަދަ ކަމެކެވެ. އެންމެ ދަނޑެއް ދެ ދަނޑެއް ނޫނެވެ. ހައްދާފައި ހުރި ހުރިހާ މޭވާ އާއި ތަރުކާރީ ދަނޑުތަކެއް ހުރީ ބޭނުން ނުކުރެވޭ ވަރަށް ހަލާކުކޮށްފަ އެވެ.
ކަރާ ދަނޑުތަކާއި މެލަން ދަނޑުތަކާށއި ފަޅޯ ދަނޑުތަކުގައިވާ މޭވާތަކާ އެކު ވެޔޮތައް ވެސް ހުރީ ކޮށައި ކުދިކޮށްފަ އެވެ.
މީގެ 18 އަހަރު ކުރިންފެށިގެން ދަނޑުވެރިކަން ކުރަމުން އަންނަ އެ ރަށުގެ ދަނޑުވެރިޔަކު "އަދަދު" އަށް ބުނީ އެކަހަކަލަ ގެއްލުންތައް ދެނީ ހާއްސަކޮށް އިންތިހާބުތަކާ ދިމާކޮށް ކަމަށާއި އެކަމަކުޔ އެއީ ކޮން ބަޔަކު ކުރާ ކަމެއްކަން އަދި ނޭނގޭ ކަމަށެވެ.
ދަރަނބޫދޫ ކަރާ ދަނޑެއްްގައި އަޅާފައިވާ ކަރާތައް ކޮށާލާފައި -- ފޮޓޯ: ދަނޑުވެރިއެއް
ދަރަނބޫދޫގައި އާންމު ވެފައި ވަނީ ދަނޑުތައް ކޮށާލާ މައްސަލަ އެކަންޏެއް ނޫނެވެ. އާންމުންގެ ހިފާ ގެންގުޅޭ ތަކެއްޗަށް ގެއްލުން ދިނުންވެސް އިންތިހާ އެވެ.
"ކުރީ ދުވަހަކު ގެ އެއްގެ ކެޔޮފީންޏެއްވެސް އަލިފާން ރޯކޮށް އަންދާފައިފި. އޭގަ ގާތްގަނޑަކަށް އަށް ވަރަކށް ގަނޑު ކެޔޮ އޮތް. ބޮޑަށް ހީވަނީ ސިޔާސީ ކަމެއްހެން އެއީވެސް،" އެ ރަށުން ވާހަކަ ދައްކާލި މީހަކު ބުންޏެވެ.
ދަރަނބޫދޫ ފަޅޯ ދަނޑެއްް ކޮށާލާފައި-- ފޮޓޯ: ދަނޑުވެރިއެއް
އެ ރަށުގެ އެހެން މީހަކު ބުނީ ރަށުގައި ހިތްހަމަ ޖައްސާލުމަށް ގޮސް އިށީނދެ ތިބުމަށް ހަދާފައިވާ އުނދޯލި، ޖޯލިފަދަ ތަކެތި ކޮށާލުމާއި އެ ތަކެތި އެކި ތަންތަނަށް އެއްލާލުންފަދް ކަންކަން ކުރާ ކަމަށެވެ.
"މި ރަށުގަ މިހާރު އާންމު ކަމެއް އެއީ. ދޭތެރެ ދޭތެރެއިން މިހާރު އެކަލަހަ ކަންކަން އެބަ ހިނގާ. ކޮން ބަޔަކު ކިހިނެތް ވެގެން ކުރާ ކަމެއް ކަމެއްވެސް ނޭނގޭ، އެ މައްސަލަ ފުލުހަށްވެސް ވާނީ ހުށަހަޅާފައި،" ކައުންސިލްގެ މެންބަރު ޖުވޭރިޔާ މުހައްމަދު ވިދާޅުވި އެވެ.
ފުލުހުން ބުނީ ރޭ ފަތިހުގެ ވަގުތެއްގައި ދަރަބޫދޫ ގެ ދެ ދަނޑަކަށް ގެއްލުންދީފައިވާ މައްސަލަ ފުލުހުންނަށް ހުށަހަޅާފައިވާ ކަމަށައި އެ މައްސަލައާ ގުޅިގެން މިހާތަނަށް މީހަކު ހައްޔަރުކޮށްފައިނުވާ ކަމަށެވެ. އަދި މައްސަލައާ ގުޅިގެން ބަލަންޖެހޭ ކަންކަން ފުލުހުން މައްސަލަ ތަހުގީގު ކުރަމުންދާ ކަމަށް ވެސް ފުލުހުން ބުންޏެވެ.
މިއީ މަދުން ނަމަވެސް، ރާއްޖޭގައި ދަނޑުވެރިކަން ކުރާ ރަށްރަށުގައި ކުރަމުން އަންނަ ނޭދެވޭ އަމަލެކެވެ. އެގޮތުން ކަރާ ވެޔޮތައް ކޮށާލުމާއި ޗިޗަންޑާ އާއި ފާގަ ފަދަ ތަރުކާރީ ގިނަ އަދަދަކަށް އަޅާފައިވަނިކޮށް ތަކެއްޗާ އެކު، ވެޔޮ ކޮށާލައި ބޮޑެތި ފަޅޯދަނޑުތައްވެސް ކޮށާ ބިމާހަމަކޮށްފައި ވެސް ބައެއް ރަށްރަށުގައި އެބަ ހުއްޓެވެ.
