ކުޑަކުއްޖަކާ މެދު ޖިންސީ އަމަލެއް ހިންގި މައްސަލައެއްގައި ހައްޔަރުކުރަން އަމުރުކޮށްފައިވާ މުހައްމަދު ބިޝާރު އިސްމާއިލް ފިލައިގެން އުޅެނިކޮށް ފުލުހުން އަތުލައިގެންފި އެވެ.
ހޯދަން އުޅޭތާ ފަސް މަސް ދުވަސް ފަހުން 41 އަހަރުގެ ބިޝާރުގެ ފޮޓޯ ފުލުހުން އާންމުކުރީ މިއަދު އެވެ. މައުލޫމާތު ލިބިފައިވާ ގޮތުގައި ފޮޓޯ ޖެހިތާ މާ ގިނައިރުތަކެއް ނުވަނީސް ބިޝާރު ހައްޔަރުކުރީ ގއ. ކޮލަމާފުށިންނެވެ.
ބިޝާރުއަކީ ކުޑަކުއްޖަކާމެދު ޖިންސީ އަމަލެއް ހިންގިކަމަށް ތުހުމަތުކުރެވޭ މައްސަލައަކާ ގުޅިގެން 2020 ވަނަ އަހަރު ހައްޔަރުކުރި މީހެކެވެ. އެ މައްސަލައިގައި ފުވައްމުލަކު ކޯޓަށް ހާޒިރުކުރުމުން ޝަރީއަތުން ގޮތެއް ނިމެންދެން އޭނާ ބަންދުކުރި އެވެ.
ފަހުން އެ މައްސަލަ ކްރިމިނަލް ކޯޓަށް ބަދަލުވީ ފަހުން ވެސް ޝަރީއަތް ނިމެންދެން އޭނާ ބަންދުކުރަން އަމުރުކުރި އެވެ. އެކަމަކު މި އަމުރު މުރާޖާކޮށްދިނުމަށް ކޯޓުގައި އެދުމުން ޝަރުތުތަކާއެކު އޭނާ ދޫކޮށްލީ އެވެ.
އޭނާ ހޯދަން ފުލުހުން މަސައްކަތް ފެށީ، ދައުލަތުގެ ފަރާތުން މި އަމުރު ހައިކޯޓުގައި އިސްތިއުނާފުކުރުމުން އޭނާ ދޫކޮށްލަން ކުރި އަމުރު ބާތިލުކޮށް، ޝަރީއަތް ނިމެންދެން ބަންދުގައި ބަހައްޓަން ކުރި އަމުރު ދެމެހެއްޓުމުންނެވެ.
ބިޝާރުއަކީ ކެނެބިސް ޓްރެފިކް ކުރިކަން ސާބިތުވެ 2016 ގައި އުމުރު ދުވަހުގެ ޖަލު ހުކުމެއް ވެސް އިއްވާފައި ހުރި މީހެކެވެ. އޭނާ މިނިވަންވީ ކްރިމިނަލް ކޯޓުގެ ހުކުމް ހައި ކޯޓުން 2018 ވަނަ އަހަރު ބާތިލުކުރުމުންނެވެ.
