އެއް އާއިލާއަކަށް ނިސްބަތްވާ ގިނަ ކުޑަކުދިންތަކަކަށް ޖިންސީ ގޯނާކުރި ކަމުގެ ތުހުމަތުގައި ހައްޔަރު ކުރި ފިރިހެން މީހާ ކޯޓުން ދޫކޮށްލައިފި އެވެ.
އެ މައްސަލައާ ގުޅިގެން މިދިޔަ އޭޕްރިލް މަހުގެ ނުވަ ވަނަ ދުވަހު ކޯޓު އަމުރެއްގެ ދަށުން ހައްޔަރު ކުރި 55 އަަހަރުގެ އެ މީހާގެ ބަންދަށް ކޯޓުން އެންމެ ފުރަތަމަ 30 ދުވަސް ދިނެވެ.
ފުލުހުންގެ އޮފިޝަލަކު މި ނޫހަށް ބުނި ގޮތުގައި، އޭނާގެ ބަންދުގެ މުއްދަތު އިތުރު ކުރުން އިއްޔެ ކްރިމިނަލް ކޯޓަށް ގެންދިއުމުން އޭނާ ބަންދުން ވަނީ ދޫކޮށްލައިފަ އެވެ. އިތުރު ތަފްސީލެއް ނުދެ އެވެ.
އެނގިފައިވާ ގޮތުގައި އެމީހާ ޖިންސީ ގޯނާ ކޮށްފައިވަނީ އެކި ދުވަސް މަތިން އެއް އާއިލާއަކަށް ނިސްބަތްވާ ހަ ކުޑަކުއްޖަކަށެވެ. އެމީހާއަކީ ވެސް އެ އެ އާއިލާއަށް ނިސްބަތްވާ މީހެއް ކަން ވެސް އެނގިފައިވެ އެވެ.
އެ މައްސަލަ ފުލުހުން ދަނީ އަދިވެސް ތަހުގީގު ކުރަމުންނެވެ.
