ނ. މިލަދޫގައި މަސްތުވާތަކެތީގެ ވިޔަފާރީ ކުރަން އުޅުނު މީހެއް ހުއްޓުވުމުން، އެ އޮފިސަރަށް އިންޒާރުދީ، އޭނާގެ ސައިކަލުގައި ރޯކޮށްލި މައްސަލާގައި ހައްޔަރު ކުރި މީހެއްގެ މައްޗަށް ދައުވާ އުފުލައިފި އެވެ.
ފެބްރުއަރީ މަހުގެ 18 ވަނަ ދުވަހުގެ ރޭ ދަންވަރު ރޮކޮށްލީ އެ ރަށުގެ ޕޮލިސް ޑެސްކްގެ އިންޗާޖް ސާޖަންޓް މުހައްމަދު އަރީޝްގެ ސައިކަލުގަ އެވެ.
މި މައްސަލާގައި ދައުވާ ކުރީ އެ ރަށު ފަތަގުމާގެ އަބްދުﷲ ޝުހާދުގެ މައްޗަށެވެ. އޭނާގެ މައްޗަށް އުފުލީ މުދަލަށް ގެއްލުން ދިނުމުގެ ކުށުގެ ދައުވާ އެވެ.
ޕަބްލިކް ޕްރޮސެކިއުޓަރު އަހްމަދު ޝަފީއު ވިދާޅުވި ގޮތުގައި އެ މައްސަލަ މިދިޔަ މަހުގެ ހަވަނަ ދުވަހު ނ. މިލަދޫ މެޖިސްޓްރޭޓް ކޯޓަށް ވަނީ ހުށަހަޅައިފަ އެވެ.
މި މައްސަލާގައި ފުލުހުން އެންމެ ފުރަތަމަ ތިން މީހަކު ހައްޔަރު ކުރި އެވެ. ނަމަވެސް ޝުހާދު (22އ.) ފިޔަވައި ދެން ހައްޔަރު ކުރި ދެ މީހުން ފަހުން ދޫކޮށްލި އެވެ. ދެން ހައްޔަރު ކުރީ 27 އަހަރުގެ ދިވެހި ފިރިހެނަކާއި 31 އަހަރުގެ ދިވެހި ފިރިހެނެކެވެ.
ފުލުސް މީހާގެ ސައިކަލުގައި ރޯކޮށްލި މަންޒަރުތައް ހިމެނޭ ސީސީޓީވީ ފުޓޭއްގެ ވީޑިއޯ އެ ރޭ ސޯޝަލް މީޑިއާގައި ދައުރުވެފައިވެ އެވެ.
ސީސީޓީވީ ފުޓޭޖުން ފެންނަ ގޮތުގައި، ފުލުސް މީހާގެ ގޭގެ ގޯތި ތެރެއަށް މޫނު ނިވާކޮށްގެން ފިރިހެނަކު ވަންނައިރު ދޮރުމަތީގައި ވެސް ފިރިހެނަކު ހުރެ އެވެ. ގޭތެރެއަށް ވަން މީހާ ސައިކަލަށް ޕެޓްރޯލް އަޅައި، އެ ތަނުން ދިއުމާއެކު، ދޮރުމަތީގައި ހުރި މީހާ ސައިކަލުގައި ރޯކޮށްލައި، ވަގުތުން ދުއްވައިގަނެ އެވެ.
