ސިރާތުލް ހާރިސިއްޔާ، ފަލަސްތީން (މޭ 7) - މިދިޔަ އަހަރު ޔަހޫދީއަކު މަރާލި ކަމަށް ތުހުމަތު ކުރެވޭ ފަލަސްތީނު މީހެއްގެ ގެ، އިޒްރޭލް ސިފައިން ބިމާ ހަމަކޮށްލުމުން ހަމަނުޖެހުން އުފެދިއްޖެ އެވެ.
އިޒްރޭލުން ވެރިވެގަނެގެން އުޅޭ ހުޅަނގު އައްސޭރީގެ ޖެނިން އަވަށް ކައިރީގައި އޮންނަ ސިރާތުލް ހާރިސިއްޔާ ސަރަހައްދުގައި ހުންނަ އުމަރް ޖަރާދަތުގެ ގެ ބިމާ ހަމަކޮށްލީ ގޮވާ ތަކެތި ހަރުކޮށްގެންނެވެ.
އިޒްރޭލުން ނެރުނު ބަޔާނެއްގައި ބުނީ އެކަން ކުރިއަށް ގެންދިޔަ ވަގުތު ފަލަސްތީން މީހުން ފުލުހުންނަށް ހަމަލާ ދިން ކަމަށާއި ގަލާއި އަލިފާން ބޮން އުކި ކަމަށެވެ. ރައްދުގައި އިޒްރޭލް ސިފައިން ބަޑި ޖެހި އެވެ.
އޭއެފްޕީއިން ބުނީ ހަމަނުޖެހުމުގައި ފަލަސްތީނުގެ ދެ މީހުންނަށް އަނިޔާވި ކަމަށެވެ. މި ހަމަނުޖެހުން ހިނގާފައި މި ވަނީ އިޒްރޭލާއި ހުޅަނގު އައްސޭރީގެ މަޝްރަހު ހޫނުވެފައި ވަނިކޮށެވެ.
މިދިޔަ ބުރާސްފަތި ދުވަހު ތެލް އަވީވްގައި ފަލަސްތީނުގެ ބަޔަކު ކޯރާޑިއަކުން ހަމަލާދީ އިޒްރޭލުގެ ތިން މީހުން މަރާލި އެވެ. ހަމަލާގެ ތުހުމަތުވާ ފަލަސްތީނު ދެ މީހުން ހޯދުމުގެ މަސައްކަތް ދަނީ ކުރަމުންނެވެ.
ފާއިތުވި މަހު އިޒްރޭލް ފުލުހުންނާއި ފަލަސްތީނުގެ އާއްމުންނާ ދެމެދު ގުދުސްގައި ހުންނަ އަލް އަގްސާ މިސްކިތުގެ ގޯތިތެރޭގައި ވެސް ބޮޑެތި ހަމަނުޖެހުންތައް ހިނގާފައިވެ އެވެ.
ޖަރާދަތް އާއި އޭނާގެ އާއިލާގެ ދެ މެމްބަރުންނަށް އިޒްރޭލުން ތުހުމަތު ކުރަނީ އުމުރުން 25 އަހަރުގެ ޔަހޫދީ ދަރިވަރު ޔެހޫދާ ޑިމެންޓްމަން އަށް ޑިސެމްބަރު 25، 2021 ގައި ހަމަލާދީ މަރާލި ކަމަށެވެ.
މީގެ ކުރިން ވެސް އިޒްރޭލުން ވަނީ ސިލާތުލް ހާރިސިއްޔާގައި ހުންނަ ޖަރާދަތު އާއިލާގެ އިތުރު ތިން ގެ ބިމާ ހަމަކޮށްފަ އެވެ. ފެބްރުއަރީ އަދި މާޗް މަހު އެކަން ހިންގުމުން ވެސް ހަމަނުޖެހުން ހިނގި އެވެ. އޭރުގެ ހަމަނުޖެހުންތަކުގައި ސިފައިން ބަޑި ޖެހުމުން ފަލަސްތީނުގެ ކުއްޖަކު މަރުވި އެވެ.
ޔަހޫދީންނަށް ހަމަލާދިން ކަމަށް ތުހުމަތު ކުރެވޭ ފަލަސްތީނު މީހުންގެ ގެތައް ބިމާ ހަމަ ކުރުމަކީ އިޒްރޭލުން ގަވާއިދުން ކުރާ ކަމެކެވެ. އެއީ ހައްގުތަކާ ހިލާފު އަމަލެއް ކަމަށް ބުނެ އިޒްރޭލަށް ބޮޑެތި ފާޑުކިޔުން އަމާޒުވެ އެވެ. ނަމަވެސް އިޒްރޭލުން ބުނަނީ އެއީ ހަމަލާތައް ހުއްޓުވުމަށް އަޅާ ފިޔަވަޅެއް ކަމަށެވެ.
