ވަރުގަދަ ބަހުގެ ހަމަލާތަކާއި ޕާޓީގެ އެތެރޭގެ ހިޔާލުތަފާތުވުންތަކުން ފާހަގަކުރެވުނު އިންތިޚާބީ ވާދަވެރިކަމަކަށް ފަހު، އެމެރިކާގެ މިޝިގަން ސްޓޭޓްގެ ސެނެޓް ގޮނޑި ޑިމޮކްރެޓިކް ޕާޓީގެ ވައަތުފިޔައިގެ ކެންޑިޑޭޓް އަބްދުލް އަލް-ސައްޔިދު ކާމިޔާބު ކުރައްވައިފި އެވެ.
އަލް-ސައްޔިދު މި ގޮނޑި ކާމިޔާބު ކުރެއްވީ ރިޕަބްލިކަން ކެންޑިޑޭޓް މައިކް ރޮޖާސްއާ ވާދަކުރައްވަ އެވެ. އޭނާއާ ދެކޮޅަށް އަމާޒުވި ބޮޑެތި ތުހުމަތުތަކާއި، އެއްވެސް އަސާސެއް ނެތް ގޮތަށް ޓެރަރިޒަމާ ގުޅުވައި ދިން ހަމަލާތަކުގެ އިތުރުން، އަމިއްލަ ޕާޓީގެ މެންބަރަކާ ދެމެދު އުފެދުނު ބޮޑު ދެބަސްވުމާ އެކުވެސް އޭނާ ވަނީ ކުރި ހޯއްދަވާފަ އެވެ. މިއީ އެމެރިކާގެ ތާރީޚުގައި މުސްލިމަކު ސެނެޓަށް އިންތިޚާބުވި ފުރަތަމަ ފަހަރެވެ.
ރައީސް ޑޮނަލްޑް ޓްރަމްޕްގެ ތާއީދު އޮތް ރޮޖާސް ވަނީ އަލް-ސައްޔިދަކީ ކޮމިއުނިސްޓެއްގެ ގޮތުގައި ސިފަކުރައްވައި، އިސްރާއީލާ މެދު އޭނާ ގެންގުޅުއްވާ ސިޔާސަތަށާއި އޭނާގެ އިސްލާމީ އަގީދާއަށް ވަރަށް ބޮޑަށް ފާޑުވިދާޅުވެފަ އެވެ.
އާންމު ސިއްހަތާ ބެހޭ ދާއިރާގެ ކުރީގެ އިސްވެރިއެއް ކަމަށްވާ އަލް-ސައްޔިދު ކެމްޕޭން ކުރެއްވީ ވައަތުފިޔައިގެ ސިޔާސަތުތަކެއްގެ މައްޗަށެވެ. އޭގެ ތެރޭގައި އެންމެނަށް ހިލޭ ސިއްހީ ހިދުމަތް ދިނުމާއި، ބިލިއަނަރުންގެ އަތުން "ވެލްތު ޓެކްސް" ނުވަތަ މުއްސަނދިކަމުގެ ޓެކްސް ނެގުން ހިމެނެ އެވެ.
އަލް-ސައްޔިދު މި ކާމިޔާބީ ހޯއްދެވީ، ޑިމޮކްރެޓިކް ޕާޓީގެ ޕްރައިމަރީގައި އޭނާއާ ވާދަކުރެއްވި ހޭލީ ސްޓީވެންސް، އިންތިޚާބަށް އެންމެ ދުވަހަކަށް ވެފައި ވަނިކޮށް ރިޕަބްލިކަން ކެންޑިޑޭޓް ރޮޖާސްއަށް ތާއީދުކުރަން ނިންމާފައި ވަނިކޮށެވެ.
އަލް-ސައްޔިދު ސްޓޭޖަށް އެރުމުން އޭނާއަށް ތާއީދުކުރާ މީހުން ވަނީ ބާރަށް ހަޅޭއްލަވައި، އުފަލާއެކު އޭނާގެ ނަން ގޮވާފަ އެވެ. މުސްލިމަކު ސެނެޓަށް އިންތިޚާބުވި ތާރީޚީ ވަގުތު ރެކޯޑުކުރުމަށްޓަކައި ގިނަ އަދަދެއްގެ ބަޔަކު ފޯނުތައް އުފުލާލައިގެން ތިއްބެވެ.
މިސްރުގެ ހިޖުރަވެރިންގެ ދަރިއެއް ކަމަށްވާ އަލް-ސައްޔިދު ވަނީ ކެމްޕޭން ތެރޭގައި، ގާޒާގައި އިސްރާއީލުން ހިންގަމުންދާ އަމަލުތަކަކީ ނަސްލު ނައްތާލުމުގެ އަމަލުތަކެއްގެ ގޮތުގައި ސިފަކުރައްވައި، އެ ގައުމަށް އެމެރިކާއިން ދޭ އެހީތައް ހުއްޓާލުމަށް ގޮވާލައްވާފަ އެވެ.
މި މައްސަލައަކީ އެމެރިކާގައި ދެވަނައަށް އެންމެ ގިނައިން އަރަބި ދަރިކޮޅުގެ މީހުން ދިރިއުޅޭ މިޝިގަން ސްޓޭޓްގައި ވަރަށް ބޮޑު އަހަންމިއްޔަތުކަމެއް ދެވޭ މައްސަލައެކެވެ.
މީގެ އިތުރުން، މި މައްސަލައިގެ ސަބަބުން އަލް-ސައްޔިދު އާއި އިސްރާއީލަށް ވަރަށް ބޮޑަށް ތާއީދުކުރާ ސްޓީވެންސްއާ ދެމެދު ނުތަނަވަސްކަން އުފެދުނެވެ. ސްޓީވެންސްގެ ޕްރައިމަރީ ކެމްޕޭނަށް އެމެރިކަން އިސްރާއީލް ޕަބްލިކް އެފެއާޒް ކޮމިޓީ (އޭޕެކް) އިން ވަނީ މިލިއަނުން ފައިސާގެ އެހީ ދީފަ އެވެ.
