އެމެރިކާގެ މިޑްޓާމް އިންތިޚާބުގައި ރައީސް ޑޮނަލްޑް ޓްރަމްޕްގެ ރިޕަބްލިކަން ޕާޓީއަށް ކުރިމަތިވި ބޮޑު ނާކާމިޔާބީއާ ގުޅިގެން، އެމެރިކާގެ ރައްޔިތުން "ހަނގުރާމައަށް ނޫނެކޭ" ބުނެފި ކަމަށް އީރާނުން އެމެރިކާއާއެކު ކުރާ މަޝްވަރާތަކުގައި އިސްކޮށް އުޅުއްވާ މަންދޫބު ވިދާޅުވެއްޖެ އެވެ.
އީރާނުގެ މަޖިލީހުގެ ރައީސް މުޙައްމަދު ބާގިރު ޤާލީބާފް އެކްސްގައި ކުރެއްވި ޕޯސްޓެއްގައި ވިދާޅުވީ، އެމެރިކާގެ ރައްޔިތުން ދިން އެ މެސެޖަށް އީރާނުން ތާއީދުކުރާ ކަމަށެވެ.
އޭނާ އިތުރަށް އިންޒާރު ދެއްވި ގޮތުގައި، ބައިނަލްއަގުވާމީ ގޮތުން "ބްލެކްމެއިލް ކުރާ ފަރާތްތަކުގެ" ނުފޫޒަށް ލެނބި، އެމެރިކާ ސަރުކާރުން އެ ގައުމުގެ ރައްޔިތުންގެ ނިންމުމާ ޚިލާފުވެއްޖެ ނަމަ، އީރާނުން "ނޫނެކޭ" ބުނާނީ އެމެރިކާއަށް ބިރުވެރި ހާލަތެއް ކުރިމަތިކުރުވަމުން ކަމަށް ވެސް އޭނާ ވިދާޅުވި އެވެ.
ކޮންގްރެސްގެ ގޮނޑިތަކަށް ވާދަކުރި ރިޕަބްލިކަން ކެންޑިޑޭޓުންނަށް ލިބުނު ދަށް ނަތީޖާއަކީ، ހަނގުރާމައާއި އޭގެ ސަބަބުން ތެލުގެ އަގު އުފުލުމާ ގުޅުންހުރި ކަމެއް ކަމަށް ރައީސް ޓްރަމްޕް ވަނީ އެއްބަސްވެވަޑައިގެންފަ އެވެ. ނަމަވެސް، މިދިޔަ ފެބްރުއަރީ މަހު އިޒްރޭލާ ގުޅިގެން އީރާނަށް ދިން ހަމަލާއާ މެދު ހިތާމަނުކުރައްވާ ކަމަށް އޭނާ ވިދާޅުވި އެވެ.
ފޮކްސް ނިއުސްއަށް ދެއްވި އިންޓަވިއުއެއްގައި، އިންތިޚާބުގެ ނަތީޖާއާ ބެހޭގޮތުން ވާހަކަދައްކަވަމުން ޓްރަމްޕް ވިދާޅުވީ، އެ ނަތީޖާގެ އެއް ބަޔަކީ އީރާނުގެ މައްސަލަ ކަމަށް ގަބޫލުކުރައްވާ ކަމަށެވެ.
ޓްރަމްޕް އިތުރަށް ވިދާޅުވީ، އީރާނާ މެދު އޭނާ ގެންގުޅުއްވާ ސިޔާސަތުތަކަށް ރައްޔިތުން ތާއީދުކުރި ނަމަވެސް، ހަނގުރާމައިގެ ސަބަބުން ވަގުތީ ގޮތުން ތެލުގެ އަގު ބޮޑުވުމުގެ ތަކުލީފު އުފުލަން ރައްޔިތުން ބޭނުންނުވީ ކަމަށް ލަފާކުރެވޭ ކަމަށާއި، އެކަން އޭނާއަށް ގަބޫލުކުރެއްވޭ ކަމަށެވެ.
ސީބީއެސް ނިއުސްއާ ވަކިން ވާހަކަދައްކަވަމުން ޓްރަމްޕް ވިދާޅުވީ، މި ހަނގުރާމަ ނިމުމަކަށް އަންނާނީ އޭނާ އެކަން ނިންމަން ބޭނުންވާ ވަގުތެއްގައި ކަމަށެވެ.
އީރާނާއެކު އެއްބަސްވުމަކަށް ނާދެވިއްޖެ ނަމަ، މިޑްޓާމް އިންތިޚާބަށް ފަހު އެމެރިކާ އާއި އިޒްރޭލުން އަނެއްކާވެސް ފުރިހަމަ ހަނގުރާމައަކަށް ގޮސްދާނެ ކަމުގެ އިންޒާރު ފާއިތުވި ހަފުތާތަކުގައި ރައީސް ޓްރަމްޕް ވަނީ ދެއްވާފަ އެވެ.
