މިފަހުން މާލޭގައި ހިނގި ގޭންގު މާރާމާރީތަކާ ގުޅިގެން ފުލުހުން ގެޔެއް ބަލާފާސްކުރަމުން ދަނިކޮށް އެ ގޭތެރެއިން ފުލުހަކަށް ހަމަލާދިން މައްސަލައެއް ތަހުގީގުކުރަން ފަށައިފި އެވެ.
މައުލޫމާތު ލިބިފައިވާ ގޮތުގައި ފުލުހަކަށް ހަމަލާ ދިނީ ހުޅުމާލޭ ގެޔެއް ބަލާފާސްކުރަމުން ދަނިކޮށެވެ. ބައެއް މަސްދަރުތަކުން އެއީ ހުޅުމާލޭ ހިޔާ ފްލެޓެއްގެ ތެރޭގައި ހިނގި ކަމެއް ކަމަށް ބުނި ނަމަވެސް ފުލުހުން މީޑިއާ އޮފިޝަލް އެކަން ޔަގީންކޮށްނުދެ އެވެ.
މި ހާދިސާއާ ގުޅިގެން އޭނާ ވިދާޅުވީ އެފަދަ ހާދިސާއެއް ހިނގާފައިވާ ކަމަށާއި، އެ މައްސަލަ ތަހުގީގުކުރަމުންދާ ކަމުގެ އިތުރުން މިވަގުތަށް އެހެން މައުލޫމާތެއް ދެވެން ނެތް ކަމަށެވެ. އެ ފުލުހަށް ހަމަލާދިނީ ކޯރާޑިއަކުން ކަމުގެ އަޑުފެތުރެމުންދާތީ އެކަމާ ގުޅިގެން ސުވާލުކުރުމުން ވެސް ދެއްވީ ހަމަ މި ޖަވާބެވެ.
ސިލްސިލާ މާރާމާރީތަކެއް ފެށުނީ، މާލޭގައި މިފަހުގެ އަހަރުތަކުގައި އެފަދަ މާރަމާރީތައް ހިނގުން މުޅީންހެން ހުއްޓުމަކަށް އައިސްފައި ވަނިކޮށެވެ. އީދު ދުވަހާއި އެއާ ގުޅިގެން ފަހުން ހިނގި މާރާމާރީތަކާއެކު ފުލުހުން ދަނީ މިހާރު ޕެޓްރޯލްކުރުން އިތުރުކޮށް، މަގުމަތީ ޗެކްޕޮއިންޓްތަކާއި ރެންޑަމް ބަލާފާސްކުރުމުގެ އޮޕަރޭޝަންތައް ކުރިއަށް ގެންދަމުންނެވެ.
ރޭގެ ވަގުތެއްގައި ހިންގި އޮޕަރޭޝަނެއްގައި ވެސް މި މާރާމާރީތަކާ ގުޅޭ ބަޔަކު ފުލުހުން ވަނީ ހުޅުމާލެ 37 ނަމްބަރު ފްލެޓުން ބަޔަކު ހައްޔަރުކޮށްގެން ގެންގޮސްފަ އެވެ. މިހާތަނަށް ފުލުހުން ހިއްސާކޮށްފައިވާ މައުލޫމާތަށް ބަލާއިރު، މި މައްސަލަތަކުގައި ހަތް މީހަކު ވަނީ ބަންދުކޮށްފަ އެވެ.
އޭގެ ތެރެއިން މިހާތަަނަށް ވަނަވަރު ހާމަކުރީ އެކެއްގެ އެވެ. އެއީ އުމުރުން 18 އަހަރުގެ ގދ. ވާދޫ، އުނިމާގެ، ހަސަން ޒިޔާން އެވެ. ކްރިމިނަލް ކޯޓުން ވަނީ މައްސަލައިގެ ތަހުގީގު ނިމެންދެން އޭނާ ބަންދުކުރަން އަމުރުކޮށްފަ އެވެ.
އެ އަމުރުން އެނގޭ ގޮތުގައި މީނާއަކީ ވަޅިން ހަމަލާދިން މީހާ އިން ސައިކަލު ދުއްވާފައި ދިޔަ މީހާ އެވެ. އޭނާއާ އެކު ހައްޔަރުކުރި ކުޑަކުއްޖެއްގެ ބަންދަށް ޖުވެނައިލް ކޯޓުން ވަނީ ހަތް ދުވަސް ޖަހާފަ އެވެ.
މާރާމާރީ ހިންގަން އުޅުނުކަމަށް ޝައްކުކުރެވޭ އިތުރު ހަތަރު މީހަކު ވެސް ކްރިމިނަލް ކޯޓުން ވަނީ ބަންދުކުރަން އަމުރުކޮށްފަ އެވެ. އޭގެ ތެރެއިން ދެ މީހަކު ބަންދުކުރީ 15 ދުވަހަށެވެ. އަނެއް ދެ މީހުން ބަންދުކުރީ 10 ދުވަހަށެވެ. މި އެންމެންނަކީ ވެސް ކުށުގެ ރެކޯޑް އޮންނަ މީހުން ކަމަށް ފުލުހުން ކޯޓުގައި ބުނެފައި ވެ އެވެ.
މި މައްސަލަތަކުގައި ތުހުމަތުކުރެވޭ ބައެއް މީހުން ހައްޔަރުކުރި ނަމަވެސް ފުލުހުން ދަނީ މާރާމާރީތަކާ ގުޅޭ އިތުރު މީހުން ހޯދަމުންނެވެ. އޭގެ ތެރެއިން ހަތް މީހަކު ހޯދަން ފުލުހުން ވަނީ އާންމުންގެ އެހީތެރިކަމަށް އެދިފަ އެވެ.
މިހާތަނަށް ކޯޓުން ބަންދުކުރަން އަމުރުކުރި މީހުންގެ ތެރޭގައި މި މީހުން ނުހިމެނެ އެވެ.
