ރާއްޖޭގެ ނޫސްވެރިކަން ހިފެހެއްޓުންތަކެއްގެ ތެރޭގައި ވަނިކޮށް، ނޫސްވެރިކަމަށް ފުރިހަމަ މިނިވަންކަން ހޯދައިދެވިފައިވާ ކަމަށް ރައީސް އިބްރާހީމް މުހައްމަދު ސޯލިހް ވިދާޅުވެއްޖެ އެވެ.
ބައިނަލްއަގުވާމީ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި މިއަދު ދެއްވި ހިތާބުގައި އެމަނިކުފާނު ވިދާޅުވީ، ރާއްޖެއަކީ އޭޝިއާގެ ގައުމުތަކަށް ބެލި ކަމުގައިވިޔަސް، ނޫސްވެރިކަމުގެ މިނިވަންކަން ލިބިދީފައިވާ މަދު ގައުމުތަކުގެ ތެރޭ ހިމެނޭ އެއް ގައުމު ކަމަށާއި، ދެކުނު އޭޝިއާގެ ގައުމުތަކުގެ ތެރެއިން ނޫސްވެރިކަމުގެ މިނިވަންކަން އެންމެ ފުރިހަމައަށް ލިބިދީފައިވާ ގައުމު ކަމަށެވެ.
މިނިވަން ނޫސްވެރި ކަމަށް ފުރުސަތު ދިނުމަކީ، ސަރުކާރު ޒިންމާދާރު ކުރުވައި، ޑިމޮކްރެސީ ހަރުދަނާ ކުރުމަށްޓަކައި ކޮންމެހެން ކުރަންޖެހޭ ކަމެއް ކަމަށް ރައީސް ސޯލިހް ވިދާޅުވި އެވެ.
"ނޫސްވެރިކަމުގެ މިނިވަންކަމުގެ ހައްގު ހިމާޔަތްކޮށްދިނުމަށް ސަރުކާރުން ވެފައިވާ ވަޢުދާ އެއްގޮތަށް، ހަބަރާއި މައުލޫމާތު ފެތުރުމުގެ ފުރިހަމަ މިނިވަންކަމާއި މައުލޫމާތު ހޯދައި ލިބިގަތުމުގެ ހައްގު، ކުރިމަގުގައި ވެސް ދިވެހި ނޫސްވެރިންނަށާއި ދިވެހި ރައްޔިތުންނަށް ފުރިހަމައަށް ލިބިދޭނެކަން މި ފުރުސަތުގައި ޔަގީންކޮށްއަރުވަން،" ރައީސް ވިދާޅުވި އެވެ.
ހަމައެފަދައިން، ދައުލަތް ހިންގުމުގެ ނިޒާމުގެ ތެރެއިން، ކޮރަޕްޝަނާއި ހިޔާނާތުގެ އަމަލުތައް ނައްތައިލުމަށްޓަކައިވެސް، ނޫސްވެރިކަމުގެ މިނިވަންކަމާއި މައުލޫމާތު ހޯދައި ލިބިގަތުމުގެ ފުރިހަމަ މިނިވަންކަން ފަހިކޮށްދީފައި އޮތުން އެހާމެ މުހިންމު ކަމަށް ވިދާޅުވި އެވެ.
ނޫސްވެރިކަމުގެ މިނިވަންކަން އެއްވެސް ހިފެހެއްޓުމެއް ނެތި ދީފައި އޮތް ނަމަވެސް ކޮންމެ ނޫސްވެރިއެއްގެ ކޮނޑުގައި ވަރަށް މަތިވެރި ގައުމީ މަސްއޫލިއްޔަތެއް އެޅިފައިވާކަން ރައީސްގެ ވާހަކަފުޅުގައި ފާހަގަކުރެއްވި އެވެ.
އެގޮތުން ނޫސްސްވެރިން ދޮގު މައުލޫމާތު ފަތުރައި، އަނެކުންގެ އަބުރަށް އަރައިގަތުން ފަދަ ކަންކަން ކުރުމަކީ އެއްވެސް މުޖުތަމައެއް ބަލައިގަންނާނެ ކަމެއް ނޫން ކަމަށް ވިދާޅުވި އެވެ.
އެއާއެކު ރައީސް ވަނީ ކޮވިޑުގެ ބަލިމަޑުކަމާ މެދު އާންމުން ހޭލުންތެރި ކުރުވުމަށް ނޫސްވެރިން ކުރި މަސައްކަތް ފާހަގަ ކުރައްވައިފަ އެވެ. އެފަދަ އިތުރު ކަންކަމުގައިވެސް ނޫސްވެރިންގެ ފަރާތުން އެހީތެރިކަން ލިބިގެން ދާނެ ކަމަށް އުންމީދު ކުރައްވާ ކަމަށްވެސް އެމަނިކުފާނު ވިދާޅުުވި އެވެ.
އޭގެ އިތުރުން، ރައީސް ވަނީ ކުރިއަށް އޮތް ތަނުގައިވެސް ހަބަރާއި މައުލޫމާތު ފެތުރުމުގެ ފުރިހަމަ މިނިވަންކަމާއި މައުލޫމާތު ހޯދައި ލިބިގަތުމުގެ ހައްގު ފުރިހަމައަށް ދެއްވާނެ ކަމުގެ ޔަގީންކަން ދެއްވާފަ އެވެ.
