ތ. ދިޔަމިގިލީ މިސްކިތުގައި ވަގުތީ މުދިމެއްގެ ވަޒީފާގައި ހުރި އަހުމަަދު މުހައްމަދު ރަޝީދަށް ގަޔަށް ވަޅި ހަރައި ޒަހަމްކޮށްލި މައްސަލައިގެ ތަހުގީގު ނިންމައި، ތުހުމަތު ކުރާ ފަރާތަށް ދައުވާ ކޮށްދޭން އެދި ޕްރޮސެކިއުޓާ ޖެނެރަލްގެ އޮފީހަށް ފޮނުވައިފި އެވެ.
މިދިޔަ މަހުގެ 13 ވަނަ ދުވަހު އެ ރަށު މަސްޖިދުލް އަމާނާތުގެ ވަގުތީ މުދިމު ރަޝީދު 55، އަށް ވަޅިން ހަމަލާދިން ކަމުގެ ތުހުމަތުގައި ޝަރީއަތް ނިމެންދެން ބަންދުކޮށްފައި ހުރި ހަސަން ސޯމިދަށް ދައުވާ ކޮށްދޭން ފޮނުވި ކަން ފުލުހުން ވަނީ މި ނޫހަށް ކަށަވަރު ކޮށްދެއްވައިފަ އެވެ. އިތުރު ތަފްސީލެއް ނުދެ އެވެ.
ރަޝީދަށް ލިބުނު އަނިޔާތައް ސީރިއަސްކަމުން އިތުރު ފަރުވާ ދިނީ މާލެ ގެނެސް އައިޖީއެމްއެޗްގަ އެވެ. ޑޮކްޓަރުންނާ ހަވަލާދީ އޭނާގެ އާއިލާއިން ބުނާ ގޮތުގައި ހަށިގަނޑަށް 13 ފަހަރު ވަޅި ޖަހާފައިވެ އެވެ. އޭގެ ތެރޭގައި ބޮލާއި ކަރާއި ކޮނޑުމައްޗާއި ބުރަކަށި ވެސް ހިމެނެ އެވެ.
ދިޔަމިގިލި މީހުން ކިޔައިދިން ވާހަކަތަކުން އެނގޭ ގޮތުގައި، ސޯމިދު، 35، އަކީ، ދިރިއުޅުމުގަ އަދި މީހުންނާ މުއާމަލާތްކޮށް، އެކީ އުޅުމުގައި އައިބު ގޮތެއް ހުންނަ މީހެއް ކަމެވެ. ސޯމިދަކީ ރުޅި ގަދަ މީހެއް ގޮތުގައި ގިނަ ބަޔަކު ސިފަކުރި އެވެ. މައްސަލަ ޖެހިގެން އަނބިމީހާއާއި ދެ ދަރިން ވެސް ވަކިން ލ. އަތޮޅުގައި ދިރިއުޅޭތާ މިހާރު އަހަރުތަކެއް ވެއްޖެ އެވެ.
ސޯޝަލް މީޑިއާގައި އެ ދުވަހު ހަމަލާދޭ މަންޒަރު ފެންނަ ވީޑިއޯއެއް ވެސް އާންމުވި އެވެ. އޭގައި ފެންނަ ގޮތުން، ހަމަލާ ދެނީ މަގުމަތީގައި ދެ މީހުން ވާހަކަ ދައްކަން ތިބެފަ އެވެ. މުދިމު އިންނަނީ ބައިސްކަލެއްގެ މަތީގައި މަޑުކޮށްލައިގެން ވާހަކަ ދައްކާށެވެ. އެއަށް ފަހު ކުއްލިއަކަށް ފެންނަނީ މުދިމުގެ ކަނދުރާމަތިން ބުރަކަށްޓަށް ފަސް ވަރަކަށް ފަހަރު ވަޅި ޖެހުމަށް ފަހު ދާން އުޅެފައި އަނެއްކާ ވެސް އަނބުރާލާފައި ގޮސް ކައިރިވެ މޭ މައްޗަށް ވަޅި ޖަހަން އުޅެނިކޮށެވެ.
