މައިލޯ އެފްއޭއެމް ވެޓެރަންސް ލީގު 2022 ގައި މިއަދު ކުޅުނު މެޗުގައި ދަ ގްރާންޑޭ ސްޕޯޓްސް ކްލަބް އިން ފަހު ވަގުތު ގޯލު ޖަހައި 1-1 އިން ކްލަބް އީގަލްސްއާ އެއްވަރުކޮށްފި އެވެ.
ފައިނަލަށް ދިއުމުގެ އުންމީދު ބޮޑުކުރަން ބަލާއިރު، މިއަދުގެ މެޗަކީ ދަ ގްރާންޑޭ އަށް ތިން ޕޮއިންޓް ހޯދުން މުހިންމު މެޗެކެވެ. އެކަމަކު، އެ ޓީމު ސަލާމަތްވީ ކިރިޔާ އެވެ. ލީގުގެ އެންމެ މަތިން ނިންމާ ދެ ޓީމަކަށް ފައިނަލުގެ ޖާގަ ލިބޭއިރު، މި ވަގުތު ދަ ގްރާންޑޭ އޮތީ ދެ ވަނައިގަ އެވެ.
ލީގު ބުރުގެ އެއް ވަނައިގައި އޮތް ހުޅުމާލެ ވެޓެރަންސް ކްލަބަށް ފަސް މެޗުން ވަނީ 13 ޕޮއިންޓް ލިބިފަ އެވެ. އެ ޓީމަށް ވަނީ ބާކީ އެއް މެޗު އޮއްވައި ފައިނަލުގެ ޖާގަ ޔަގީންވެފަ އެވެ. ދެ ވަނަ މަގާމުގައި މި ވަގުތު އޮތް، ދަ ގްރާންޑޭ އަށް ފަސް މެޗުން ވަނީ 10 ޕޮއިންޓް ލިބިފަ އެވެ. ފައިނަލުގެ ޖާގަ އަކަށް ދެން ވާދަކުރާ މޯލްޑިވްސް ސޮކަ މޭޓްސް އަށް ހަތަރު މެޗުން ލިބިފައިވަނީ އަށް ޕޮއިންޓެވެ.
ޓާފް އެއް ނަމްބަރު ދަނޑުގައި މިއަދު ކުޅުނު މެޗުގެ ދެ ގޯލު ވެސް ފެނުނީ މެޗުގެ ފަހު ވަގުތުގަ އެވެ. މެޗުގައި ފުރަތަމަ ގޯލު ޖެހީ އީގަލްސް އެވެ. މެޗަކަށް ފަހު މެޗެއް ކުޅުން ރަނގަޅު ކުރަމުން އަންނަ އީގަލްސް އިން ލީޑުނެގީ 50 ވަނަ މިނިޓްގައި އިބްރާހިމް އާރިފް ޖެހި ގޯލުންނެވެ. މިއީ އީގަލްސްގެ ކެޕްޓަން، އަހުމަދު ޝަރީފް ދަ ގްރާންޑޭގެ ކީޕަރު، ލުއައްޔު އާދަމް ކައިރިން ނައްޓާފައި، ގޯލު ކުރި މައްޗަށް ހުރަސްކޮށްލި ބޯޅައަކުން އާރިފް ޖެހި ގޯލެކެވެ.
މުޅި މެޗަށް ބަލާއިރު، ވެސް ދަ ގްރާންޑޭ އިން ގޯލެއް ޖެހޭތޯ ގިނަ މަސައްކަތް ކުރި އެވެ. އެ ޓީމަށް ޕޮއިންޓެއް ހޯދުނީ މެޗުގެ ފަހު މިނިޓްގައި ޓީމުގެ ކެޕްޓަން އަހުމަދު ޝަކީބް ޖެހި ގޯލުންނެވެ. މިއީ، ދަ ގްރާންޑޭގެ ޝުއައިބް ޒާހިރު އަރިމަތިން ނެގި ހުރަހަކުން ޝަކީބް ބޮލުން ޖެހި ގޯލެކެވެ.
މި މެޗުން މޮޅުނުވެވުމުން ދަ ގްރާންޑޭ އަށް ފައިނަލުގެ ޖާގައެއް ހޯދޭނީ އެ ޓީމަށް އެންމެ ފަހުން އޮތް މެޗުން ސޮކަ މޭޓްސް ކައިރިން ނަތީޖާ ނެރެގެންނެވެ. ސޮކަ މޭޓްސް އަށް ދަ ގްރާންޑޭ މެޗުގެ އިތުރުން އީގަލްސް މެޗު އެބައޮތެވެ.
މި ފަހަރުގެ ވެޓްރަންސް މުބާރާތް މި ކުރިއަށްދަނީ ތިން އަހަރުގެ މެދުކެނޑުމަކަށް ފަހު އެވެ. އެންމެ ފަހުން މި މުބާރާތް ބޭއްވީ 2019 ވަނަ އަހަރު އެވެ. އެ ފަހަރު ތަށި އުފުލާލި މާޒިޔާ ސްޕޯޓްސް އެންޑް ރެކްރިއޭޝަން މި ފަހަރުގެ މުބާރާތުގައި ވާދަނުކުރެ އެވެ. މި ފަހަރުގެ މުބާރާތް އިންތިޒާމްކުރަނީ ކްލަބް އިވެންޓްސް އިންނެވެ. ޓައިޓަލް ސްޕޮންސަރަކީ މައިލޯ އެވެ. ޕާޓްނަރުންގެ ގޮތުގައި ދިރާގު، އެއްކާފު، ސްޕޯޓްސް އަދި އަދަދު ހަރަކާތްތެރިވެ އެވެ.
މުބާރާތުގައި މާދަމާ ހަވީރު ކުޅޭ މެޗުގައި ބައްދަލުކުރާނީ ސިފައިންނާއި ޕޮލިސް ކްލަބް އެވެ. މެޗު ފަށާނީ 16:30 ގަ އެވެ.
