ރާއްޖޭގައި ތިބި ކަމަށް ބުނާ އިންޑިއާގެ ހަތިޔާރުއެޅި ސިފައިން ބާލަން ގޮވާލާ އިދިކޮޅުން ފަށާފައިވާ އިންޑިއާ އައުޓް ހަަރަކާތުގެ ދަށުން ބޭނުންކުރާ "އިންޑިއާ އައުޓް" ސްލޯގަން ޖަހާފައިވާ ބެނޭތައް ނަގަން ގޭގޭގެ ވެރިންނަށް ފުލުހުން އަންގަން ފަށައިފި އެވެ.
ސޯޝަލް މީޑިއާގައި ދައުރުވަމުންދާ ސިޓީއެއްގައިވާ ގޮތުގައި ފުލުހުން ބުނީ މި ބެނާތަކުން ސިފަވަނީ ވަކި ގައުމަކަށް ނިސްބަތްކޮށް ހިންގޭ، އެ ގައުމުގެ ގަދަރާއި ކަރާމާތަށް އުނިކަން ލިބޭފަދަ އަމަލެއްގެ ގޮތުގައި ކަމަށެވެ. އަދި، މީގެ ސަބަބުން އެ ގައުމަކާ ދޭތެރޭ އޮތް ހާރިޖީ އަދި ސަގާފީ ގުޅުމަށް ބުރޫއެރުމުގެ އިތުރުން އެ ގައުމުތަކުގައި ދިރިއުޅޭ އަދި ޒިޔާރަތްކުރާ ދިވެހިންގެ މަސްލަހަތައް ގެއްލުންވެދާނެ ކަމެއް ކަމަށް ސިޓީގައި ފުލުހުން ބުންޏެވެ.
"ބެނާގައި އާއްމުކޮށް ފެންނާނެހެން "އިންޑިޔާ އައުޓް" ޖަހާފައި ދަމާފައި ހުރުމަކީ ވަކި ގައުމަކަށް ނިސްބަތްކޮށް ހިންގޭ، އެ ގައުމުގެ ގަދަރާއި ކަރާމާތަށް އުނިކަން ލިބޭފަދަ އަމަލެއްގެ ގޮތުގައި ސިފަވުމާއި، ބައިނަލްއަގުވާމީ ގުޅުންތަކާއި އަވަށްޓެރި ޤައުމުތަކާއި ދިވެހިރާއްޖެއާއި ދެމެދު އޮންނަ ހާރިޖީ އަދި ސަގާފީ ގުޅުންތަކަށް ނުރަގަޅު އަސަރުކޮށް އޭގެ ސަބަބުން އެ ގައުމުތަކުގަ ދިރިއުޅޭ އަދި ޒިޔާރަތްކުރާ ދިވެހީންގެ މަސްލަހަތަށް ވެސް ގެއްލުންވެދާނެކަމެ ދިވެހި ފުލުހުންގެ ހިދުމަތުން ދެކެމެވެ." ފުލުހުން ފޮނުވި ސިޓީގައި ބުންޏެވެ.
ބެނާތައް ނަގަން އެންގި ސަބަބެއްގެ ގޮތުގައި ސިޓީގައި ފުލުހުން ފާހަގަކޮށްފައިވަނީ މިފަދަ އަމަލުތަކަކީ އޭގެ ވަށައިގެންވާ އަމަލުތަކުގެ ސަބަބުން ރާއްޖެ އާއި ދިވެހިންގެ މަސްލަހަަތަށް ސީދާ ގޮތުންނާއި ނުސީދާ ގޮތުން ގެއްލުންވާނެ ފިތުނަވެރި އަމަލަކަށްވުމެވެ.
އިންޑިއާ އައުޓް ބެނާތައް ނަގަން ފުލުހުން އަންގަމުން ދަނީ ގާނޫނުލްއުގޫބާތުގެ 615 ވަނަ މާއްދާ (ހ) ގައި 6 ގައި ބަޔާންކޮށްފައިވާ ޖާއިޒު މަގުސަދެއް ހާސިލު ނުވާނެ އަމަލަކުން ނުރައްކާތެރި، ނުވަތަ މާއްދީ ގޮތުން ހުތުރު، ނުވަތަ މީހުން ބިރުގަންނާނެ ފަދަ ހާލަތެއް އުފެދިދާނެފަދަ އަމަލެއްކަމުގައި ބެލެވޭތީ، ފުލުހުންގެ ހިދުމަތުގެ ގާނޫޏުގެ ދަށުން ލިބޭ އާންމު މަސްލަހަތު ރައްކާތެރިކުރަން ޖެހޭ ކަންކަން ކުރަން ލިބިފައިވާ ބާރާއި އެކަންކަން ކުރުން ހުއްޓުވަން ފިޔަވަޅު އަޅަން ލިބޭ ބާރުގެ ތެރެއިންނެެވެ.
މިކަމާ ގުޅިގެން ފުލުހުންގެ މީޑިއާ ނަމްބަރަަށް ގުޅުމުން ޖަވާބު ނުދޭތީ އެ މުއައްސަސާގެ ބަހެއް ނުލިބެ އެވެ.
މިފަދަ ބެނޭތައް ނަގަން ފުލުހުން އަންގާ ސިޓީއެއް އާންމުވެފައި މިވަނީ، އިންޑިއާ އައުޓް ހަރަކާތް މިހާރު ލީޑުކުރައްވާ ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ގެކޮޅުގެ ބޭރުގައި ހުރި ބޮޑު "އިންޑިއާ އައުޓް" ބެނާ ނަގަން މިއަދުގެ ރައްޔިތުންގެ މަޖިލިހުގެ ޖަލްސާގައި އެ މަޖިލީހުގެ ރައީސް މުހައްމަދު ނަޝީދު ވިދާޅުވެފައި ވަނިކޮށެވެ.
ރައީސް ނަޝީދު ވެސް މި ބެނާތައް ނަގަން ފުލުހުންނަށް ގޮވާލެއްވީ އަވައްޓެރި ގައުމުތަކާ ގުޅޭގޮތުން ބަދު ބަސް ބުނެ ބެނާތައް ދަމާފައި ހުރުމަކީ ގާނޫނުލްއުގޫބާތާ އާންމު މަސްލަހަތާ ހިލާފުކަމެއް ކަމަށް ފާހަގަކުރައްވަމުންނެވެ.
