މިދިޔަ މާޗު މަހު އިދިކޮޅުން މާލޭގައި ކުރި މުޒާހަރާއާ ގުޅިގެން ރައްޔިތުންގެ މަޖިލީހުގެ މާވަށު ދާއިރާގެ މެމްބަރު އަދި މުހައްމަދު ސައީދަށާއި ގުރައިދޫ ދާއިރާގެ މެމްބަރު ގައްސާން މައުމޫންއާ ދެކޮޅަށް މާލޭގެ މަގުތައް ބްލޮކްކޮށް އާންމުންގެ ހިތުގައި ބިރުވެރިކަން އުފައްދަން މަސައްކަތްކޮށް، ފުލުހުންގެ ވާޖިބަށް ހުރަސް އަޅައި، އަނިޔާކުރަން އުޅުން އަދި ކުށެއް ކުރަން އުޅުނުކަމުގެ ތުހުމަތުތައް ފުލުހުން ކުރާކަމަށް އިދިކޮޅު ކޯލިޝަނުން ބުނެފި އެވެ.
އިދިކޮޅު ކޯލިޝަނުގެ ވަކީލު މުހައްމަދު ރާގިބު މި ނޫހަށް ވިދާޅުވީ، މިދިޔަ މަހުގެ 25 ވަނަ ދުވަހު އިދިކޮޅުން މާލޭގައި ބޭއްވި "ނޭވާ ހޮޅިއަށް" މުޒާހަރާއާ ގުޅިގެން ކުރާ އެ ތުހުމަތުތަކާ ގުޅިގެން އިދިކޮޅު ޕީއެންސީގެ ނައިބު ރައީސް ސައީދާއި ޕީޕީއެމްގެ ނައިބު ރައީސްކަން ކުރައްވާ ގައްސާން ރޭ ފުލުހަށް ހާޒިރުކޮށް ސުވާލުކޮށްފައިވާ ކަމަށެވެ.
"އެބޭފުޅުންގެ މައްޗަށް ކުރާކަމަށް އޮންނަނީ ކުށެއް ކުރަން އުޅުން، ތަޅާ އަނިޔާކުރަން އުޅުން، ދެން މަގުތައް ބްލޮކްކޮށް އާންމުންގެ ހިތުގައި ބިރުވެރިކަން އުފެދޭފަދަ ގޮތަކަށް އަމަލުކުރުން، ދެން ފުލުހެއްގެ ވާޖިބަށް ހުރަސްއެޅުން، މި ތުހުމަތުތައް. އެކަމަކު އެ ތުހުމަތުތަކުގައި ގާނޫނީ އިންޒާރު ދިނުމުގައި ފުރިހަމަވާންޖެހޭ ކަންކަން ފުރިހަމަ ނުވާތީވެ، އަޅުގަނޑުމެންނަށް ފަހުމެއް ނުވޭ،" ރާގިބު ވިދާޅުވި އެވެ.
އޭނާ ވިދާޅުވީ އެ ދުވަހުގެ މުޒާހަރާއާ ގުޅިގެން ގައްސާން އާއި ސައީދު، ޕީޕީއެމް އޮފީސް ހުންނަ ސަރަހައްދު ފުލުހުން ބަންދުކޮށްފައި ހުރުމުން، އެތަނަށް ވަނީ ފުލުހުންގެ ހުއްދައާ އެކުގައި ކަމަށެވެ. އަދި އެތަނުން ނިކުމެގެން އައީ އޭގެ ފަހުން ކަމަށެވެ.
ނަމަވެސް ފުލުހުން ކުރާ ތުހުމަތުތަކުގައި ބަންދުކޮށްފައި ހުރި ސަރަހައްދަކަށް އެބޭފުޅުން "ވަންކަމަށް އޮތުން އެއީ ހަމަނުޖެހޭ ތުހުމަތެއް" ކަމަށް އޭނާ ވިދާޅުވި އެވެ. ފުލުހުން ދެން ކުރި ތުހުމަތަކީ މަގުތައް ބްލޮކް ކުރުން ކަމަށާއި އެއީ ވެސް ހަމަ އެފަދަ ތުހުމަތެއްކަމަށް ރާގިބު ވިދާޅުވި އެވެ.
"އެއީ ފުލުހުން އެތަން ބެރިކޭޑް ޖަހައިގެން ބަންދުކުރީ. އެ ދެ ބޭފުޅުންގެ ފުޅާމިނުގައި ނުހުންނާނެ ތިން ފޫޓު ވެސް. ކިހިނެތްތޯ ހަތަރު ލޭނަށް ދުއްވާ ބޮޑު މަގު އެ ދެ ބޭފުޅުން ބްލޮކް ކުރާނީ. އެކަމުގެ ޝަކުވާއެއް ޓެކްސީ ސެންޓަރެއް ކަހަލަ ތަނަކުން ލިބުނުކަމެއް ވެސް ފުލުހުންނަށް ބުނެއެއް ނުދެވުނު، އަދި އެ ވިދާޅުވަނީ ބައިވަރު މަގު ބްލޮކް ކުރިއޭ،" ރާގިބު ވިދާޅުވި އެވެ.
ރާގިބު ވިދާޅުވީ ފުލުހުން ގައްސާނާއި ސައީދުގެ ހައްގަށް ހުރަސް އެޅި ކަމަށެވެ. އެއީ ގާނޫނުއަސާސީން ލިބިދީފައި އޮންނަ އެއްވެއުޅުމުގެ މިނިވަންކަމަށް ފުލުހުން ހުރަސްއެޅުމުން ކަމަށް ރާގިބު ވިދާޅުވި އެވެ. އަދި ރާގިބު އިތުރަށް ވިދާޅުވީ ފުލުހުން ކުރާ ތަހުގީގަކަށް ފުލުހުންގެ ހެކިބަސް ނަގައިގެން އަދުލުވެރި ގޮތެއްގައި ކަންކަން ކުރެވިދާނެތޯ ރާގިބު ސުވާލުއުފެއްދެވި އެވެ.
"އެބޭފުޅުން އެތަނުގައި އިށީނދެ ތިއްބާ ފުލުހުން އައިސް އެބޭފުޅުން ގެންދެވީ. ދެން ކޮބާތޯ ވާޖިބަށް ހުރަސް އަޅާފަ. އެހެންވީމާ މިއީ ތަސައްރަފު ފުދޭ ބަޔަކު ކުރާ ކަންކަމެއް ނޫން މިއީ. މިއީ ހަމަ އިންޑިއާ އައުޓް ހަރަކާތް ހުއްޓުވަން ކުރާ ކަންކަން،" ރާގިބު ވިދާޅުވި އެވެ.
ރާގިބު ވަނީ އެ މައްސަލައިގައި ގައްސާނާއި ސައީދާ ދެކޮޅަށް ކުރާ ތުހުމަތުތަކަށް ދައުވާކުރާނެ މިންވަރަށް އެކަށީގެންވާ ހެކި ހުންނާނެކަމާމެދު ވެސް ސުވާލުއުފައްދަވާފަ އެވެ.
