ރައްޔިތުންގެ މަޖިލިހުގެ މާވަށު ދާއިރާގެ ޕީއެންސީ މެމްބަރު މުހައްމަދު ސައީދާއި ތ.ގުރައިދޫ ދާއިރާގެ ޕީޕީއެމް މެމްބަރު މުހައްމަދު ޣައްސާން މައުމޫނު މިރޭ ފުލުހުންގެ އިދާރާއަށް ހާޒިރުވާން އަންގައިފި އެވެ.
މާވަށު ދާއިރާގެ މެމްބަރު މުހައްމަދު ސައީދު "އަދަދު"އަށް ވިދާޅުވި ގޮތުގައި ފުލުހުންގެ އިދާރާއިން ފޮނުވި ޗިޓްގައި އަންގާފައި އޮތީ މިރޭ 9:30 އަށް އެ އިދާރާއަށް ހާޒިރުވުމަށެވެ.
ސައީދާއި ޣައްސާން ފުލުހުންގެ އިދާރާއަށް ހާޒިރުކުރަނީ މާޗް 25 ގައި އިދިކޮޅު ޕީޕީއެމްޕީއެންސީން މާލޭގައި ބޭއްވި މުޒާހަރާއާ ގުޅުވައި އެ ދެބޭފުޅުންނަށް ކުރާ ތުހުމަތެއްގެ ތަހުގީގަށެވެ. ރާއްޖޭގައި އިންޑިއާ ސިފައިން ތިބުމާ ދެކޮޅަށް ކުރި އެ މުޒާހަރާގެ ތެރެއިން ސައީދާއި ޣައްސާން ހައްޔަރުކުރީ ފުލުހުންގެ އަމުރަށް ނުކިޔަމަންތެރިވެ، ވާޖިބަށް ހުރަސް އެެޅިކަމުގެ ތުހުމަތަށެވެ.
އޭރު ހައްޔަރުކުރުމަށް ފަހު އެ ދެމެމްބަރުންގެ ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން އެކޯޓުން ނިންމީ ޝަރުތުތަކަކާ އެކު ދޫކޮށްލުމަށެވެ.
އިދިކޮޅުގެ މުޒާހަރާއާ ގުޅުވައި ތުހުމަތެއް ކޮށް ތަހުގީގެއް ހިންގާތީ، ސައީދު އެކަން ސިފަކުރެއްވީ އެއީ ހިޔާލުފާޅުކުރުުމުގެ މިނިވަންކަމަށް ހުރަސް އެޅުން ކަމަށެވެ. އޭނާ ވިދާޅުވީ ސަރުކާރުން ބައިނަލް އަގުވާމީ މުޖުތަމައުގައި ދައްކާ ވާހަކަޔާއި އަމަލުކުރާ ގޮތާ އެއްގޮތަކަށް ވެސް ދިމާނުވާ ކަމަށެވެ.
"ސަރުކާރުން ހިންގާ އެއްވެސް މުޑުދާރު އަމަލެއްގެ ވާހަކަ މީހަކު ދެއްކިޔަސް އެމީހަކަށް ހުރަސްއަޅައި ބިރު ދައްކައި އެމީހެއްގެ ދުވަސް ދުއްވާލަން އުޅެނީ. އެއީ އަމިއްލަ ޕާޓީ މީހެއް ކަމަށް ވިޔަސް، އިދިކޮޅު ފަރާތެއްކަމަށް ވިޔަސް،" ސައީދު ވިދާޅުވި އެވެ.
އިންޑިއާ ސިފައިން ރާއްޖޭގައި ތިބި ވާހަކަ ދައްކައިފިއްޔާ އެއީ ވެސް ބޮޑުކުށަކަށް ހަދާ ކަމަށް ވެސް އޭނާ ވިދާޅުވި އެވެ.
