އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މެޗުގައި ދަ ގްރާންޑޭ ސްޕޯޓްސް ކްލަބް 5-0 އިން ބަލިކޮށް ހުޅުމާލެ ވެޓެރަންސް ކްލަބުން މުބާރާތުގެ ފައިނަލު އުންމީދު ބޮޑުކޮށްފި އެވެ.
މިއަދުގެ މެޗަށް ނުކުތްއިރު، ދަ ގްރާންޑޭ އާއި ހުޅުމާލެ ވެޓެރަންސް އޮތީ ފުރަތަމަ ކުޅުނު ތިން މެޗުން މޮޅުވެފަ އެވެ. ހުޅުމާލެ ވެޓެރަންސް އިން މޮޅުވުމުގެ ރެކޯޑް ދެމެހެއްޓިއިރު، އެ ޓީމު އެއް ވަަނައިގައި އޮތީ 12 ޕޮއިންޓާ އެކު އެވެ. ދެ ވަނައިގައި އޮތް ދަ ގްރާންޑޭ އަށް ހަތަރު މެޗުން ލިބިފައިވަނީ ނުވަ ޕޮއިންޓެވެ. ތިން ވަނައިގައި އޮތް މޯލްޑިވްސް ސޮކަ މޭޓްސް އަށް ވަނީ ތިން މެޗުން ހަތް ޕޮއިންޓް ލިބިފަ އެވެ.
އަންގާރަ ދުވަހު ސޮކަ މޭޓްސްއާ ކުޅޭ މެޗުން މޮޅުވެއްޖެނަމަ ހުޅުމާލެ އަށް ފައިނަލުގެ ޖާގަ ލިބޭނެ އެވެ. ހުޅުމާލެ ވެޓެރަންސް ލީގު ބުުރުގެ ފަހު މެޗުގައި ކުޅޭނީ ސިފައިންގެ ކްލަބާ އެވެ.
ޓާފް އެއް ނަމްބަރު ދަނޑުގައި މިއަދު ހަވީރު ކުޅުނު މެޗުގައި ހުޅުމާލެ ވެޓެރަންސް އިން ވަނީ ފުރަތަމަ 10 މިނިޓް ތެރޭގައި ދެ ގޯލުގެ ލީޑެއް ނަގައިފަ އެވެ. އެ ގޮތުން މެޗުގެ ހަތް ވަނަ މިނިޓްގައި ހުޅުމާލެ ވެޓެރަންސް ޓީމުގެ އަބްދުﷲ ސުޖާއު (ސުޖާ) ގޯލު ކުރިމައްޗަށް ހުރަސްކޮށްލި ބޯޅަ އެ ޓީމުގެ ކެޕްޓަން އިސްމާއިލް މުހައްމަދު (އިއްސެ) ވަނީ ގޯލުގެ ތެރެއަށް ފޮނުވާލައިފަ އެވެ. އޭގެ ތިން މިނިޓް ފަހުން މަތިން ހުރަސްވި ބޯޅައެއް ކޮންޓްރޯލްކޮށްލުމަށް ފަހު އިއްސެ ވަނީ ގޯލުގެ ދުރު ކަނަށް ފޮނުވާލައިގެން ހުޅުމާލެ ވެޓެރަންސް ޓީމަށް ލީޑުފުޅާކޮށްދީފަ އެވެ.
ފުރަތަމަ ހާފުގައި ދަ ގްރާންޑޭގެ ހަސަން ޝަރީފް އޭރިއާބޭރުން ޖެހި ބޯޅައެއް ހުޅުމާލެ ވެޓެރަންސް ޓީމުގެ ކީޕަރު މުހައްމަދު ޝިނާން (ނާނި) ވަނީ މަތަކޮށްފަ އެވެ.
ހުޅުމާލެ ވެޓެރަންސް އިން ވަނީ ފުރަތަަމަ ހާފު ނިމުމުގެ ކުރިން ތިން ވަނަ ގޯލެއް ޖަހައިފަ އެވެ. ދަ ގްރާންޑޭގެ އޮފްސައިޑް މަޅިން ސަލާމަތްވެ، މި ގޯލު ޖެހީ ހުޅުމާލެ ވެޓެރަންސް ޓީމުގެ އަހުމަދު ޝާހިދު އެވެ. އޭނާ އަށް ހުސްކޮށް ލިބުނު ބޯޅަ ވަނީ ތިރިތިރިން ގޯލުގެ ކަނަށް ފޮނުވާލައިފަ އެވެ.
ދެ ވަނަ ހާފްގައި ދަ ގްރާންޑޭ އިން ކުޅުން ރަނގަޅުކުރި އެވެ. އެކަމަކު، ގޯލެއް ޖެހޭ ވަރުގެ ހަމަލާތަކެއް ފޮނުވާނުލެވުނެވެ. ހުޅުމާލެ ވެޓެރަންސް އިން ވަނީ މި ހާފުގައި ދެ ގޯލު ޖަހައިފަ އެވެ. އެ ގޮތުން އެ ޓީމުގެ ހަތަރު ވަނަ ގޯލު ޖަހައި، އިއްސެ ވަނީ އޭނާގެ ހެޓްރިކް ފުރިހަމަކޮށްދީފަ އެވެ. އޭގެ ކުރިން އިއްސެ އަށް ގޯލެއް ޖަހަން ލިބުނު ފުރުސަތުގެ ބޭނުން ނުހިފުނެވެ. ހުޅުމާލެ ވެޓެރަންސް ޓީމުގެ ފަސް ވަނަ ގޯލު ޖެހީ ބަދަލަކަށް ކުޅެންއެރި އިބްރާހިމް މުހައްމަދު އެވެ. ކޯނަރަކުން ހުރަސްވި ބޯޅަ އިބްރާހިމް ވަނީ ބޮލުން ގޯލަށް ވައްދާލައިފަ އެވެ.
މި ފަހަރުގެ ވެޓެރަންސް ކަޕް އިންތިޒާމްކުރަނީ އެފްއޭއެމާ ގުޅިގެން ކްލަބް އިވެންޓްސް އިންނެވެ. ޓައިޓަލް ސްޕޮންސަރަކީ މައިލޯ އެވެ. މުބާރާތުގައި މާދަމާ އޮތީ ޕޮލިސް ކްލަބާއި ކްލަބް އީގަލްސް ކުޅޭ މެޗެވެ. އެ މެޗު ފަށާނީ ހަވީރު 16:30 ގަ އެވެ.
