އިނގިރޭސިވިލާތުގެ ވެރިރަށް ލަންޑަނުގައި މިހާރު ކުރިއަށްދާ 9 ބޯލް ވޯލްޑް ޗެމްޕިއަންޝިޕްގައި ރާއްޖޭގެ ގައުމީ ބިލިއާޑް ޓީމުގެ ހަސަން ޝާޒް މުހައްމަދު (ޝާޒު) އާއި މުހައްމަދު ޝަރީފް (ޝަރީ) ވާދަކުރި މެޗުތަކުން ނިސްބަތުން ރަނގަޅު ވާދައެއްކޮށްފި އެވެ.
މި މަހުގެ ހަ ވަނަ ދުވަހުން ފެށިގެން މާދަމާގެ ނިޔަލަށް ކުރިއަށްދާ 9 ބޯލް ވޯލްޑް ޗެމްޕިއަންޝިޕްގައި ދުނިޔޭގެ އެކި ގައުމުތަކުން 128 ކުޅުންތެރިން ވާދަކުރެ އެވެ. ޑަބަލް އެލިމިނޭޝަން އުސޫލުން ކުރިއަށްދާ މުބާރާތުން ކުޅުންތެރިއަކު ކަޓާނީ ދެ މެޗުން ބަލިވެގެންނެވެ.
ދިވެހި ރާއްޖޭގެ ރޭންކިންގެ އެއް ވަނައިގައި ޝާޒު ފުރަތަމަ މެޗުގައި ނުކުތީ މުބާރާތުގައި 15 ވަނަ އަށް ސީޑުކޮށްފައިވާ ހަންގޭރީގެ ޗެމްޕިއަން އޮލިވާ ޒޮލްނޮކީއާ ދެކޮޅަށެވެ. މި މެޗުން ޝާޒް ބަލިވީ އެއްވެސް ފްރޭމެއް ނުލިބި 9-0 އިންނެވެ. ދެ ވަނަ މެޗުގައި ޝާޒު ރަނގަޅު ކުޅުމެއް ދެއްކި އެވެ. ދެ ވަނަ މެޗުގައި ވިއެޓްނާމްގެ ކުއޮކް ހޮއަން ޑުއޮން އާ ވާދަކޮށް ޝާޒު ބަލިވީ ހަތަރު ފްރޭމް ނުވަ ފްރޭމުންނެވެ.
ރާއްޖެ އިން ދެން ވާދަކުރި ޝަރީ ދެ މެޗުގައިވެސް ވާދަވެރި ކުޅުމެއް ދެއްކި އެވެ. މުބާރާތުގެ 38 ވަނަ ސީޑު އެމެރިކާގެ ހަންޓާ ލޮމްބާޑޯ އާ ވާދަކޮށް ޝަރީ ބަލިވީ 6-9 ފްރޭމުންނެވެ. ދެ ވަނަ މެޗުގައި ޝަރީ ނުކުތީ އެމެރިކާގެ މޭސަން ކޮޗް އާ ދެކޮޅަށެވެ. މި މެޗުން ވެސް ޝަރީ ބަލިވީ ރަނގަޅު ވާދަކަށްފަހު 6-9 ފްރޭމުންނެވެ.
މުބާރާތުގައި މިހާތަނަށް ނުކުތް ނަތީޖާތަކަށް ބަލާއިރު، ކުރިން ދުނިޔޭގެ ޗެމްޕިއަންކަން ހޯދާފައިވާ ބައެއް ކުޅުންތެރިންނާއި ކުރީގެ ފައިނަލިސްޓުން ވަނީ ކަޓައިފަ އެވެ. މި ވަގުތު ދައްކަމުން އަންނަ ކުޅުމަށް ބަލާއިރު އެންމެ ފަހުގެ ޗެމްޕިއަން އަލްބިން އޫޝާން އަންނަނީ ރަނގަޅު ކުޅުމެއް ދައްކަމުންނެވެ.
ޑަބަލް އެލިމިނޭޝަން އުސޫލުން ކުރިއަށްދާ މުބާރާތުގެ ފުރަތަމަ ބުރުގެ މެޗުތައް ކުޅޭނީ "ރޭސް-ޓު-9" އަށެވެ. 64 ކުޅުންތެރިން ކެޓުމުން ދެން ކުޅޭ ހުރިހާ މެޗެއްވެސް ކުޅޭނީ ފުރަތަމަ 11 ފްރޭމް ހޯދާ ކުޅުންތެރިއެއް މޮޅުވާ ފޯމެޓަށެވެ. އޭގެ ފަހުން ފައިނަލް މެޗު ކުޅޭނީ "ރޭސް-ޓު-13" ފްރޭމަށެވެ.
މި މުބާރާތުގެ އެއް ވަނަ ހޯދާ ކުޅުންތެރިއަކަށް 60،000 ޑޮލަރުގެ ފައިސާގެ އިނާމެއް ލިބެ އެވެ.
