މައިލޯ އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މެޗުގައި މުބާރާތަށް ވަރުގަދަ ސްކޮޑަކާ އެކު ނުކުތް މޯލްޑިވްސް ސޮކަ މޭޓްސް އިން 3-1 އިން ޕޮލިސް ކްލަބް ބަލިކޮށްފި އެވެ.
ޓާފް އެއް ނަމްބަރު ދަނޑުގައި މިއަދު ހަވީރު ކުޅުނު މެޗުގައި ސޮކަ މޭޓްސް އިން މެޗު ފަށައިގެން ދިޔައީ އެޓޭކް ކުރަމުންނެވެ. ސޮކަ މޭޓްސް އިން ލީޑުނެގީ 20 ވަނަ މިނިޓްގައި މުހުތާރް ނަސީރު (ޓޫކިލޯ) ޖެހި ގޯލުންނެވެ. ޓޫކިލޯ އަށް ހުސްކޮށް ލިބުނު ބޯޅަ ހިފައިގެން ގޮސް އޭނާ ވަނީ ޕޮލިހުގެ ކީޕަރު ކައިރިން ނައްޓާލުމަށް ފަހު ގޯލުގެ ތެރެއަށް ފޮނުވާލައިފަ އެވެ.
އޭގެ ފަސް މިނިޓް ފަހުން ސޮކަ މޭޓްސް އިން ލީޑުފުޅާކުރީ އަހުމަދު ނަސީމް (އައްމަޑޭ) ޖެހި ގޯލުންނެވެ. މިއީ ސޮކަ މޭޓްސްގެ އަހުމަދު ސައީދު (އައްމަޓީ) ނެގި ހިލޭ ޖެހުމަކުން އެ ޓީމުގެ މުހައްމަދު ފައިސަލް (ކަޓޭ) ބޮލުން ޖެހި ބޯޅަ ދަނޑީގައި ޖެހިފައި އައި ވަގުތު އައްމަޑޭ ބޮލުން ވައްދާލި ގޯލެކެވެ،
ސޮކަ މޭޓްސް ޓީމުގައި މަޝްހޫރު ގިނަ ކުޅުންތެރިން ހިމެނޭއިރު، އެ ޓީމުގެ ކެޕްޓަނަކީ 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ގައުމީ ޓީމުގެ ކެޕްޓަން އައްސަދު އަބްދުލް ގަނީ އެވެ. އައްސަދަކީ ވެޓެރަންސް މުބާރާތުގައި ވެސް ކާމިޔާބު ކުޅުންތެރިއެކެވެ. ފުރަތަމަ ހާފުގައި ޕޮލިހުން ފޮނުވާލި އެންމެ ރަނގަޅު ހަމަލާ އަކީ ހިލޭ ޖެހުމަކުން ނިޝާދު އަލީ ޖެހި ބޯޅަ އެވެ. ނިޝާދު، ފޮނުވާލި ހިލޭ ޖެހުން ދިޔައީ ދަނޑިކައިރިން ބޭރުންނެވެ.
ޕޮލިހުގެ ނިޝާދު (ކ) ކައިރިން ސޮކަ މޭޓްސްގެ މުހައްމަދު އިބްރާހިމް ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އަބްދުﷲ އިޔާން/ އަދަދު
ދެ ވަނަ ހާފް ފަށައިގެން ސޮކަ މޭޓްސް އަށް ތިން ވަނަ ގޯލެއް ޖަހައިދޭން އާދަމް ފަޒީހް (ފަޒިއްކޮ) އަށް ރަނގަޅު ފުރުސަތެއް ލިބުނު ނަމަވެސް ބޭނުމެއް ނުކުރެވުނެވެ.
މެޗުގެ 40 ވަނަ މިނިޓްގައި ޕޮލިހުގެ ގޯލު ޖެހީ ނަސްރުﷲ އެވެ. ސޮކަ މޭޓްސްގެ ކީޕަރު ހުސެއިން ހަބީބް ކައިރިން ނައްޓާފައި ނަސްރުﷲ ޖެހި ބޯޅަ ގޯލުގެ ރޮނގު ހުރަސް ކުރި ފަހުން ސޮކަ މޭޓްސްގެ އަޝްރަފު ލުތުފީ (ސަމްޕަތު) ބޭރުކޮށްލި އެވެ. ބޯޅަ ގޯލުގެ ރޮނގު ހުރަސްކުރިކަން ކަަށަވަރުވުމުން ރެފްރީ ނިންމީ ގޯލެއް ކަމަށެވެ.
ޕޮލިހުން ގޯލެއް ޖެހިތާ ފަސް މިނިޓް ފަހުން އޭރިއާތެރެއަށް ހިލޭ ޖެހުމަކުން ހުރަސްވި ބޯޅައެއް އިސްމާއިލް އަނިލް ވަނީ ގޯލުގެ ތެރެއަށް ފޮނުވާލައި، އަލުން ސޮކަ މޭޓްސް އަށް ދެ ގޯލުގެ ލީޑެއް ނަގައިދީފަ އެވެ.
ޕޮލިހަށް ދެ ވަނަ ގޯލެއް ޖަހައިދޭން ނަސްރުﷲ އަށް ކުޑަ އޭރިއާ ކައިރިން ލިބުނު ބޯޅަ ރަނގަޅަށް ފޮނުވާނުލެވުނުއިރު، ކީޕަރު ހަބީބް ވަނީ އެ ބޯޅަ އަތަށް ނަގައިފަ އެވެ. ޕޮލިހުގެ އަހުމަދު އަބްދުﷲ ހާފުގެ މެދެއްހާ ހިސާބުން ޖެހި ބޯޅައެއް ގޯލަށް ވަނުމުގެ ކުރިން ކީޕަރު ހަބީބް ވަނީ ސަލާމަތްކޮށްފަ އެވެ. ބޯޅަ ގޯލަށް ޖެހީ ހަބީބް ކުރިއަށް އަރައި ހުރި ވަގުތު ބަލައިފަ އެވެ.
ޕޮލިހުގެ އަހުމަދު އަބްދުﷲ (ވ) ކައިރިން ސޮކަ މޭޓްސްގެ އަހުމަދު ސައީދު (އައްމަޓީ) ބޯޅަ ހިފައިގެންދާން މަސައްކަތްކުރަނީ.-- ފޮޓޯ: އަބްދިﷲ އިޔާން/ އަދަދު
ރަމަޟާން މަހު ކުރީގެ ކުޅުންތެރިންނަށް ހާއްސަކޮށްގެން ކުރިއަށް ގެންދާ ވެޓެރަންސް ކަޕް މި ފަހަރު މި ބާއްވަނީ ތިން އަހަރުގެ މެދުކެނޑުމަކަށް ފަހު އެވެ. ޖުމްލަ ހަތް ޓީމު މި ފަަހަރުގެ މުބާރާތުގައި ބައިވެރިވެ އެވެ.
އެފްއޭއެމާ ގުޅިގެން މި ފަހަރުގެ މުބާރާތް އިންތިޒާމް ކުރަނީ ކްލަބް އިވެންޓްސް އިންނެވެ. ހަތް ޓީމުގެ މެދުގައި ލީގު ބުރެއް ކުޅުމަށް ފަހު ފައިނަލަށް ދާނީ އެންމެ ގިނަ ޕޮއިންޓް ހޯދާ ދެ ޓީމެކެވެ.
މުބާރާތުގައި މާދަމާ ހަވީރު އޮންނާނީ ހުޅުމާލެ ވެޓެރަންސް އާއި ކްލަބް އީގަލްސް ކުޅޭ މެޗެވެ. މެޗު ފަށާނީ 16:30 ގަ އެވެ. ހުޅުމާލެ ވެޓެރަންސް ވަނީ ކުޅުނު ފުރަތަމަ މެޗުން ކްލަބް ގްރީން ސްޓްރީޓްސް އަތުން މޮޅުވެފަ އެވެ.
