ތަރައްގީގެ މަޝްރޫއުތައް ސަރުކާރުން ހަވާލުކުރާ ކުންފުނިތަކުގެ ތެރެއިން އެއްބަސްވާ މުއްދަތުގެ ތެރޭގައި މަސައްކަތް ނުނިންމާ ކުންފުނިތައް ޓެންޑާ މަރުހަލާގައި ބްލެކްލިސްޓު ކުރަން ސަރުކާރުން ނިންމައިފި އެވެ.
ޕާފޯމެންސް ދަށް ކުންފުނިތައް ބްލެކްލިސްޓު ކުރާނެ އުސޫލެއް ފިނޭންސް މިނިސްޓްރީން ކަނޑައަޅާފައިވާ ކަމަށް ހައުސިން މިނިސްޓަރު މުހައްމަދު އަސްލަމް ރައްޔިތުންގެ މަޖިލީހުގެ މިއަދުގެ ޖަލްސާގަައި ވިދާޅުވީ މެމްބަރަކު އެކަމާ ސުވާލު ކުރެއްވުމުންނެވެ.
މިއަދުގެ ޖަލްސާގެ ވަޒީރުންނާ ސުވާލުކުރުމުގެ ވަގުތުގައި އިނގުރައިދޫ ދާއިރާގެ މެމްބަރު ހަސަން އަހުމަދު ކުރެއްވި ސުވާލުގައި އެއްސެވީ މަޝްރޫއުތައް ލަސްކުރާ ކުންފުނިތައް ބްލެކްލިސްޓު ކުރަން ސަރުކާރުން ނުވިސްނާތޯ އެވެ.
"އިންނަމާދޫ ނަރުދަމާ އަޅާތާ ހަތަރު އަހަރު އެސްޖޭ ކޮންސްޓްރަކްޝަނުން. މިއަދު އެތަނުގައި [މަސައްކަތް ކުރާ ތަނުގައި] ތިބީ ދެމީހުން ކަންނޭނގެ ތިން މީހުން ކަންނޭނގެ" މަސައްކަތް ލަސްވާ މައްސަލައިގައި މިނިސްޓަަރާ ސުވާލު ކުރައްވަމުން ހަސަން އަހުމަދު ވިދާޅުވި އެވެ.
އަސްލަމް ވިދާޅުވީ އިނގުރައިދޫގެ ނަރުދަމާގެ މަޝްރޫއު ލަސްވާ މައްސަލަައިގައި އެތައް ފަަހަރަކު ވާހަކަ ދައްކައިގެން ވެސް އެކަން ހައްލުވެފައި ނުވާ ކަމަށާއި އެކަހަލަ ކުންފުނިތައް ބްލެކްލިސްޓު ކުރެވޭނީ ޓެންޑާ މަރުހަލާގައި ކަމަށެވެ.
"[ރަނގަޅަށް] ޕާފޯމް ނުކޮށް އޮތް ބަޔަކަށް މަސައްކަތް ހަވާލުކުރުމާއި ނުކުރުމުގެ އިހުތިޔާރު އޮންނަނީ ޓެންޑާގައި. އެހެންވީމާ މިނިސްޓްރީ އޮފް ފައިނޭންސުން އެކަން ކުރައްވާފައި [ބްލެކްލިސްޓް ކުރާނެ ނިޒާމެއް ގާއިމްކޮށްފައި] ވާ ކަމަށް ޝިފާޒް އެބަ ވިދާޅުވޭ އަޅުގަނޑު ގާތު،" އަސްލަމް ވިދާޅުވި އެވެ.
ސަރުކާރުން ބައެއް މަސައްކަތްތައް ހަވާލުކުރާ ކުންފުނިތަކުން އެ މަސައްކަތް ނިންމަން ޖެހޭ މުއްދަތަށް ވުރެ އެތައް އަހަރެއް ލަހުން މަސައްކަތް ނިންމާ އިރު، އެފަދަ ކުންފުނިތަކަށް ސަރުކާރުން ދެވަނަ ފަހަރަށް ވެސް މަސައްކަތް ހަވާލުކުރާތީ އާއްމުންނާއި މެމްބަރުން ވެސް ޝަކުވާ ކުރެ އެވެ. އެފަދަ ކުންފުނިތައް އެއީ "ދައުލަތަށް ބަލަދު އަރާ ކުންފުނިތައް ތޯ" މީގެ ކުރިން މަޖިލީހުގައި ބައެއް މެމްބަރުން މިނިސްޓަރާ ސުވާލުކުރެއްވި އެވެ.
