ކަންބޮޑުވާންޖެހޭ މިންވަރަކަށް ތެލުގެ ދަތިކަމެއް ނެތް ކަމަށާއި، ތެލުގެ ޑިމާންޑް ކުއްލިއަކަށް މައްޗަށް ދިއުމުން ކުރިމަތިވެފައިވާ ދަތިކަން ހޮނިހިރު ދުވަހުން ފެށިގެން ހައްލު ވާނެ ކަމަށް، ރާއްޖެ އަށް އެންމެ ގިނައިން ތެޔޮ އެތެރެކުރާ ކުންފުނި، އެސްޓީއޯގެ މެނޭޖިން ޑިރެކްޓަރު ހުސައިން އަމްރު ވިދާޅުވެއްޖެ އެވެ.
އަމްރު މިއަދު "އަދަދަ"ށް ވިދާޅުވީ ދުނިޔޭގެ ބާޒާރުގައި ތެލުގެ އަގު ބޮޑުވެގެން ދިޔަ ނިސްބަތުން އެސްޓީއޯއިން އަގު ބޮޑު ނުކުރުމަށާއި އެހެންވެ، ކުއްލިއަކަށް ޑިމާންޑް އިތުރުވެގެން ދިޔަ ކަމަށެވެ.
އެސްޓީއޯގެ ސަބްސިޑިއަރީ ކުންފުނި، ފިއުލް ސަޕްލައި މޯލްޑިވްސްއިން ދުވާލު ވިއްކަން ކުރިން ކަނޑައަޅާފައިވާ މިންވަރަށް ވުރެ 30 ޕަސެންޓް އިތުރަށް މިހާރު ވިއްކަމުން އަންނަ ކަމަށް އޭނާ ވިދާޅުވި އެވެ.
މިހާރު ވެސް އަސްލު ދައްޗެއް ނެތި އެބަ [ތެޔޮ] ދޫކުރަން. ކޮންޓްރޯލެއް ގެންނަން ޖެހުނީ އާދަޔާ ހިލާފު ޑިމާންޑެއް އުފެދުމުން. އެހެންވީމާ އަޅުގަނޑުމެންނަށް ކޮންމެވެސް ވަރަކަށް ބަލާލައިގެން ދޯ [ތެޔޮ] ވިއްކޭނީ،" އަމްރު ވިދާޅުވި އެވެ.
"ފޯކާސްޓް ހަދާފަ ހުންނާނީ ފެނަކައަށް ތެޔޮ އަޅައިދޭންޖެހޭ ރަށްތަކަށް ބޭނުންވާނެ މިންވަރަށާއި ބައެއް ރިސޯޓްތަކަށާއި އާންމު މީހުންނަށް ބޭނުންވާ ވަރަށް."
އަމްރު ވިދާޅުވި ގޮތުގައި ފިއުލް ސަޕްލައި އިން ދުވާލަކަށް ތެޔޮ ވިއްކާ މިންވަރު އިތުރުކޮށްފައި ހުއްޓައި، ދުބާއީ ބަނދަރުން އެސްޓީއޯގެ ބޯޓަށް ތެޔޮ ބަރުކުރަން ލަސްވެގެން ދިއުމަކީ ދަތިކަން ކުރިމަތިވާންޖެހުނު ސަބަބެއް ކަމަށެވެ. ނަމަވެސް އެ ބޯޓަށް ތެޔޮ ބަރުކޮށްގެން މި މަހުގެ 9 ގައި މާލޭގައި ބަނދަރުކުރާނެ ކަމަށް އޭނާ ވިދާޅުވި އެވެ.
މިހާރު ކުރިމަތިވެފައި އޮތް ދަތިކަން މި މަހުގެ 9 ގައި ހައްލުވާނެ. އެ ދުވަހު އެސްޓީއޯގެ ތެޔޮ ބޯޓު ބަނދަރު ކުރާނެ. އިތުރު ދެ ބޯޓެއް އޭޕްރީލް 11 ގައި އަންނާނެ،" އަމްރު ވިދާޅުވި އެވެ.
"އެއަށް ފަހު ދެން ނުޖެހޭނެ އެއްވެސް މައްސަލައެއް. މުޅި ރާއްޖެ ކަވަރު ކުރެވޭ ވަރަށް ތެޔޮ ގެނެވޭނެ."
ކަސްޓަމްސްގެ ހިސާބުތަކުން ދައްކާ ގޮތުގައި މި އަހަރުގެ ޖެނުއަރީ މަހު ރާއްޖެ އަށް 722 މެޓްރިކް ޓަނުގެ ތެލުގެ ބާވަތްތައް (ޑީސަލް، ޕެޓްރޯލް، މަތިންދާ ބޯޓަށް އަޅާ ތެޔޮ) އެތެރެކޮށްފައި ވާއިރު، ފެބްރުއަރީ މަހު 863 މެޓްރިކް ޓަނުގެ ތެޔޮ އެތެރެކޮށްފައިވެ އެވެ.
އެމްއެމްއޭގެ ހިސާބުތަކުން ދައްކާ ގޮތުގައި މި އަހަރުގެ ޖެނުއަރީ މަހު އެތެރެކުރީ 47.64 މިލިއަން ޑޮލަރުގެ ތެލެވެ. ފެބްރުއަރީ މަހު އެތެރެކުރީ 59.31 މިލިއަން ޑޮލަރުގެ ތެލެވެ.
ދުނިޔޭގެ ބާޒާރުގައި ތެލުގެ އަގު ބޮޑުވުމާއެކު އެންމެ ފަހުން އެސްޓީއޯއިން ތެލުގެ އަގު ބޮޑުކޮށްފައި ވަނީ މިދިޔަ މަހު 5 ގަ އެވެ. އެ ފަހަރު ތެލުގެ އަގަށް ގެނައި ބަދަލާއެކު މިހާރު ވެސް ފިއުލް ސަޕްލައި މޯލްޑިވްސްގެ ޝެޑްތަކުން ޕެޓްރޯލް ލީޓަރެއް ވިއްކަނީ 14.60ރ. އަށް ކަމަށެވެ. ޑީސަލް ލީޓަރެއް 14.80ރ. އަށެވެ.
