ރައްޔިތުންގެ މަޖިލީހުގެ ކޮމިޓީތަކުގެ މަސައްކަތް ކުރިއަށްދާ ގޮތުގެ ޕާފޮމަންސް އޮޑިޓެއް ތައްޔާރު ކޮށްދޭން އިދިކޮޅު ޕީޕީއެމް އާއި ޕީއެންސީގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އެޑްރެސް ކުރައްވައި، ޕީއެންސީގެ ޕާލިމެންޓްރީ ގްރޫޕްގެ ލީޑަރު އާދަމް ޝަރީފް ފޮނުއްވި ސިޓީއެއްގައި ވަނީ ފަހަކަށް އައިސް ވެރިކަން ކުރާ އެމްޑީޕީގެ މެންބަރުންގެ ފަރާތުން މަޖިލީހުގައި އިވެމުން ދަނީ ކަންބޮޑުވުން ހުރި ކަންކަމުގެ އަޑު ކަމަށެވެ.
މި ގޮތުން، ސަރުކާރުގެ ތެރޭގައި ކޮރަޕްޝަންގެ އަމަލުތައް ގިނަވެ ނަހަމަ ގޮތުގައި މީހުންނަށް ވަޒީފާ ދެމުން ދިއުމާއި، އިންތިޚާބުތައް ކާމިޔާބު ކުރުމަށް ޓަކައި ދައުލަތުގެ މުދަލާއި ފައިސާ ބޭނުން ކުރަމުންދާ ކަމަށް އަޑު އިވެމުންދާ ކަން ފޮނުވި ސިޓީގައި ފާހަގަ ކުރެއްވި އެވެ.
މި ކަންކަމުގެ ހަގީގަތް ދެނެގަތުމަށް ޓަކައި ރައްޔިތުންގެ މަޖިލީހުގައި އެކުލަވާފައި އޮންނަ ކޮމިޓީތަކުން މަސައްކަތް ކުރަމުން ދާން ޖެހޭނެ ކަމަށް އާދަމް ޝަރީފް ގަބޫލު ކުރައްވަ އެވެ. އެހެންވެ ކޮމިޓީތަކުގެ ޕާފޮމަންސް އޮޑިޓެއް ހަދަން ފޮނުވި ސިޓީގައި އެދިވަޑައިގެންފައިވެ އެވެ.
"ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީގެ 70 ވަނަ މާއްދާގައި ބަޔާން ކުރާ ރައްޔިތުންގެ މަޖިލީހުގެ ގާނޫނީ ޒިންމާ އަދާ ކުރެއްވުމަށް ޓަކައި އިސްވެ ދެންނެވި ކަންކަމަށް ރިއާޔަތްކޮށް، މަޖިލީހުގެ ކޮމިޓީތަކުގެ މަސައްކަތް ހިނގަމުންދާ ގޮތުގެ ޕާފޮމަންސް ރިޕޯޓެއް ހަދަން ފެންނަ ވާހަކަ ދަންނަވަމެވެ." ސިޓީގައިވެ އެވެ.
ރައްޔިތުންގެ މަޖިލީހުގައި ފަހުން ފަހުން އެންމެ ބޮޑަށް ބަހުސް ކުރެވެމުން ދަނީ އެމްޑީޕީގައި އޮތް ދެ ފެކްޝަންގެ މެންބަރުންގެ ބަހުސެވެ. ރައީސް އިބްރާހީމް މުހައްމަދު ސޯލިހްގެ ފެކްޝަނާއި ނަޝީދުގެ ފެކްޝަންގެ ބަހުސްތައް އިތުރުވެގެން މި އުޅެނީ އެމްޑީޕީގެ ޗެއާޕާސަންގެ އިންތިޚާބާއި ދިމާކޮށެވެ.
