ރައްޔިތުންގެ މަޖިލީހަށް ހުށަހަޅާފައި ހުރި ބިލުތަކުގެ މަސައްކަތް އަވަސްކުރަން މަސައްކަތް ކުރައްވަން އެ މަޖިލީހުގެ ރައީސް މުހައްމަދު ނަޝީދު މިއަދު ނަސޭހަތް ދެއްވައިފި އެވެ.
މަޖިލީހުގެ މިއަދުގެ ޖަލްސާ ފައްޓަވައި، ރިޔާސަތުން އަންގާ އެންގުމެއްގެ ގޮތުގައި ނަޝީދު ވިދާޅުވީ ބިލުތަކަށް ހޭދަކުރާ ވަގުތު މަދުކުރަން މަޖިލީހުގެ އިދާރާއިން ގަދައަޅައި މަސައްކަތްކުރާ ކަމަށެވެ. މަޖިލީހުގައި މިހާރު ބަހުސްކުރަމުން އަންނަ ކުންފުނީގެ ބިލަށް ބޭނުންވާ ދިރާސާއެއް މަޖިލީހުގެ އިދާރާއިން ހަދާފައިވާ ކަމަށާއި އެއީ ވެސް ބިލުގެ މަސައްކަތް އަވަސްކުރަން ކުރި މަސައްކަތެއް ކަމަށް ވެސް އެމަނިކުފާނު ވިދާޅުވި އެވެ.
"ކޮމިޓީތަކުގައި މިވަގުތު އެބަވޭ 25 އަކަށް ބިލް. އެހެންވީމާ މި ބިލްތައް ނުނިމި ގިނަ ދުވަސް ކޮމިޓީތަކުގައި ވުމުގެ ބަދަލުގައި އަވަހަށް ބިލުތައް ނިންމައިލެވޭނެ ގޮތެެއް، އެފަދަ ވިސްނުމެއް އިއްޒަތްތެރި މެމްބަރުން ގެންގުޅުއްވުމަކީ ބޭނުންތެރިކަމެއް،" ނަޝީދު ވިދާޅުވި އެވެ.
އެމަނިކުފާނު ވިދާޅުވި ގޮތުގައި ބިލްތަކުގެ މަސައްކަތް އަވަސްކުރެވޭނީ މެމްބަރުން ހަމަ އެކަނި ބިލްތަކުގެ ކޮންސެޕްޓަށް ވިސްނަވާފައި ބިލުތަކާ ގުޅޭ އިދާރީ މަސައްކަތްތައް އިދާރީ ބޭފުޅުންނަށް ދޫކޮށްލެއްވުމުންނެވެ.
މީގެ ކުރިން މަޖިލީހުގައި އެމަނިކުފާނު އެކި ފަހަރު މަތިން ކަންބޮޑުވުން ފާޅުކުރައްވާފައި ވަނީ ސަރުކާރުން މަޖިލީހަށް ފޮނުވަން ޖެހޭ ބިލްތައް ނުފޮނުވާތީ މަޖިލީހުގައި ކުރާނެ މަސައްކަތެއް ނެތިގެންނެވެ. އެހެން ނަމަވެސް ބިލްތަކުގެ މަސައްކަތް އަވަސްކުރަން އޭރުވެސް ބާރު އަޅުއްވަ އެވެ.
މިހާރު އޮތް 19 ވަނަ ރައްޔިތުންގެ މަޖިލީހަކީ 18 ވަނަ މަޖިލީހާ އަޅައި ބަލާއިރު މަސައްކަތް މާ ބޮޑަށް ވެސް އަވަސް މަޖިލީހެކެވެ. މި މަޖިލީހަށް ސަރުކާރުން ހުށަހެޅި ގިނަ ބިލްތަކެއް ވަރަށް އަވަހަށް ނިންމުމުގެ އިތުރުން މެމްބަރުން ހުށަހެޅުއްވި އެކި އެކި މައްސަލަތައް ކޮމިޓީތަކުން ދިރާސާކޮށް ވަރަށް އަވަހަށް ނިންމާފައި ވެ އެވެ.
