މައިލޯ އެފްއޭއެމް ވެޓެރަންސް ލީގު 2022 ގައި މިއަދު ހަވީރު ކުޅުނު މުބާރާތުގެ ފުރަތަމަ މެޗުން ހުޅުމާލެ ވެޓެރަންސް ކްލަބުން 2-0 އިން ކްލަބް ގްރީން ސްޓްރީޓްސް ބަލިކޮށްފި އެވެ.
ތިން އަހަރުގެ މެދުކެނޑުމަކަށް ފަހު މި އަހަރު އެފްއޭއެމް އިން ވެޓެރަންސް ލީގު މި ކުރިއަށްގެންދަނީ ކްލަބް އިވެންޓްސްއާ ގުޅިގެންނެވެ.
މި ފަހަރުގެ މުބާރާތުގައި ޖުމްލަ ހަތް ޓީމެއް ވާދަކުރާއިރު، ފައިނަލަށް ހޮވޭނީ ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެކެވެ.
ޓާފް އެއް ނަމްބަރު ދަނޑުގައި މިއަދު ހަވީރު ކުޅުނު ވެޓެރަންސް ލީގުގެ ފުރަތަމަ މެޗު ޝަރަފްވެރި ކޮށްދެއްވީ އެފްއޭއެމްގެ ރައީސް ބައްސާމް އަދީލް ޖަލީލް އާއި ކުރީގެ މަޝްހޫރު ކުޅުންތެރިޔާ، އަހުމަދު ޝަމީމް (އާންސީ) އެވެ. މިއަދުގެ މެޗު ފެށުމުގެ ކުރިން މުބާރާތުގެ ޓްރޮފީ ރަސްމީކޮށް ވަނީ ދައްކާލައިފަ އެވެ.
ވެޓެރަންސް ލީގު ފެށުމުގެ ކުރިން އާންސީ (މ) އެފްއޭއެމްގެ ރައީސް ބައްސާމްއާ ޓްރޮފީ ހަވާލުކުރަނީ.--- ފޮޓޯ: އަބްދުﷲ އިޔާން/ އަދަދު
މަޝްހޫރު ގިނަ ކުޅުންތެރިންނާ އެކު އޮތް ހުޅުމާލެ ވެޓެރަންސް އިން މިއަދުގެ މެޗު ފެށިތަނުން ވަނީ ގޯލު ޖަހައިފަ އެވެ. އެ ގޮތުން މެޗުގެ ދެ ވަނަ މިނިޓްގައި ގްރީން ސްޓްރީޓްސް އޭރިއާތެރެއިން ލިބުނު ފުރުސަތަކުން އަލީ ޝަމީމް (ކޮޔަރު އައްޔަ) ނަގައިދިން ބޯޅަ އެ ޓީމުގެ މުހައްމަދު ޒިޔާދު ވަނީ ހަމަޖެހިލާފައި ގޯލަށް ބޯޅަ ވައްދާލައިފަ އެވެ.
ގްރީން ސްޓްރީޓްސް އިން ގޯލެއް ޖެހޭތޯ ކުރި މަސައްކަތުގައި ކުރިން ގައުމީ ޓީމަށް ކުޅުނު އިލްޔާސް އިބްރާހިމް (އިއްލެ) ކުޅެން އެރުވި އެވެ. އެކަމަކު، އިއްލެ އަށް ވެސް ހުޅުމާލެ ޓީމުގެ ގޯލުގައި ހުރި މުހައްމަދު ޝިނާން (ނާނީ) ކައިރިން ރަނގަޅު ބޯޅައެއް ފޮނުވާލެވޭ ގޮތެއްނުވި އެވެ.
ދެ ވަނަ ހާފްގައި ހުޅުމާލެ ވެޓެރަންސް އަށް ލީޑުފުޅާކޮށްދޭން ކޮޔަރު އައްޔަ އަށް ލިބުނު ބޯޅަ ފޮނުވާލި ނަމަވެސް ގްރީން ސްޓްރީޓްސްގެ ކީޕަރު ނިއުޝާދު އަލީ ވަނީ މަތަކޮށްފަ އެވެ. ހުޅުމާލެ ވެޓެރަންސް އިން ދެ ވަނަ ގޯލެއް ޖެހީ މެޗުގެ 25 ވަނަ މިނިޓްގަ އެވެ. އަބްދުﷲ ސުޖާއު ހުސްކޮށްލާފައި ދިން ބޯޅަ މުހައްމަދު ޖަމީލް (ޖަމްބެ) ވަނީ ގޯލުގެ ކައިރީ ކަނަށް ފޮނުވާލައިފަ އެވެ.
ކްލަބް ގްރީން ސްޓްރީޓްސްގެ ދެ ކުޅުންތެރިން ކައިރިން ހުޅުމާލެ ވެޓެރަންސް ޓީމުގެ ސުޖާ ބޯޅަ ހިފައިގެންދަނީ.-- ފޮޓޯ: އަބްދުﷲ އިޔާން/ އަދަދު
ބަދަލު ކުޅުންތެރިއެއްގެ ގޮތުގައި ކުޅެން އަރައި ގްރީން ސްޓްރީޓްސް ޓީމުގެ އިބްރާހިމް މަމްނޫން ފޮނުވާލި ދެ ހަމަލާ ވެސް ކީޕަރު ނާނީ ވަނީ މަތަކޮށްފަ އެވެ.
ފުރަތަމަ މެޗުގެ މޮޅު ކުޅުންތެރިއަކަށް ހޮވިފައިވަނީ ހުޅުމާލެ ޓީމަށް މުޅި މެޗުގައި އެއްކޮށް ކުޅުނު ޒިޔާދު އެވެ.
މި ފަހަރުގެ މުބާރާތުގެ ގަވާއިދުގައިވާ ގޮތުން ކޮންމެ ޓީމު ލިސްޓެއްގައި ވެސް 35 އަހަރުން މަތީގެ ދެ ކުޅުންތެރިއަކު ހިމެނޭނެ އެވެ. އަދި ބާކީ ކުޅުންތެރިން ވާން ޖެހޭނީ 40 އަހަރުން މަތީގެ ކުޅުންތެރިންނަށެވެ. މީގެ އިތުރުން 2019 ވަނަ އަހަރުން ފެށިގެން ނިމިދިޔަ މުއްދަތުގައި އެފްއޭއެމުން ބޭއްވި ރަސްމީ އެއްވެސް މުބާރާތެއްގައި ބައިވެރިވި ކުޅުންތެރިއަކަށް ވެޓްރަންސް މުބާރާތުގައި ނުކުޅެވޭނެ އެވެ.
މުބާރާތުގައި މިއަދު ކުޅުނު ދެ ޓީމުގެ އިތުރުން ދެން ބައިވެރިވެފައިވަނީ ދިވެހި ސިފައިންގެ ކްލަބް، ޕޮލިސް ކްލަބް، ކްލަބް އީގަލްސް އަދި އެމްއެސް މޭޓްސް އެވެ. މާދަމާ ހަވީރު ކުޅޭ މެޗުގައި ދިވެހި ސިފައިންގެ ކްލަބް ބައްދަލުކުރާނީ ދަ ގްރާންޑޭ ސްޕޯޓްސް ކްލަބާ އެވެ.
