ދިވެހިރާއްޖެއާ އެމެރިކާއާ ދެމެދު ދިފާއީ އަދި ސަލާމަތީ ގޮތުން އެއްބާރުލުން އިތުރުކުރުމަށްޓަކައި އެގައުމުގެ ނެޝަނަލް ގާޑް ސްޓޭޓް ޕާޓްނާޝިޕް ޕްރޮގްރާމުގައި ރާއްޖެއިން ބައިވެރިވުމުގެ އެއްބަސްވުމުގައި މިއަދު ސޮއިކޮށްފި އެވެ.
ދެ ގައުމުގެ ދެމެދުގައި މިއަދު ސޮއިކުރި އެއްބަސްވުމަކީ ރާއްޖެއިން އެމެރިކާގެ މޮންޓާނާ ނޭޝަނަލް ގާޑް ސްޓޭޓް ޕާޓްނަޝިޕް ޕްރޮގްރާމްގައި ބައިވެރިވުމަށް ހެދި އެއްބަސްވުމެކެވެ. މިއަދު އެމްއެންޑީއެފްގެ އިންޓެގްރޭޓަޑް ހެޑްކުއާޓާޒްގައި އޮތް ހާއްސަ ރަސްމިއްޔާތެއްގައި އެ އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ ޑިފެންސް މިނިސްޓަރު މާރިޔާ އަހުމަދު ދީދީ އެވެ. އަދި އެމެރިކާގެ ފަރާތުން އެ އެއްބަސްވުމުގައި ސޮއިކުރެއްވީ މޮންޓާނާ ނެޝަނަލް ގާޑުގެ މޭޖާ ޖެނެރަލް ޖޯން ރޮނިކް އެވެ.
އެ އެއްބަސްވުމުގެ ދަށުން ރާއްޖެއިން ބައިވެރިވާ ޕާޓްނާޝިޕް ޕްރޮގްރާމަކީ އިންސާނީ އެހީ ފޯރުކޮށްދިނުމާއި ކާރިސާތަކުގައި އެހީތެރިވުމާއި ލީޑަޝިޕްގެ ހުނަރު ތަރައްގީކުރުން ފަދަ ދާއިރާތަކުން ދެ ގައުމުގެ ދެމެދުގައި އެއްބާރުލުން އިތުރުކުރަން ސޮއިކުރި އެއްބަސްވުމެއް ކަމަށް ރާއްޖޭގެ ޑިފެންސް މިނިސްޓްރީން ބުނެ އެވެ.
އެ ދާއިރާތަކުގެ އިތުރުން ވެސް ސައިބަސެކިއުރިޓީ އާއި ކޮމިއުނިކޭޝަން ސެކިއުރިޓީ، މެރިޓައިމް ޑޮމައިން އެވެއާނަސް، އޭވިއޭޝަން ސެކިއުރިޓީ، މިލިޓަރީ މެޑިކަލް އަދި އިންޖިނިއަރިން، އޮޕަރޭޝަނަލް ލޮޖިސްޓިކްސް ގެ ދާއިރާއިން ދެ ގައުމުން އެކީގައި މަސައްކަތް ކުރާނެ ކަމަށް ވެސް ޑިފެންސް މިނިސްޓްރީން ބުނެ އެވެ.
އެ މިނިސްޓްރީން އިތުރަށް ބުނީ އެ އެއްބަސްވުމުގެ ސަބަބުން ކެމިކަލް، ބަޔޮލޮޖިކަލް، ރޭޑިއޮލޮޖިކަލް، ނިއުކްލިއާ އަދި އެންވަޔަރަމެންޓަލް ޑިފެންސް އަދި ރެސްޕޮންސް ފަދަ ދާއިރާތަކުން ވެސް ދެ ގައުމުން އެކީގައި އިތުރަށް މަސައްކަތްކުރާނެ ކަމަށެވެ.
އެއްބަސްވުމުގައި ސޮއިކުރުމަށް އޮތް ރަސްމިއްޔާތުގައި މިނިސްޓަރު މާރިޔާ ވަނީ އެ ޕާޓްނާޝިޕް އެއްބަސްވުމުގެ ސަބަބުން ރާއްޖޭގެ ސަލާމަތާ ގުޅޭ ތަފާތު ގިނަ ދާއިރާތަކުން އެއްބާރުލުން އިތުރުކޮށް ރާއްޖޭގެ ދިފާއީ ދާއިރާގެ ގާބިލްކަމާއި ހުޝިޔާރުކަން އިތުރުކުރަން މަގުފަހިވެގެންދާނެ ކަމަށެވެ.
ދުނިޔޭގެ 90 އަށް ވުރެ ގިނަ ގައުމު ބައިވެރިވާ އެ ޕާޓްނާޝިޕް ޕްރޮގްރާމުގައި ރާއްޖެއިން ވެސް މިއަދު ބައިވެރިވުމަކީ އެމެރިކާއާ ރާއްޖެއާ ދެމެދު ދިފާއީ އަދި ސަލާމަތީގޮތުން އެއްބާރުލުން އިތުރުކުރަން އެކުލަވާލައި، 2020 ވަނަ އަހަރު ސޮއިކުރި ފްރޭމްވޯކް އެގްރީމެންޓަށް އަމަލީ ސިފަ އަންނަމުންދާކަމުގެ ހެއްކެއް ކަމަށް ވެސް މިނިސްޓަރު މާރިޔާ މިއަދު ވިދާޅުވި އެވެ.
