ކުރީގެ ކުޅުންތެރިންނަށް ހާއްސަކޮށްގެން ކޮންމެ ރޯދަ މަހަކު ބާއްވާ ވެޓެރަންސް ފުޓްބޯޅަ މުބާރާތް، ތިން އަހަރުގެ މެދުކެނޑުމަކަށް ފަހު މި އަހަރު ބާއްވަން ނިންމާފައިވާއިރު، "އެފްއޭއެމް ވެޓްރަންސް ލީގު"ގެ ނަމުގައި މި އަހަރުގެ މުބާރާތް އަންނަ ހޯމަ ދުވަހު ފަށަން ތާވަލުކޮށްފި އެވެ.
މިދިޔަ ތިން އަހަރު މުބާރާތް ނުބޭއްވުނީ ކޮވިޑް-19ގެ ބަލިމަޑުކަމުގެ ސަބަބުންނެވެ.
އެފްއޭއެމާ ގުޅިގެން، މި ފަހަރު ވެޓެރަންސް ލީގުގެ ނަމުގައި މި ފަށާ މުބާރާތް އިންތިޒާމްކުރާނީ، ކްލަބް އިވެންޓްސް އިންނެވެ.
މި ފަަހަރުގެ މުބާރާތުގައި ޖުމްލަ ހަތް ޓީމެއް ވާދަކުރަން ހަމަޖެހިފައިވާއިރު، މުބާރާތް ކުރިއަށްދާނީ ހަތް ޓީމުގެ މެދުގައި ލީގު ބުރެއް ކުޅުމަށް ފަހު އެންމެ ގިނަ ޕޮއިންޓް ހޯދާ ދެ ޓީމެއް، ފައިނަލް ކުޅޭ ގޮތަށެެވެ. ޓާފް ދަނޑުގައި ކުޅޭ މި މުބާރާތް ފަށްޓާނީ އަންނަ ހޯމަ ދުވަހު ހަވީރު 16:30 ގައި ކްލަބް ގްރީން ސްޓްރީޓްސް އާއި ހުޅުމާލެ ވެޓްރަންސް ކްލަބް އިންނެވެ.
މި ދެ ޓީމުގެ އިތުރުން ދެން، ވާދަކުރާ ފަސް ޓީމަކީ ދިވެހި ސިފައިންގެ ކްލަބް، ޕޮލިސް ކްލަބް، ކްލަބް އީގަލްސް އަދި އެމްއެސް މޭޓްސް އެވެ. މުބާރާތް ކުރިއަށްދާނީ ޓާފް އެއް ނަމްބަރު ދަނޑުގަ އެވެ.
މި ފަހަރުގެ މުބާރާތުގެ ގަވާއިދުގައިވާ ގޮތުން ކޮންމެ ޓީމު ލިސްޓެއްގައި ވެސް 35 އަހަރުން މަތީގެ ދެ ކުޅުންތެރިއަކު ހިމެނޭނެ އެވެ. އަދި ބާކީ ކުޅުންތެރިން ވާން ޖެހޭނީ 40 އަހަރުން މަތީގެ ކުޅުންތެރިންނަށެވެ. މީގެ އިތުރުން 2019 ވަނަ އަހަރުން ފެށިގެން ނިމިދިޔަ މުއްދަތުގައި އެފްއޭއެމުން ބޭއްވި ރަސްމީ އެއްވެސް މުބާރާތެއްގައި ބައިވެރިވި ކުޅުންތެރިއަކަށް ވެޓްރަންސް މުބާރާތުގައި ނުކުޅެވޭނެ އެވެ.
އެންމެ ފުރަތަމަ ވެޓްރަންސް މުބާރާތް ސީދާ އެފްއޭއެމުން އިންތިޒާމްކުރި ނަމަވެސް ފަހަކަށް އައިސް މުބާރާތް ބާއްވާފައިވަނީ އެކި އަމިއްލަ ކްލަބްތަކާ ގުޅިގެންނެވެ. އެ ގޮތުން ސޮކަ ވެޓެރަންސް އެސޯސިއޭޝަން އޮފް މޯލްޑިވްސް (އެސްވީއޭއެމް) އާއި އެމްއެސް މޭޓްސްއާ ގުޅިގެން ވެސް ވަނީ މުބާރާތް ކުރިއަށް ގެންގޮސްފަ އެވެ.
ވެޓެރަންސް ކަޕްގެ އެންމެ ކާމިޔާބު ޓީމަކީ ޖުމްލަ ފަސް ފަހަރު މުބާރާތުގެ ތަށި އުފުލާލި ކްލަބް ވެލެންސިއާ އެވެ. ދެން އެންމެ ގިނަ ފަހަރަށް ތަށި ހޯދީ، ތިން ފަހަރު ޗެމްޕިއަންކަން ހޯދި ނިއު ރޭޑިއަންޓް ސްޕޯޓްސް ކްލަބް އެވެ.
އެންމެ ފަހުން 2019 ވަނަ އަހަރު މުބާރާތް ބޭއްވިއިރު، މެޗަކުން ބަލިނުވެ ތަށި އުފުލާލީ މާޒިޔާ ސްޕޯޓްސް އެންޑް ރެކްރިއޭޝަނުންނެވެ. މި ތިން ޓީމު ވެސް މުބާރާތުގައި މި ފަހަރު ނުފެންނާނެ އެވެ.
މުބާރާތުގެ އޮފިޝަލް ސްޕޮންސަރަކީ މައިލޯ އެވެ. ކްލަބް އިވެންޓްސްއާ އެކު މި މުބާރާތުގެ ޕާޓްނަރުންގެ ގޮތުގައި ދެން ހަރަކާތްތެރިވާނީ އެއްކާފު އަދި އަދަދު އެވެ.
