ކުރީގެ ހޯމް މިނިސްޓަރު އަދި ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެމްބަރު އަހުމަދު ތަސްމީން އަލީ ހިއްސާވާ ކުންފުންޏަކުން ތަރައްގީކޮށް ހިންގި ތ. ފުނައްޑޫ މަސްފެކްޓްރީ ވިއްކާލުމަށް ބޭންކް އޮފް މޯލްޑިވްސް އިން މަސައްކަތް ކުރަމުން އަންނަތާ އަހަރުތަކެއް ފާއިތުވެފައި ފަހުން އެންމެ ފަހުން ސަރުކާރުން އެ ފެކްޓަރީ ގަތްކަން ރިޕޯޓުކުރީ އިއްޔެ އެވެ.

ރައްޔިތުންގެ މަޖިލީހުގެ ތިމަރަފުށި ދާއިރާގެ މެމްބަރު އަބްދުﷲ ރިޔާޒް، ލިޔުމުން ޖަވާބު ހޯއްދަވާ ގޮތަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަންއާ ކުރެއްވި ސުވާލަކަށް އޭނާ އިއްޔެ ދެއްވި ޖަވާބުގައި ވިދާޅުވީ ފުނައްޑޫ ފެކްޓްރީ ސަރުކާރުން ގަތީ މި މަހުގެ ހަ ވަނަ ދުވަހު ކަމަށެވެ. އެ ފެކްޓްރީ ސަރުކާރުން ގަތީ ކިހާ ވަރަކަށް ކަމެއް މިނިސްޓަރު މަޖިލީހަށް އިއްޔެ ފޮނުއްވި ޖަވާބުގައި ވިދާޅެއް ނުވެ އެވެ.

ތ. ތިމަރަފުށްޓާ ދާދި ކައިރީގައި އޮންނަ ފުނައްޑޫގައި މަސް ބަންދުކުރާ ކާރުހާނާއެއް އަޅަން އެރަށް ދޫކުރީ ކުރީގެ ރައީސް މައުމޫނު އަބްދުލް ގައްޔޫމުގެ ވެރިކަމުގަ އެވެ. އެރަށުގައި މަސްފެކްޓްރީއެއް ހަދައިގެން ހިންގާތާ އަަހަރުތަކެއް ފަހުން ބޭންކް އޮފް މޯލްޑިވްސްއަށް އެރަށް ނަގައި ވިއްކައިލަން އިއުލާނު ކުރީ ފުނައްޑޫ ޓޫނާ ޕްރޮޑަކްޓްސް ޕްރައިވެޓް ލިމިޓެޑުން ނަގާފައިވާ ލޯނެއް ނުދެއްކުމުންނެވެ. އެރަށާއި އެހެން ބައެއް ތަންތަން ރަހުނުކޮށްގެން ނަގާފައިވާ ލޯނާއި އެލޯނަށް އިތުރުވި އިންޓަރެސްޓާއި އެކު ބޭންކަށް ދައްކަން އޭރު 200 މިލިޔަން ރުފިޔާއަށް ވުރެ ގިނަ ފައިސާ އޮތެވެ.

ފުނައްޑޫ ވިއްކައިލަން ބީއެމްއެލް އިން ފުރަތަމަ އިއުލާނު ކުރީ 2013 ވަނަ އަހަރު އެވެ. އެފަހަރު ގަންނާނެ ބަޔަކު ނުވެގެން 2014 ވަނަ އަހަރު ދެވަނަ ފަހަރަށް ވެސް އިއުލާނު ކުރި އެވެ.

ފިޝަރީޒް މިނިސްޓަރު މަޖިލީހަށް އިއްޔެ ދެއްވި ޖަވާބުގައި ވިދާޅުވީ ފުނައްޑޫ ސަރުކާރުން ގަތީ، އެރަށުގައި ހުރި މަސްފެކްޓްރީ ހިންގިދާނެތޯ ބަލަން ފީސިބިލިޓީ ސްޓަޑީއެއް ހެދުމަށް ފަހު ކަމަށެވެ.

"...މިނިސްޓްރީން ހެދި ފީސިބިލިޓީއާ މެދު 2021 ވަނަ އަހަރުގެ ޑިސެމްބަރު 15 ގަޔާއި 27 ގައި މަޝްވަރާކުރެއްވުމަށް ފަހު ސަރުކާރުން ނިންމެވީ ފުނައްޑޫގައި ގާއިމްކޮށްފައިވާ، އަދި ވިއްކައިލުމަށް ބޭންކް އޮފް މޯލްޑިވްސް އިން ބީލަންކޮށް ވިއްކައިލުމުގެ މަރުހަލާގައިވާ ފުނައްޑޫ ކާރުހާނާ ސަރުކާރުގެ ފަރާތުން މިފްކޯއަށް ގަތުމަށް،" ފިޝަރީޒް މިނިސްޓަރު މަޖިލީހަށް އިއްޔެ ފޮނުއްވި ޖަވާބުގައި ވިދާޅުވި އެވެ.

ފުނައްޑޫ ސަރުކާރަށް ގަންނަން ނިންމީ މިނިސްޓަރު އިއްޔެ ވިދާޅުވި ގޮތުގައި އެރަށުގެ ފެކްޓްރީ މިފްކޯއާ ހަވާލުކޮށްގެން ހިންގޭނެ އިންތިޒާމް ހަމަޖައްސައިދޭން އެދި ތިމަރަފުށީގެ މަސްވެެރިންނާއި ވިޔަފާރިވެރިން ރައީސް އިބްރާހީމް މުހައްމަދު ސޯލިހަށް ދެންނެވުމުންނެވެ.

ތިމަރަފުށީ މީހުން އެކަމަށް އެދުނީ މިދިޔަ އަހަރުގެ އޮގަސްޓު މަހު ރައީސް އެރަށަށް ކުރެއްވި ދަތުރުފުޅުގައި ރައްޔިތުންނާ ބައްދަލުކުރެއްވި އިރު އެވެ.

އޭނާ ވިދާޅުވީ ފުނައްޑުއާ މެދު ސަރުކާރުގެ އޮތް ވިސްނުމަކީ އެރަށުގައިވާ ފެކްޓްރީ އާއި ބަނދަރު އިތުރަށް ތަރައްގީކޮށް، ދެމެހެއްޓެވިނި އަދި ނަފާވާ ވިޔަފާރިއަކަށް ބަދަލުކުރުން ކަމަށެވެ.

ބައެއް މުހިންމު ހަބަރުތައް

• ޓޫރިޒަމް މިނިސްޓްރީގެ ސްޓޭޓް މިނިސްޓަރު ޑރ. އަހުމަދު ސޯލިހުގެ މައްޗަށް އުފުލި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ ސާބިތު ނުވާ ކަމަށް ކްރިމިނަލް ކޯޓުން ހުކުމްކުރީ އިއްޔެ އެވެ.

• ރާއްޖޭގެ ދެކުނަށް އަމާޒުކޮށް އިންޑިއާ ސަރުކާރުގެ އެހީގައި އައްޑޫގައި ހުޅުވި މަސްތުވާތަކެއްޗަށް ފަރުވާދޭ ރިހެބިލިޓޭޝަން ސެންޓަރު "ވިލުނު" އިން އަންނަ ހަފްތާ އިން ފެށިގެން މީހުންނަށް ފަރުވާދޭން ފަށާނެ ކަމަށް ހެލްތު މިނިސްޓްރީން ބުނީ އިއްޔެ އެވެ.

• ހޯމް މިނިސްޓަރު އިމްރާން އަބްދުﷲ އަކީ އަބަދުވެސް އިތުރުފުޅު ހައްދަވާ ބޭފުޅެއް ކަމަށާއި އެކަން 2015 ވަނަ އަހަރު ހިނގައިދިޔަ މޭ ޑޭ މުޒާހަރާތަކުގެ ތެރެއިން އެމަނިކުފާނު ދެއްކެވި ވާހަކަތަކުން ވެސް އެނގިގެންދާ ކަމަށް ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އަބްދުއްގައްޔޫމް ވިދާޅުވީ އިއްޔެ ރެ އެވެ.

ދުވަހުގެ ކޯޓޭޝަން

ޕީޕީއެމުން ގޮނޑިތައް ދޫނުކުރި ނަމަ ރައްޔިތުންގެ މަޖިލީހުގެ ސުޕާ މެޖޯރިޓީ އެމްޑީޕީ އަށް ލިބޭނެ ކަމަށް ދެކެވަޑައިނުގަންނަވާ ކަމަށް ހާމަކުރައްވަމުން އިދިކޮޅު ލީޑަރު އަދި ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވީ:

"އަޅުގަނޑުމެން ދޫކުރި ގޮނޑިތަކެއް ޖުމްހޫރީ ޕާޓީއަކުން ދުލެއް ނުކުރި އެއްގޮތަކަށް ވެސް. އަޅުގަނޑުމެން ގޮނޑިތަކެއް ދޫކުރީމު. އެހެން ނަމަވެސް، އަޅުގަނޑު ހިތަށް އަރަނީ މިއަދު އެ ގޮނޑިތަކަށް އަޅުގަނޑުމެންގެ މީހުން ނެރުން ނަމަ އެމްޑީޕީ އަކަށް މި ސުޕަމެޖޯރިޓިއެއް ނުލިބުނީސް،"

ދުވަހުގެ ފޮޓޯ

މާލެ-ތިލަފުށި ބްރިޖުގެ މަސައްކަތްތައް ކަނޑުގެ އަޑީގައި ކުރަން ޖެހޭ ކަންތައްތައް ކުރުމަށް ގެނައި ޖެކް-އަޕް ބާޖް މާލެ ބޭރުގައި އަޅާފައި. މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވޭ މި ބްރިޖުގެ މަސައްކަތް ކުރަނީ އިންޑިއާގެ އެފްކޮންސް ކުންފުނިން --- ފޮޓޯ: ޕްލޭނިން މިނިސްޓްރީ