ސްޓޭޓް އިލެކްޓްރިކް ކޮމްޕެނީ (ސްޓެލްކޯ)ގެ ސާވާތަކަށް މިދިޔަ ބުރާސްފަތި ދުވަހު ދިން ރެންސަމްވެއާ ހަމަލާ ތަހުގީގުކުރަން ފުލުހުންނަށް ހުށަހަޅާފައިވާކަމަށް އެ ކުންފުނިން ބުނެފި އެވެ.
ސްޓެލްކޯއިން މިއަދު ނެރުނު ބަޔާނެއްގައި ބުނީ އެ ރެންސަމްވެއާ ހަމަލާގެ ސަބަބުން ކުންފުނީގެ ވެބްސައިޓް، މޯބައިލް އެޕްލިކޭޝަން، މޯބައިލް އައުޓްލެޓްތަކާއި ކައުންޓަރުތަކުގެ ހިދުމަތްތަކަށް ވެސް މެދުކެނޑުމެއް އައިސްފައިވާ ކަމަށެވެ. އެ މައްސަލަ މިހާރު ތަހުގީގުކުރުމަށް ފުލުހުންނަށް ހުށަހަޅާފައިވާ ކަމަށް ސްޓެލްކޯއިން އެ ބަޔާނުގައި ބުނެ އެވެ.
އަދި އެކަން ހައްލުކުރުމަށްޓަކައި ދައުލަތުގެ ކަމާބެހޭ މުއައްސަސާތަކާއެކު މަޝްވަރާކުރަމުންދާ ކަމަށް ސްޓެލްކޯއިން ބުނެ އެވެ. އަދި އެފަރާތްތަކުގެ އެހީތެރިކަމާއި ލަފަޔާއެކު ވީހާ ވެސް އަވަހަށް މައްސަލަ ހައްލުކުރަން ސްޓެލްކޯއިން މަސައްކަތްކުރަމުންދާ ކަމަށް ވެސް އެ ކުންފުނިން ބުނެ އެވެ.
ސްޓެލްކޯއިން ބުނީ އެ މައްސަލަ ހައްލުކުރުމަށް ކުރެވުނު މަސައްކަތުން ވެސް އަދި އެ މައްސަލަ އެއްކޮށް ހައްލުވެފައިނުވާ ކަމަށެވެ. ނަމަވެސް ކުންފުނީގެ ހެޑް އޮފީހުން ދޭ ހިދުމަތްތަކުގެ ތެރެއިން ފޯމު ހުށަހެޅުމާއި ބިލް ދެއްކުމުގެ ހިދުމަތް އަލުން ފެށިފައިވާކަމަށް ސްޓެލްކޯއިން ބުނެ އެވެ.
ސްޓެލްކޯއިން ބުނީ ރެންސަމްވެއާ ހަމަލާއިން ސަލާމަތްވުމަށް ސްޓެލްކޯއިން ކެނޑިނޭޅި މަސައްކަތްކުރަމުންދާ ކަމަށެވެ. އަދި ކުރިޔަށް އޮތްތަނުގައި ވެސް އެފަދަ ކަމެއް ތަކުރާރުވިޔަ ނުދިނުމަށްޓަކައި އަޅަން ޖެހޭ ހުރިހާ ފިޔަވަޅެއް އެ ކުންފުނިން އަޅަމުންދާ ކަމަށެވެ.
ސްޓެލްކޯއަށް ރެންސަމްވެއާ ހަމަލާއެއް ދިންއިރު، މިދިޔަ އަހަރު ތެރޭ ޕްލޭނިން މިނިސްޓްރީއަށް އަމާޒުކޮށް ވެސް ހަމަ އެފަދަ ހަމަލާއެއް ވަނީ ދީފަ އެވެ. އަދި މީގެ ހަ މަސް ކުރިން ޑިޕާޓްމެންޓް އޮފް ޕަބްލިކް އެގްޒެމިނޭޝަނަށް ވެސް ވަނީ އެފަދަ ހަމަލާއެއް ދީފަ އެވެ. ދެ ހަމަލާގެ ވެސް ފަހަތުގައި ތިބި ފަރާތްތައް އަދި މިހާތަނަށް ހޯދިފައެއް ނުވެ އެވެ.
ރެންސޮމްވެއާ ހަމަލާއަކީ ކޮބާ؟
ރެންސޮމްވެއާ ހަމަލާއަކީ މެލްވެއާގެ ބާވަތެކެވެ. އެ ބާވަތުގެ މެލްވެއާ، ހަމަލާ ދޭ ހެކަރުން ފަރުމާކުރަނީ އިންފެކްޓް ކުރާ ސިސްޓަމެއްގައި ހުންނަ ފައިލްތައް އެންކްރިޕްޓްކޮށް، ސިސްޓަމްގެ ވެރިފަރާތަށް އެ ފައިލްތައް ބޭނުންކުރުން ހުއްޓުވައި، ބޭނުން ކަނޑުވާލާފަދަ ޒާތަކަށެވެ.
ބައެއް ފަހަރު ހެކަރުން އެ ސިސްޓަމުގައި ހުރި މައުލޫމާތު އާއްމުކުރާނޭ ކަމަށް ބުނެ ވެރިފަރާތަށް ބިރު ދައްކަ އެވެ. ހެކަރުން އެންމެ އާއްމުކޮށް ސިސްޓަމްތަކަށް ރެންސޮމްވެއާ އަޅަނީ ވެެރިފަރާތަށް އޮޅުވާލައިގެން ވައިރަސް ޑައުންލޯޑު ކުރުވައިގެންނެވެ. އެ އުކުޅަށް ކިޔައި އުޅެނީ "ފިޝިން" ސްކީމެވެ.
އެހާ ހިސާބުން އެ ހަމަލާދޭ ފަރާތުން ވެރިފަރާތަށް ހުށަހަޅާނީ ފައިސާގެ އަދަދެއް ދައްކައިގެން އެ ފައިލްތައް ޑީކްރިޕްޓް ކުރުން ނުވަތަ ސިސްޓަމްއަށާއި ފައިލްތަކަށް އަލުން އެކްސެސް ވިޔަ ދިނުމުގެ ފުރުސަތެވެ. އެ ފައިސާގެ އަދަދު އަދާކޮށްފިނަމަ، ހެކަރުން ގިނަ ފަހަރަށް ސިސްޓަމުގެ ވެރިފަރާތަށް ފޯރުކޮށްދެނީ ފައިލްތައް އަލުން އަނބުރާ ހޯދައި ހުޅުވުމަށް "ޑިޖިޓަލް ތަޅުދަނޑި" އެކެވެ.
އެގޮތަށް އާއްމު ގޮތެއްގައި ބޭރުގެ ރެންސޮމްވެއާ ހެކަރުން ފައިސާ ނަގަނީ ބިޓްކޮއިން ފަދަ ޑިޖިޓަލް ކަރެންސީ ފައިސާއިންނެވެ. އެއީ އެފަދަ ފައިސާ ޓްރެކް ކޮށްގެން ފައިސާ ނެގި ފަރާތް ހޯދުމަށް ގާނޫނު ތަންފީޒުކުރާ އިދާރާތަކަށް އުނދަގޫވާތީ އެވެ. އެހެން ނަމަވެސް ބައެއް ފަހަރު އެފަދަ ހަމަލާތަކުން "ޔުނިވާސަލް ޑިކްރިޕްޝަން ކީ" އެއް ބޭނުންކޮށްގެން ބައެއް ފަރާތްތަކުން ސަލާމަތްވެފައި އެބަ ހުއްޓެވެ.
ބޭރު ދުނިޔޭގައި މިފަހުން އައިސް ރެންސޮމްވެއާ ހަމަލާތައް ދިނުން ވަނީ އާއްމުވެފަ އެވެ. އެގޮތުން މިދިޔަ މޭ މަސް ތެރޭ އަޔަލޭންޑުގެ ސިއްހީ އިދަރާއަށް ދިން އެފަދަ ހަމަލާއެއްގައި ހެކަރުން ވަނީ 20 މިލިއަން ޑޮލަރުގެ ފައިސާގެ ޕޭމެންޓަކަށް ކިޔައިފަ އެވެ.
