ރާއްޖެއާ އިންޑިއާއާ ދެމެދު ދަތުރުކުރާ އެގައުމުގެ ގޯއެއާގެ ދަތުރުތައް ހުއްޓާލިކަމަށް ދެކެވޭ ވާހަކަތައް ރާއްޖޭގެ ފޮރިން މިނިސްޓްރީން ދޮގުކޮށްފި އެވެ.
ގޯއެއާއިން ރާއްޖެއަށް ކުރާ ދަތުރުތައް، އިންޑިއާގެ އެއާޕޯޓުތަކުން އެ އެއާލައިނަށް ޖާގަ ނުލިބޭތީވެ، ސަސްޕެންޑްކޮށްފައިވާކަމަށް ބުނެ ބައެއް މީޑިއާތަކުގައި މިއަދު ވަނީ ރިޕޯޓުކޮށްފަ އެވެ. ނަމަވެސް ފޮރިން މިނިސްޓްރީން ބުނީ އެ އެއާލައިންގެ ދަތުރުތައް ހުއްޓާލާފައިނުވާ ކަމަށެވެ.
އެ މިނިސްޓްރީން ބުނީ ގޯއެއާއިން މިއަދު ޝެޑިއުލްކޮށްފައިވާ ދަތުރުތައް ކެންސަލް ކުރިކަމަށެވެ. އަދި އެއީ ކޮވިޑުގެ ހާލަތުގައި ރާއްޖެ އާއި އިންޑިއާ ދެމެދު އުފެއްދި ޓްރެވެލް ބަބަލްގެ މުއްދަތު ހަމަވުމުން އާންމު އުސޫލުން ފްލައިޓްތައް އޮޕަރޭޓްކުރަން ފެށުމާއެކު އިންޑިއާގެ ސިވިލް އޭވިއޭޝަނުގެ މުއައްސަސާތަކުގެ އުސޫލުތަކާ އެއްގޮތަށް ދަތުރުތައް ޝެޑިއުލްކުރުމަށް ކުރިކަމެއް ކަމަށް ފޮރިން މިނިސްޓްރީން ބުނެ އެވެ.
ފޮރިން މިނިސްޓްރީން ބުނީ އެ އެއާލައިންގެ ދަތުރުތައް މިއަދަށް ކެންސަލްކުރި ނަމަވެސް އެ އެއާލައިންގެ ދަތުރުތައް އަދިވެސް ޝެޑިއުލްކޮށްގެން ކުރިޔަށްދާނެ ކަމަށެވެ. އެކަމާ ގުޅިގެން އެމްއޭސީއެލް އިން ވެސް ބުނީ ގޯއެއާގެ ތިން ފްލައިޓެއް މިއަދު ކެންސަލް ކުރި ކަމަށެވެ.
ނަމަވެސް، އިތުރު ފްލައިޓްތަކެއް ކެންސަލް ކުރިކަމެއް އަދި އެ ކުންފުންޏަށް އެނގިފައިނުވާ ކަމަށެވެ. އެމްއޭސީއެލްއިން އިތުރަށް ބުނީ ގޯއެއާގެ ފަރާތުން ދަތުރުކުރާ ރޫޓުތައް ބަދަލުކުރާ ކަމުގެ މައުލޫމާތު މިފަހުން އެ ކުންފުންޏަށް ލިބުނު ކަމަށެވެ.
އެގޮތުން، އެ އެއާލައިނުން ކުރިން އޮޕަރޭޓްކުރި ބެންގަލޫރު، ދިއްލީ އަދި މުމްބާއީގެ ރޫޓުތަކުގެ ބަދަލުގައި ކޮޗިން އާއި ކަންނަންނޫރު ރޫޓުތަކުން އެ އެއާލައިނުން އޮޕަރޭޓް ކުރަމުންދާ ކަމަށެވެ.
ގޯއެއާގެ އިތުރުން ވެސް އިންޑިއާއާ ރާއްޖެއާ ދެމެދު އިތުރު ތިން އެއާލައިނެއް އޮޕަރޭޓްކުރެ އެވެ. އެއީ އެއާ އިންޑިއާ، އިންޑިގޯ އަދި ސްޕައިސް ޖެޓް އެވެ.
