އުރީދޫ ދިވެހި ޕްރިމިއާ ލީގުގެ ދެ ވަނަ ބުރުގެ ކުޅުން ފަށާނީ ލީގުގެ އެއް ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނާއި ކްލަބް އީގަލްސް ބައްދަލުކުރާ މެޗުން އަންނަ މަހުގެ ހަތް ވަނަ ދުވަހު ކަމަށް އެފްއޭއެމުން ބުނެފި އެވެ.
އެފްއޭއެމުން މިއަދު އިއުލާނުކުރި ލީގުގެ ދެ ވަނަ ބުރުގެ ޝެޑިއުލްގައިވާގޮތުން މާޒިޔާ އާއި އީގަލްސް ކުޅޭ ދެ ވަަނަ ބުރުގެ ފުރަތަމަ މެޗު އޮންނާނީ އަންނަ މަހުގެ ހަތް ވަނަ ދުވަހުގެރޭގަ އެވެ. ރޯދަ މަހުގައި މެޗުތައް ފަށާނީ 22:00 ގަ އެވެ. ފުރަތަމަ މެޗު ހަފްތާގައި އޮތީ މާޒިޔާ އާއި އީގަލްސް މެޗުގެ އިތުރުން، ކްލަބް ވެލެންސިއާ އާއި ޓީސީ ސްޕޯޓްސް ކްލަބްގެ މެޗާއި ޔުނައިޓެޑް ވިކްޓްރީ އާއި ސުޕަ ޔުނައިޓެޑް ސްޕޯޓްސް (ސަސް)ގެ މެޗު އަދި ކްލަބް ގްރީން ސްޓްރީޓްސް އާއި ދަ ގްރާންޑޭ ސްޕޯޓްސް ކްލަބް ބައްދަލުކުރާ މެޗެވެ.
އެ އަށް ފަހު އޭއެފްސީ ކަޕްގެ ޕްރިލިމިނަރީ ފުރަތަމަ ބުރުގައި ރާއްޖޭގެ ވެލެންސިއާ އިން މާލޭގައި ބޫޓާންގެ ލީގު ޗެމްޕިއަން ޕާރޯ އެފްސީއާ ކުޅޭނީ އޭޕްރީލް 5 ވަނަ ދުވަހުގެރޭގަ އެވެ. އެ މެޗުން ވެލެންސިއާ މޮޅުވެއްޖެނަމަ އޭޕްރީލް 12 ވަނަ ދުވަހު، ޕްރިލިމިނަރީ ދެ ވަަަނަ ބުރުގައި ބަންގްލަދޭޝްގައި، އެ ގައުމުގެ ޑާކާ އަބަހާނީއާ ކުޅެން ޖެހޭނެ އެވެ. ޕްރިލިމިނަރީ ދެ ވަނަ ބުރުން ވެލެންސިއާ މޮޅުވެއްޖެނަމަ ޕްލޭއޮފްގައި ކުޅެން ޖެހޭނީ 19 ވަނަ ދުވަހު އެވެ. ޕްލޭއޮފަށް ވެލެންސިއާ ދަތުރުކޮށްފިނަމަ އަންނަ މަހު 17 ގައި މާޒިޔާއާ ކުޅެން ޖެހޭ މެޗު ފަސްކުރާނެ އެވެ.
ލީގުގެ ފުރަތަމަ ބުރު ނިމުނުއިރު، މާޒިޔާ އޮތީ ސައްތަ އިން ސައްތަ ރެކޯޑަކާ އެކު ހަތް މެޗުން ވެސް މޮޅުވެ އެއް ވަނައިގައި 21 ޕޮއިންޓް ހޯދައިގެންނެވެ. ދެ ވަނައިގައި އޮތް އީގަލްސް އަށް ވަނީ 16 ޕޮއިންޓް ލިބިފަ އެވެ. ތިން ވަނައިގައި އޮތީ 12 ޕޮއިންޓާ އެކު ވެލެންސިއާ އެވެ. ހަތަރެއްގައި 10 ޕޮއިންޓާ އެކު ޓީސީ އޮތްއިރު، ފަސް ވަނައިގައި ޔުނައިޓެޑް ވިކްޓްރީ އޮތީ ނުވަ ޕޮއިންޓް ހޯދައިގެންނެވެ. ހަ ވަނައިގައި އޮތް ސަސް އަށް ވަނީ ހަތް ޕޮއިންޓް ލިބިފަ އެވެ. ހަތް ވަނައިގައި އޮތް ގްރީން ސްޓްރީޓްސްގެ އޮތީ ހަތަރު ޕޮއިންޓެވެ. ފުލުގައި އޮތީ އަދި މި ސީޒަނުގައި މޮޅެއް ނުލިބި އޮތް ދަ ގްރާންޑޭ ސްޕޯޓްސް ކްލަބް އެވެ.
ލީގުގެ ދެ ވަނަ ބުރުގައި ދެ ބްރޭކެއް
ލީގުގެ ދެ ވަނަ ބުރު ކުރިއަށްދާއިރު، ދެ ބްރޭކެއް ނަގަން ވަނީ ޝެޑިއުލްގައި ހިމަަނައިފަ އެވެ. ފުރަތަމަ ބްރޭކަކީ އޭޕްރީލް 25 އިން މެއި 5 އަށް ނަގާ ބްރޭކެކެވެ. މި ބްރޭކަކީ ރޯދަ މަހުގެ ފަހު 10ގެ ދުވަސްތަކުގެ ތެރެއަށް މެޗުތަކެއް ލައިފިނަމަ ޝެޑިއުލަށް އިތުރު ބަދަލެއް ގެންނަން ޖެހިދާނެތީ ނަގާފައިވާ ބްރޭކެކެވެ.
ދެން ހިމަނާފައިވާ ބްރޭކަކީ މެއި 12 އިން ޖޫން 20 ވަނަ ދުވަހަށް ނަގާ ބްރޭކެކެވެ. މިއީ މެއި މަހު އިންޑިއާގެ ކަލްކަތާގައި ކުރިއަށްދާ އޭއެފްސީ ކަޕް ދެކުނު އޭޝިއާގެ ގްރޫޕްގެ މެޗުތަކާއި ޖޫން މަހު އުޒްބެކިސްތާންގައި ކުރިއަށްދާ އޭޝިއަން ކަޕް ކޮލިފައިން ގްރޫޕް ސްޓޭޖުގެ މެޗުތަކަށް ނަގާފައިވާ ބްރޭކެކެވެ.
އޭއެފްސީ ކަޕްގެ ދެކުނު އޭޝިއާ ގްރޫޕްގައި މި ވަގުތު އޮތް ރާއްޖޭގެ ޓީމަކީ މާޒިޔާ އެވެ. ދެން މި ގްރޫޕްގައި އޮތީ އިންޑިއާގެ ގޮކުލަމް ކެރަލާ އާއި ބަންގްލަދޭޝްގެ ބަޝުންދަރާ ކިންގްސް އެވެ. ދެން މި ގްރޫޕްގެ ބާކީ އޮތް ޖާގަ ލިބޭނީ ކޮލިފައިން ބުުރުން އަންނަ ޓީމަކަށެވެ. ކޮލިފައިން ބުރުގައި ރާއްޖޭގެ ވެލެންސިއާ، ބަންގްލަދޭޝްގެ އަބަހާނީ އަދި އިންޑިއާގެ އޭޓީކޭ މޯހަން ބަގާން ވާދަކުރެ އެވެ.
ޖޫން މަހު އޮތް އޭޝިއަން ކަޕް ކޮލިފައިން ގްރޫޕް ސްޓޭޖުގައި ރާއްޖެ ވާދަކުރާނީ ހޯސްޓް، އުޒްބެކިސްތާންގެ އިތުރުން ތައިލެންޑާއި ސްރީ ލަންކާއާ އެެވެ.
