ރާއްޖޭގައި ފިތުރު ޒަކާތް ހައްގުވާ ފަގީރުންގެ ދަފްތަރު އިސްލާމިކް މިނިސްޓްރީން އެކުލަވާލައިފި އެވެ.
އިސްލާމިކް މިނިސްޓްރީން މިއަދު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު ޑރ. އަހުމަދު ޒާހިރު އަލީ ވިދާޅުވީ، ފަގީރުންގެ ދަފްތަރު އެކުލަވާލައި ނިމުނުއިރު، ރާއްޖޭގައި 9،041 މީހަކު ފަގީރުންގެ ގޮތުގައި ރެޖިސްޓްރީކޮށްފައިވާ ކަމަށެވެ.
މިނިސްޓަރު ވިދާޅުވީ އޭގެ ތެރެއިން 7،245 މީހުންނަކީ އަތޮޅުތެރެއިން ރެޖިސްޓްރީކުރި މީހުން ކަމަށެވެ. އަދި 1،796 މީހުންނަކީ މާލެ ސަރަހައްދުން ރެޖިސްޓްރީ ކުރި މީހުންކަމަށް މިނިސްޓަރު ވިދާޅުވި އެވެ. އޭގެ އިތުރުން ވެސް މި އަހަރު ރާއްޖޭގައި 42 ރަށަކުން އެއްވެސް މީހަކު ފަގީރެއްގެ ގޮތުގައި ރެޖިސްޓްރީކޮށްފައިނުވާކަމަށް މިނިސްޓަރު ވިދާޅުވި އެވެ.
"1443 ވަނަ އަހަރު އެއްވެސް ފަގީރަކު ނެތް ކަމަށް އަޅުގަނޑުމެންނަށް ފަހަގަކުރެވިފަ އެބަހުރި 42 ރަށެއްގަ،" މިނިސްޓަރު ޒާހިރު ވިދާޅުވި އެވެ.
މިދިޔަ އަހަރު ފަގީރެއްގެ ގޮތުގައި އެއްވެސް މީހަކު ރެޖިސްޓްރީ ނުކުރާ 45 ރަށެއް އޮތެވެ. މިއަހަރު ފިތުރު ޒަކާތުގެ ނިސާބު ވެސް މިނިސްޓަރު މިއަދު އިއުލާންކުރެއްވި އެވެ.
titledesc
މިނިސްޓަރު ވިދާޅުވީ މި އަހަރުގެ ފިތުރު ޒަކާތް ބަލައިގަތުމަށް އިސްލާމިކް މިނިސްޓްރީގެ ހޯލު ތައްޔާރުކުރަން މަސައްކަތްކުރަމުންދާ ކަމަށެވެ. އަދި އޮންލައިން އެޕްލިކޭޝަންތައް މެދުވެރިކޮށްގެން މި އަހަރު ވެސް ފިތުރު ޒަކާތް ދެއްކޭނެ ކަމަށް މިނިސްޓަރު ވިދާޅުވި އެވެ.
"ފިތުރު ޒަކާތް ބަލައިގަތުމަށްޓަކައި އިސްލާމީ މަރުކަޒުގެ ހޯލު ތައްޔާރުކުރެވޭނެ. އިސްލާމީ މަރުކަޒުގެ ހޯލުން ފިތުރު ޒަކާތް ބަލައިގަތުމަށްޓަކައި މި ރާވަނީ ރަމަޝާން މަހުގެ ދެވަނަ ދުވަހުން ފެށިގެން،" ޒާހިރު ވިދާޅުވި އެވެ.
ފިތުރު ޒަކާތް ގޮވާމުން ބަލައިގަތުމަށް ހަމަޖެހިފައިވަނީ ރަމަޝާން މަހުގެ ފަހު ދިހައިން ފެށިގެން ކަމަށް މިނިސްޓަރު ވިދާޅުވި އެވެ. ހަމައެއާއެކު މި އަހަރު ފިތުރު ޒަކާތް ހުރިހާ ރަށަކުން ވެސް ނަގަން ހަމަޖެހިފައިވަނީ އެއް ރޭޓަކުންކަމަށް އޭނާ ފާހަގަކުރެއްވި އެވެ.
އެހެން އަހަރުތަކާއި ކުޑަކޮށް ތަފާތުކޮށް، މިފަހަރު ފިތުރު ޒަކާތް ދައްކާ މީހާއަށް އެމީހަކު ބޭނުންވާ ރަށަކަށް ފިތުރު ޒަކާތް ދެއްކޭނެ އިންތިޒާމުތަކެއް ވެސް ރާވަމުންދާކަމަށް މިނިސްޓަރު ހާމަކުރެއްވި އެވެ.
"މިސާލަކަށް ވަކި ރަށެއްގެ ބޭފުޅަކު މާލޭގަ ހުންނަވާފަ އެބޭފުޅަކު ބޭނުންވަނީ އެބޭފުޅެއްގެ ރަށަށް ފިތުރު ޒަކާތް ދައްކަން، އެހެންވެއްޖިއްޔާ އެ ރަށެއް އިހްތިޔާރުކުރެވޭ ގޮތަށް އަޅުގަނޑުމެން މި އިންތިޒާމު ހަމަޖައްސަނީ،" ޒާހިރު ވިދާޅުވި އެވެ.
