ރަސްމީކޮށް ނުހުޅުވި ނަމަވެސް އަންނަ ހުކުރު ދުވަހުން ފެށިގެން ކިންގް ސަލްމާން މިސްކިތުގައި ނަމާދު ކުރުމަށް ހުޅުވާލާނެ ކަމަށް އިސްލާމިކް މިނިސްޓްރީން ބުނެފި އެވެ.
ކުރީގެ ސަރުކާރުގައި އާޓިފިޝަލް ބީޗާ ޖެހިގެން އޮތް ބިމުގައި އަޅަން ފެށި މިސްކިތް ނުހުޅުވި ލަސްވެފައިވާތީ ފާޑުކިއުން ވަނީ އަމާޒުވެފަ އެވެ. މިދިޔަ އަހަރު ރޯދައަށް ވަގުތީ ގޮތުން މިސްކިތް ހުޅުވަން ނިންމި ނަމަވެސް, ކޮވިޑްގެ ހާލަތު މާލޭގައި ގޯސްވެ މިސްކިތް ހުޅުވާފައެއް ނުވެ އެވެ.
މިހާރު ކުރިއަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އިސްލާމިކް މިނިސްޓަރު ޑރ. އަހުމަދު ޒާހިރު ވިދާޅުވީ ސަލްމާން މިސްކިތް ރަސްމީކޮށް ހުޅުވާނެ ތާރީހެއް ފަހުން ކަނޑައަޅާނެ ކަމަށެވެ. އަދި އަންނަ ހުކުރު ދުވަހުން ފެށިގެން އެ މިސްކިތުގައި ނަމާދު ކުރަން ފަށާނެ ކަމަށް މިނިސްޓަރު ވިދާޅުވި އެވެ.
މީގެ އިތުރުން އެ ބައްދަލިވުމުގައި ވަނީ މި ރޯދަމަހު އަލަށް ހުޅުވާ މިސްކިތްތަކެއް އިއުލާން ކޮށްފަ އެވެ. އެއީ ޒަކާތު ފަންޑުގެ ދަށުން ލ މަތިމަރަދޫގައި އަޅާ މިސްކިތަކާއި ހުޅުމާލޭ ދެވަނަ ފޭސްގައި އަޅާ ވަގުތީ މިސްކިތެކެވެ.
މިސްކިތް ހުޅުވުމާ ބެހޭ ގޮތުން ސަރުކާރުން ވަނީ މީގެ ކުރިން ސައުދީން ރާއްޖެ ވަޑައިގެންނެވި ވަފުދަކާ މަޝްވަރާ ވެސް ކޮށްފަ އެވެ. އަދި މިސްކިތް ހުޅުވުމަށް ދެ މިލިއަން ޑޮލަރު ސައުދީން ދޭނެ ކަމަށް ރާއްޖޭގެ ފޮރިން މިނިސްޓްރީން ބުނެފައިވާ ކަމަށް ވެސް މިނިސްޓްރީން މީގެ ކުރިން ބުނެފައިވެ އެވެ.
ކިންގް ސަލްމާން މިސްކިތަކީ ސައޫދީ ރަސްގެފާނުގެ އެހީގައި އިމާރާތްކޮށްފައިވާ މިސްކިތެކެވެ.
އެ މިސްކިތުގެ މަސައްކަތް ކުރަން ހަވާލުކުރީ ތުރުކީގެ ޓާމެކްސް ކުންފުންޏާ އެވެ. އެ ކުންފުންޏާއެކު ކުރީގެ ސަރުކާރުން އެއްބަސްވުމުގައި ސޮއިކުރީ ފެބްރުއަރީ 28، 2017ގަ އެވެ.
އެ މިސްކިތުގައި އަރާފޭބުމަށް ލިފުޓު ހަރުކޮށްފައިވާއިރު އެއްފަހަރާ 10،000 މީހުންނަށް ނަމާދުކުރެވޭނެ އެވެ. ލައިބްރަރީއަކާއި ކްލާސްރޫމްތަކުގެ އިތުރުން ސެމިނާ ރޫމްތައް ވެސް މި މިސްކިތުގައި ހުންނާނެ އެވެ.
