ފުވައްމުލަކާއި ސ. ހިތަދޫގައި 400 ހައުސިން ޔުނިޓު އިމާރާތް ކުރަން ބިޑް ހުށަހެޅުމަށް ފައިނޭންސް މިނިސްޓްރީން އިއްޔެ އިއުލާނުކޮށްފި އެވެ.
އެ މިނިސްޓްރީން ގެޒެޓު ކުރި ތަފާތު ދެ އިއުލާނެއްގައި ބުނެފައި ވަނީ ހިތަދޫ އާއި ފުވައްމުލަކުގައި އަޅާނީ ކޮންމެ ރަށެއްގައި 200 ހައުސިން ޔުނިޓު ކަމަށެވެ.
އެ ޕްރޮޖެކްޓުތަކަށް ކުރިމަތިލާ ފަރާތްތަކުން ރަޖިސްޓްރީވުމަށް 500ރ. ހުށަހެޅުމަށްފަހު ބިޑް ސެކިއުރިޓީއެއްގެ ގޮތުން އެއް 1،020،000ރ. ހުށަހަޅަންޖެހެ އެވެ.
ހައުސިން ޔުނިޓު އެޅުމަށް އިއުލާނުކުރިއިރު ފުވައްމުލަކާއި އައްޑުއަށް ކުރާ ދަތުރުފުޅެއްގައި ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިިއަދު ވެރި ރަށް މާލެއިން ފުރާވަޑައިގަންނަވާނެ އެވެ.
އައްޑޫގައި މިހާރު ވެސް ސަރުކާރުން އަޅާފައި ހުރި ފްލެޓުތަކެއް އެބަހުއްޓެވެ. ހިތަދޫގައި 264 ފްލެޓް އިމާރާތްކޮށް މީހުންނަށް ތަން ހަވާލު ކުރީ 2020 ވަނަ އަހަރެވެ. އެފަހަރު ހުޅުދޫގައި ވެސް 48 ފްލެޓު އެޅި އެވެ.
ފުވައްމުލަކުން އެންމެ ފަހުން ގޯތި ދޫކޮށްފައި ވަނީ 2006 ވަނަ އަހަރެވެ. ބޯހިޔާވަހިކަމުގެ ދަތިކަން އެރަށުގައި ވަރަށް ބޮޑަށް ކުރިމަތިވެފައިވާއިރު އެ ރަށު ކައުންސިލުގެ ރައީސް އަބްދުﷲ ނާސިރު މިދިޔަ އަހަރު ވިދާޅުވެފައި ވަނީ ރަށުގައި 500 ހައުސިން ޔުނިޓު އެޅުމަކީ އަމާޒެއް ކަމަށެވެ.
