ވެރިކަން ކުރާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ޗެއާޕާސަން ކަމަށް ވާދަކުރައްވާ އިކޮނޮމިކް މިނިސްޓަރު ފައްޔާޒް އިސްމާާއިލް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ ޕާޓީން ވަކިކުރަން މަސައްކަތް ކުރައްވާ ކަމަށް ނަޝީދުގެ ސަޕޯޓަރުން ކުރާ ތުހުމަތުތައް ދޮގުކުރެއްވީ އިއްޔެ އެވެ.

ޗެއާޕާސަންގެ އިންތިހާބުގެ ކެމްޕޭނަށް ރަށްރަށަށް ކުރައްވާ ދަތުރުތަކުގެ ތެރެއިން ބ. އަތޮޅަށް ކުރެއްވި ދަތުރު ނިންމަވާލެއްވުމަށްފަހު އިއްޔެ މާލެ ވަޑައިގެން ފައްޔާޒް ވަނީ އެއް ނަންބަރު ފާލަން ކައިރީގައި ނޫސްވެރިންނާ ބައްދަލުކުރައްވައިފަ އެވެ.

އެ ބައްދަލުވުމުގައި ނަޝީދު އެމްޑީޕީން ބޭރުކުރުމަށް ފައްޔާޒް އަދި އޭނާގެ ސަޕޯޓަރުން މަސައްކަތްކުރާކަމަށް ބުނެ ދެކެވޭ ވާހަކަތަކާއި ގުޅޭގޮތުން "އަދަދު" ނޫހުން ކުރި ސުވާލަކަށް ޖަވާބުދެއްވަމުން ފައްޔާޒު އިއްޔެ ވިދާޅުވީ ރައީސް ނަޝީދު އެމްޑީޕީން ވަކިކުރެވޭނެ މީހެއް އަދި މި ރާއްޖެއަކު ނެތް ކަމަށެވެ.

"ތިއީ ވަރަށް ބޮޑަށް ދެކެވޭ ވާހަކައެއް. އަޅުގަނޑުމެން މިގެންދަނީ ވަރަށް ޕޮޒިޓިވް ކެމްޕޭނެއް، މި ޕާޓީ ހިންގާލަން. އަދިއެއް މި ރާއްޖެއަކު ރައީސް ނަޝީދު އެމްޑީޕީން ބޭރުކުރެވޭނެ ވަރުގެ އެއްވެސް މީހަކު ނެތް. އެކަން އެމްޑިޕީގެ މެމްބަރުންނަށް ސާފުވާނެ. އަޅުގަނޑުމެން މިއުޅެނީ މި ޕާޓީ ހިންގާލަންވެގެން. އަޅުގަނޑުމެން މި ޕާޓީ ހިންގާނީ ރައީސް ނަޝީދާ ވެސް އެއްކޮށް ހަމަ،" ފައްޔާޒު އިއްޔެ ވިދާޅުވި އެވެ.

އޭނާ އިތުރަށް ވިދާޅުވީ ޗެެއާޕާސަންގެ އިންތިހާބު އޭނާ ކާމިޔާބު ކުރެއްވިޔަސް، ނަޝީދު އެމްޑީޕީން ވަކިކުރުމަކީ އޭނާ އަށް ކުރެވޭނެ ކަމެއް ނޫން ކަމަށެވެ. އަދި، އެކަން ކުރެވޭނީ އެމްޑީޕީގެ ފިޔަވަޅު އަޅާ ކޮމިޓީއަށް ކަމަށް ފައްޔާޒު އިއްޔެ ވިދާޅުވި އެވެ.

ޗެެއާޕާސަންގެ އިންތިހާބާއެކު ރައީސް ނަޝީދަށް ތާއިދު ކުރައްވާ ބޭފުޅުންނާއި އެމްޑީޕީގެ އެންމެ އިސް ލީޑަރު ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހަށް ތާއިދު ކުރައްވާ ބޭފުޅުންގެ މެދުގައި ފެކްޝަން އުފެދި އެ ފެކްޝަންތަކުގެ ކޯޅުން ވެސް ވަނީ ބޮޑުވެފަ އެވެ.

އެފަދަ ހިޔާލު ތަފާތުވުންތަކާއި ގުޅޭގޮތުން މި ނޫހުން ކުރި ސުވާލަކަށް ޖަވާބު ދެއްވަމުން ފައްޔާޒު އިއްޔެ ވިދާޅުވީ ޗެއާޕާސަން ކަމުގެ އިންތިހާބަކީ ޕާޓީގެ އެހެން އެއްވެސް ކަމަކާއި ގުޅިފައިވާ އިންތިހާބެއް ނޫން ކަމަށެވެ.

"އެކަހަލަ އެއްވެސް ކަމެއް ނޫން. މިއުޅެނީ ހަމަ ޕާޓީގެ ޗެއާޕާސަންގެ އިންތިހާބު. މި ޕާޓީގެ ވެސް އުޅޭނެ ދެން އެކި އެކި ވިސްނުންތައް. އޭގެ ތެރެއިން ހަމަ މި ޕާޓީ ހިންގާލުމަށްޓަކައި ވަރުގަދަ ފޯރިގަދަ ކެމްޕޭނެއް އަޅުގަނޑުމެން މި ގެންދަނީ. އަޅުގަނޑު މި ވާދަކުރަނީ ޗެއާޕާސަންކަމަށް،"

"ދެން އިންތިއަކީ ހަމަ ވަރަށް ވަރުގަދަ ކެންޑިޑޭޓެއް. މި ފޯރި އަޅުގަނޑުމެން ބޭނުންވަނީ ރާއްޖޭގެ ހުރިހާ ސިޔާސީ ޕާޓީއެއްގައި ވެސް އޮންނަން،" ފައްޔާޒް އިއްޔެ ވިދާޅުވި އެވެ.

ޕާޓީގެ އިތުރު އެހެން ވިސްނުންތައް ވެސް ހުންނައިރު، ފައްޔާޒު އާއި އޭނާގެ ސަޕޯޓަރުންގެ ވިސްނުން ހުރީ ޕާޓީ ހިންގާލުމަށް ކަމަށް ފައްޔާޒް އަނެއްކާ ވެސް ވިދާޅުވި އެވެ.

ފައްޔާޒު އަންނަނީ ރާއްޖޭގެ އެކި ރަށްތަކަށް ދަތުރުކޮށް އެ ރަށްތަކުގައި ދިރިއުޅޭ އެމްޑީޕީ މެމްބަރުންގެ ތާއީދު ހޯދުމަށް ކެމްޕޭން ދަތުރުތައް ކުރައްވަމުންނެވެ. އަދި، އޭނާގެ އިދިކޮޅަށް ނުކުންނަވާ އިމްތިޔާޒު ފަހުމީ ވެސް ގެންދަވަނީ ބުރަކޮށް ކެމްޕޭން ކުރައްވަމުންނެވެ.

ބައެއް މުހިންމު ހަބަރުތައް

• ކުރިއަށް އޮތް ރޯދަ މަހަށް ހާއްސަކޮށް "ރޯދަ އަދަދު" ގެ ނަމުގައި "އަދަދު" ނޫހުން ހާއްސަ މެގަޒިނެއް ނެރުނީ އިއްޔެ އެވެ.

• ރާއްޖޭގައި ބާއްވާ އެންމެ ފުރަތަމަ ބާ އިމްތިހާނުގައި ބައިވެރިވާ ކޮންމެ ދަރިވަރެއްގެ އަތުން 10،000ރ. ގެ ފީއެއް ނެގުމަށް މޯލްޑިވްސް ބާ ކައުންސިލުން ކަނޑައެޅިކަން ރިޕޯޓުކުރީ އިއްޔެ އެވެ.

• ވަޒީފާއާބެހޭ ގާނޫނުގައި ބަޔާންކޮށްފައިވާ ގޮތުގެ މަތިން ރޯދަ މަހު ދޭންޖެހޭ ހާއްސަ އިނާޔަތް ދިނުމަށް ލޭބާ ރިލޭޝަންސް އޮތޯރިޓީ (އެލްއާރުއޭ) އިން ގޮވާލީ އިއްޔެ އެވެ.

ދުވަހުގެ ކޯޓޭޝަން

ރައީސް މުހައްމަދު ނަޝީދު އެމްޑީޕީން ވަކިކުރަން މަސައްކަތް ކުރައްވާ ކަމަށް ނަޝީދުގެ ސަޕޯޓަރުން ކުރާ ތުހުމަތުތައް ދޮގުކުރައްވަމުން އިކޮނޮމިކް މިނިސްޓަރު ފައްޔާޒު އިއްޔެ ވިދާޅުވީ:

"މި ރާއްޖެއަކު ރައީސް ނަޝީދު އެމްޑީޕީން ބޭރުކުރެވޭނެ ވަރުގެ އެއްވެސް މީހަކު ނެތް. އެކަން އެމްޑިޕީގެ މެމްބަރުންނަށް ސާފުވާނެ. އަޅުގަނޑުމެން މިއުޅެނީ މި ޕާޓީ ހިންގާލަންވެގެން. އަޅުގަނޑުމެން މި ޕާޓީ ހިންގާނީ ރައީސް ނަޝީދާ ވެސް އެއްކޮށް ހަމަ،"

ދުވަހުގެ ފޮޓޯ

ރާއްޖެ އާއި ބަންގަލަދޭޝް ބައްދަލުކުރި އެކުވެރި ކަމުގެ މެޗުގައި ރާއްޖޭގެ ފުރަތަމަ ލަނޑު ކްލަބް އީގަލްސްގެ ފޯވާޑް ހަސަން ރާއިފް އަހުމަދު (ހަންނަ) ކާމިޔާބު ކޮށްދެނީ. މިއީ އޭނާ ގައުމީ ޓީމަށް ޖަހައިދިން ފުރަތަމަ ލަނޑު. މި މެޗު ރާއްޖެ އިން ކާމިޔާބުކުރީ 2-0 އިން. -- ފޮޓޯ: އަބްދުﷲ އިޔާން/އަދަދު

ދިރާސާތަކުން ކިޔާލުމަށް

"ކުޑަކުދިން ނިންދަވާން ދިވެހިން ކިޔާ އުޅުނު ނާނާތަކާއި ދިވެހިންގެ ސަޤާފަތް"

މި ދިރާސާއަކ ދިވެހިން ކުޑަކުދިން ނިންދަވަން ކިޔާ އުޅުނު ނާނަތަކުން ދިވެހިންގެ ސަގާފަތް ދައްކުވައިދޭތޯ ބެލުމަށް ގައުމީ ޔުނިވާސިޓީގެ ދިވެހިބަހުގެ ޑިގްރީ ކޯހުގެ ދަރިވަރަކު 2016 ވަނަ އަހަރު ކޮށްފައިވާ ދިރާސާއެކެވެ. މި ދިރާސާއިން ދިވެހިން ނާނަ ކިޔާ އުޅުނު ބޭނުމާއި، ސަގާފަތާއި ގުޅޭ ކަންކަން ވަނީ ހާމަވެފަ އެވެ.