އެކްޝަން ފިލްމު ތަކުން މޭމަތި އުޑަށް ދިއްކޮށްގެން އަވި އައިނު ހޫރަމުން، ކުރިމައްޗަށް ވެއްޓޭ ހޮޅި، ދަގަނޑު މަތިން "އުނދުހެމުން" ރޭސް ޖަހާފައި ގޮސް ކުށްވެރިޔާ ހިފައި ހައްޔަރުކުރާ ޔުނިފޯމު އެޅި ފުލުހުން ދެކެމެވެ. އެހީ ހިޔާލީ ދުނިޔެއިން ޕްރޮޑިއުސަރުން ނެރެ ދައްކާ ހަގީގަތެއް ނެތް މަންޒަރެއްކަން ވެސް އެނގެ އެވެ. އެކަމަކު އަސްލު ދިރިއުޅުމުގައި ވެސް އެކަހަލަ "ހީރޯ" ފުލުހުން އުޅޭނަމައޭ އަބަދު ހިތަށް އަރައެވެ.
ސުވާލަކީ، އެފަދަ މަންޒަރެއްގައި ދައްކާ އިސްޓައިލުގައި ދިވެހި ޔުނިފޯމު އެޅި ފުލުހަކު ހަގީގަތަށް ފެނިއްޖެ ނަމަ ވަކިކުރަން އެނގޭނެ ހެއްޔެވެ؟ ނުވަތަ ވަކި ކުރާނީ ކިހިނެއް ހެއްޔެވެ؟
މިއަދަކީ މި ސުވާލެއްގެ ޖަވާބު ހޯދަން ހަމަ އެންމެ މުނާސަބު ދުވަހެކެވެ. އިހަށް ތުން އޫ ކޮށްފައި މި ހަބަރު "ލައްޕާލު"މުގެ ކުރިން، މި ދަމާ ހާސަރެއްގެ ހަގީގީ މަންޒަރު މިއަށްވުރެ ވެސް ތިލަކޮށް ދޭނަމެވެ.
މިއަދު މެންދުރެއް ހާއިރު ސޯޝަލް މީޑިއާގައި ދައުރުވާ ވީޑިއޯއެކެވެ. ފެންނަނީ، ދިވެހި ޔުނިފޯމުގައި ހުރި މެދު އުމުރުގެ ފިރިހެނެކެވެ. ސްޕީޑު ބާރުކުރަމުން ލައިގަންނަ މީހުންގެ ކިބައިން ރެކެމުން އޭނާ ދުވަނީ، އެއަށްވުރެ ބާރު ސްޕީޑުގައި ކުރިމަތީގައި ހުރެ ދުވަމުން ދިޔަ އިސްކޮޅުން ދިގު، ހިކި، ޒުވާން ފިރިހެނެއްގެ ފަހަތުންނެވެ. އޭނާ އަތުލައިގަނެ ހައްޔަރުކުރުމަށެވެ. އެ ދާ ގޮތަށް ދެމީހުން ވަންނަނީ އުސްކޮށް އިމާރާތްކޮށްފައި ހުރި މާލޭގެ ގެއެއްގެ ތެރެއަށެވެ.
މިހައި ހިސާބުން ވެސް މި ރޭސް "މޯޅިއެއް" ނުވެ އެވެ. ފަހަރަކު ސިޑިއެއް ފަހަތަށް ލަމުން މާނޭވާ ލަމުން، އިރުކޮޅަކާ މަޑު ވެސް ޖެހެމުން ގޮސް، ސިޑީގެ ވަކި ހިސާބަކަށް އެރުނު ތަނާ، ފުލުސް މީހާއަށް އޭނާގެ "ކުށްވެރިޔާ" އަތުލައިގަނެވެ އެވެ. އެއާއެކު، އަނެއްކާ ވެސް ވެފައި ހުރި ވަރުބެއްޔެއް "ފޮޅާލާފައި" ނިކަން ހުށިޔާރުކަމާ އެކު ހިފައިގަނެފައި "ކުށްވެރިޔާ" ގެ ދެއަތް ފުރަގަހަށް ލައި ބިޑި އަޅުވައިގެން ގެންދެ އެވެ.
މި ވީޑިއޯ ދައުރުވާން ފެށުމުން އެއް ބަޔަކަށް ހީވީ އެއީ ކުޅެފައިވާ "ފޭކު" މަންޒަރެކޭ އެވެ. އަނެއް ބަޔަކު، ވަކި ގޮތެއް ނުނިންމައި (ހަގީގަތް ގަބޫލުކުރަން ދަތިވެފައި) ތިބެ ކޮށްލީ ކޮންމެވެސް މަޖާ ކޮމެންޓެކެވެ. ގިނަ ބަޔަކު ކުރީ އެންމެން ވެސް ޖަވާބު އެނގެން ބޭނުންވި ސުވާލެވެ.
މިއީ އަސްލު މަންޒަރެއް ހެއްޔެވެ؟
މި ޖަވާބެއް ހޯދަން ދިވެހި ފުލުހުންނަށް ގުޅުމުން ކަން ވީގޮތް ކިޔައިދިނެވެ.
ދައުރުވަމުން ދާ ވީޑިއޯގައި ފެންނަނީ އިއްޔެ ހިނގި ކަމެއްގެ ކަން ހިނގައިދިޔަ "އަސްލު" މަންޒަރެވެ. ވީގޮތަކީ، އިއްޔެ މެންދުރު 12:30 ހާއިރު ފުލުހުން ޗާންދަނީ މަގުގައި ޕެޓްރޯލް ކުރަމުން ދިޔައިރު، ވަގަށް ނަގާފައިވާ ކަމަށް ޝައްކުކުރެވޭ ފޮށިގަނޑެއް ހިފައިގެން އުޅުނު ދިވެހި ފިރިހެނަކު ފެނިގެން އޭނަ ގާތުގައި މަޑުކުރަން ބުނުމުން، މަޑު ނުކޮށް ދުއްވައިގަތުމުން އޭނާ ހިފަހައްޓަން ދިވެހި ފުލުހަކު މަސައްކަތް ކުރީ އެވެ. އަދި އަތުލައިގަނެގެން އެމީހާ ގެންގޮސް މިހާރު އެ މައްސަލަ ތަހުގީގުކުރަން ވެސް ފަށައިފި އެވެ.
ކޮންމެއަކަސް، ވީޑިއޯ އިން ފެންނަ ފުލުހުންގެ މީހާ ދެއްކި ހުށިޔާރު ކަމަކީ އޭނާގެ އަސްލު ހިތްވަރެވެ. ތައުރީފު ހައްގު ހިތްވަރެވެ.
