އެފްބީއައިގެ ޑިރެކްޓަރު ކާޝް ޕަޓޭލް، އޭނާގެ ލޯބިވެރިޔާ އަދި ކަންޓްރީ މިއުޒިކް ކިޔުންތެރިޔާ އެލެކްސިސް ވިލްކިންސްއާ އެންގޭޖްވެފައިވާކަން އާދީއްތަ ދުވަހުގެ ރޭ އެކްސްގައި ކުރި ޕޯސްޓެއްގައި އެ ދެމީހުން އިއުލާނުކޮށްފި އެވެ.
އުމުރުން 27 އަހަރުގެ ވިލްކިންސް އާންމުކުރި ކަޅާއި ހުދު ފޮޓޯއެއްގައި ފެންނަނީ، 46 އަހަރުގެ ޕަޓޭލްއާ އެކު ހުއްޓިލައިގެން ހުރެ އޭނާގެ އެންގޭޖްމަންޓް އަނގޮޓި ދައްކާލަނިކޮށެވެ. 2025 ވަނަ އަހަރު ޕަޓޭލް އެފްބީއައިގެ އިސްވެރިޔާގެ މަގާމާ ހަވާލުވުމުގެ ކުރިން ވެސް މި ދެމީހުން ލޯބީގެ ގޮތުން ގުޅިގެން އުޅޭއިރު، ޕަޓޭލް މަގާމުގެ ހުވާކުރުމުގެ ރަސްމިއްޔާތުގައި ވެސް ވިލްކިންސް ބައިވެރިވެފައިވެ އެވެ.
ކަންޓްރީ މިއުޒިކް ކިޔުންތެރިއެއްގެ އިތުރުން ސިޔާސީ އެނެލިސްޓެއްގެ ގޮތުގައި މަސައްކަތްކުރާ ވިލްކިންސްގެ ފުރަތަމަ އަލްބަމް ނެރެފައިވަނީ 2023 ވަނަ އަހަރު އެވެ. ކޮންޒަވޭޓިވް ގްރޫޕްތަކާ ގާތް ގުޅުމެއް ބާއްވާ ވިލްކިންސްގެ ވެބްސައިޓުގައި ބުނެފައިވަނީ، އޭނާގެ މަސައްކަތަކީ ކަންޓްރީ މިއުޒިކްގެ އާދަކާދަތަކަށް އިހުތިރާމްކުރުމާއެކު، މިހާރުގެ ހާލަތްތަކާ ގުޅޭ ކަންކަމަށް ފާޑުކިޔައި މިއުޒިކްގެ ތެރެއިން އެކަންކަން ހުށަހަޅައިދިނުން ކަމަށެވެ.
ވިލްކިންސްގެ ފޮޓޯ ރީޕޯސްޓްކުރި ޕަޓޭލްއަށް ވަނީ ސަރުކާރުގެ މަތިންދާބޯޓުތައް ރަސްމީ ބޭނުމެއް ނެތް ދަތުރުތަކުގައި ބޭނުންކުރާ ކަމަށް ބުނެ ބޮޑެތި ފާޑުކިޔުންތަކެއް އަމާޒުވެފަ އެވެ. އޭގެ ތެރޭގައި ޕެންސިލްވޭނިއާގެ ސްޓޭޓް ކޮލެޖުގައި ބޭއްވި ޕްރޯ ރެސްލިން އިވެންޓަކަށް އެފްބީއައިގެ ޖެޓެއްގައި ދަތުރުކުރުން ހިމެނެ އެވެ. އެ އިވެންޓުގައި ވިލްކިންސް ވަނީ އެމެރިކާގެ ގައުމީ ސަލާމް ކިޔައިދީފަ އެވެ. އެ ހަރަކާތަށް ފަހު ވިލްކިންސް ސޯޝަލް މީޑިއާގައި އާންމުކުރި ފޮޓޯތަކުން ފެންނަނީ، ރަން ކުލައިގެ ބޮޑު ޗެމްޕިއަންޝިޕް ބެލްޓެއް ހިފައިގެން އެ ދެމީހުން ހިނިތުންވެފައި ތިއްބަ އެވެ.
މީގެ އިތުރުން، އެމެރިކާގެ 250 ވަނަ މިނިވަން ދުވަހާ ގުޅުވައިގެން ނޭޝަނަލް މޯލްގައި ރައީސް ޑޮނަލްޑް ޓްރަމްޕް ބޭއްވި "ގްރޭޓް އެމެރިކަން ސްޓޭޓް ފެއާ" ގައި ވިލްކިންސް ލަވަކިޔުމުން ވެސް ގިނަ ބައެއްގެ ސަމާލުކަން ލިބުނެވެ. އެއީ އެ ހަރަކާތަކީ ވަކި ސިޔާސީ ފިކުރަކަށް ތާއީދުކުރާ ހަރަކާތެއްކަން އެނގުމުން، އެހެން ބައެއް ފަންނާނުން އެ އިވެންޓުގައި ބައިވެރިނުވާން ނިންމާފައިވަނިކޮށެވެ.
