އެމެރިކާގެ ސައުތު ކެރޮލައިނާގެ އުމުރުން 16 އަހަރުގެ ކުއްޖަކު ހިމެނޭހެން ތިން ކުއްޖަކު މަރުވި ހާދިސާތަކާ ހަވާލާދީ، ފުރާވަރު އުމުރުގެ ކުދިންނަށް އަމާޒުކޮށްގެން އެނާޖީ ޑްރިންކް އިޝްތިހާރު ކުރާ މިންވަރު މުރާޖައާ ކުރުމަށް ޑޮކްޓަރުންގެ ޖަމިއްޔާއަކުން ގޮވާލައިފި އެވެ.
ޑޮކްޓަރުން ބަޔާންކުރާ ގޮތުގައި، އެ ބޭފުޅުންގެ ކަންބޮޑުވުން އޮތީ ހަމައެކަނި މޮންސްޓާ އެނާޖީ ޑްރިންކްއާ މެދުގައެއް ނޫނެވެ. ނަމަވެސް ހުރިހާ ބާވަތެއްގެ އެނާޖީ ޑްރިންކްތަކާއި، އެފަދަ ބުއިންތަކާ އެކު ސްކޫލްތަކާއި ކުޅިވަރު އެސޯސިއޭޝަންތަކުން ހަދާ ޕާޓްނާޝިޕްތަކާ މެދު ވެސް ކަންބޮޑުވުން އެބަ އޮތެވެ.
މި މަސައްކަތުގައި ބައިވެރިވާ އައިޑަހޯގެ ކާޑިއޮލޮޖިސްޓެއް ކަމަށްވާ ޑރ. މެތިއު ނެލްސަން ވިދާޅުވީ، ކުދިންނަށް ނަމޫނާއެއް ކަމަށް ބަލާ ޔުނިވާސިޓީތަކާއި އެތުލީޓުން މިފަދަ އެނާޖީ ޑްރިންކްތައް އިޝްތިހާރު ކުރާތަން ފެނުމުން، އެއީ ކުޅިވަރު ކުޅޭއިރު ބޯން ރަނގަޅު "ސްޕޯޓްސް ޑްރިންކް" އެއް ކަމަށް ކުދިންނަށް ހީވާނެ އެވެ. ނަމަވެސް އެއީ އެއްގޮތަކަށް ވެސް ސްޕޯޓްސް ޑްރިންކެއް ނޫން ކަމަށް އޭނާ ފާހަގަކުރެއްވި އެވެ.
ކެފެއިން މާގިނައިން ބޭނުންކުރުމުން ކުޑަކުދިންނަށް އެކި ގޮތްގޮތުން ގެއްލުން ލިބިދާނެ އެވެ. އެމެރިކަން އެކަޑަމީ އޮފް ޕީޑިއަޓްރިކްސް ހިމެނޭހެން ސިއްހީ ދާއިރާގެ އެކި ޖަމިއްޔާތަކުން ބުނާ ގޮތުގައި، ކުޑަކުދިންނާއި ފުރާވަރުގެ ކުދިން އެނާޖީ ޑްރިންކް ބޭނުންކުރުމާ މުޅިން ދުރުވާން ޖެ ހެއެވެ. އެހެންނަމަވެސް، ގިނަ އަދަދެއްގެ ކުދިން އަދިވެސް މިފަދަ ބުއިންތައް ބޭނުންކުރެ އެވެ.
އިންޑިއާނާގެ ޕީޑިއަޓްރިޝަން އަދި އެކަޑަމީގެ ނިއުޓްރިޝަން ކޮމިޓީގެ މުގައްރިރު ޑރ. ތަމާރާ ހެނަން ވިދާޅުވި ގޮތުގައި، ކެފެއިން އާއި އެހެނިހެން "ސްޓިމިއުލަންޓް" ތަކުގެ ސަބަބުން ހިތުގެ ވިންދު އަވަސްވެ، ނާވަސް ސިސްޓަމްގެ މަސައްކަތްތައް އާދަޔާ ހިލާފަށް ބާރުވެ އެވެ. މީގެ ސަބަބުން ހަށިގަނޑުގެ ނިޒާމަށް ނުކަތާވަރުގެ ބާރެއް ކުރިމަތިވެދާނެ އެވެ.
ތަފާތު ބާވަތްތަކުގެ ކެފެއިން އެއްކޮށް ބޭނުންކުރުމަކީ ވެސް ނުރައްކާތެރި ކަމެކެވެ. ޑރ. ހެނަން ވިދާޅުވި ގޮތުގައި، ލޭގެ ޕްރެޝަރު މަތިވުން ފަދަ ސިއްހީ މައްސަލަތައް ކުރިން ހުންނަ ކުދިންނަށް މީގެ ނުރައްކާ މާ ބޮޑެވެ. ނަމަވެސް ސިއްހަތު ސަލާމަތުން ހުންނަ ކުދިން ވެސް މާގިނައިން ކެފެއިން ބޭނުންކޮށްފި ނަމަ ސީރިއަސް މައްސަލަތަކާ ކުރިމަތިލާން ޖެހިދާނެ އެވެ. މީގެ ތެރޭގައި ޒުވާން އެތުލީޓުން ވެސް ހިމެނެ އެވެ.
މީގެ އިތުރުން ވިސްނާލަން ޖެހޭ އަނެއް ކަމަކީ، ކުދިން ގިނަ ފަހަރަށް ތަފާތު ބާވަތްތަކުގެ ކެފެއިން ހިމެނޭ ބުއިންތައް އެއްފަހަރާ ބޭނުންކުރާ ކަމެވެ. 2017 ވަނަ އަހަރު މަރުވި ޑޭވިސް ކްރައިޕްގެ ހާދިސާގައި ވެސް ކަންވީ އެހެންނެވެ. މަރު ތަހުގީގުކުރާ އޮފިސަރު ބުނި ގޮތުގައި، ޑޭވިސްގެ ހިތުގެ އެއްވެސް މައްސަލައެއް ކުރިން ނެތެވެ. ނަމަވެސް އެ ދުވަހު އޭނާ ވަނީ "މައުންޓަން ޑިއު" އެއްގެ އިތުރުން މެކްޑޮނަލްޑްސް އިން ލާޓޭއެއް ބޮއެފަ އެވެ. އޭނާގެ ހިތުގެ ވިންދު ހުއްޓުނީ އެނާޖީ ޑްރިންކް ބުއި ފަހުންނެވެ.
ކެފެއިން މާގިނައިން ބޭނުންކުރުމާ ގުޅޭ ގޮތުން ކުދިން ހޭލުންތެރިކުރާނެ ގޮތްތަކެއް އެމެރިކާގެ ސީ.ޑީ.ސީ އިން ވަނީ ހިއްސާކޮށްފަ އެވެ. އެގޮތުން މާގިނައިން ކެފެއިން ބޭނުންކުރުމުގެ ނުރައްކަލާއި، އެނާޖީ ޑްރިންކާއި ސްޕޯޓްސް ޑްރިންކާ ހުރި ތަފާތު ކިޔަވައިދިނުމަށް މުދައްރިސުންނާއި ކޯޗުންނަށް ވަނީ އިރުޝާދު ދީފަ އެވެ. ސްޕޯޓްސް ޑްރިންކަކީ ކުޅިވަރު ކުޅެ ދާހިއްލުމުގެ ސަބަބުން ހަށިގަނޑުން މަދުވާ ފެނާއި އިލެކްޓްރޯލައިޓްސް އިއާދަކުރުމަށް ތައްޔާރުކޮށްފައިވާ ބުއިންތަކެކެވެ.
މީގެ އިތުރުން، މައިންބަފައިންނާއި ބޮޑެތި މީހުން ކުދިންގެ ކުރިމަތީގައި އެނާޖީ ޑްރިންކް ބޭނުން ނުކުރުމަކީ ވެސް ކުދިންނަށް ދެއްކޭނެ ރަނގަޅު ނަމޫނާއެކެވެ.
ޑޭވިސްގެ ބައްޕަ، ޝޯން ކްރައިޕް ބުނި ގޮތުގައި، އޭނާގެ ދަރިފުޅަށް ދިމާވި ފަދަ ހިތާމަވެރި ވާހަކަތައް ހިއްސާކުރުމަކީ އެނާޖީ ޑްރިންކަކީ ކުދިންނަށް ހުރި އެއްޗެއް ނޫންކަން އެ ކުދިންނަށް ވިސްނައިދިނުމަށް އެހީތެރިވެދޭނެ ކަމެކެވެ. "އަޅުގަނޑުމެން އެދެނީ މައިންބަފައިން އަޅުގަނޑުމެންގެ މި ހިތާމަވެރި ހާދިސާ ބޭނުންކޮށްގެން، އެމީހުންގެ އަމިއްލަ ދަރިންނަށް މިކަމުގެ ނުރައްކާ ވިސްނައިދިނުން،" އޭނާ ބުންޏެވެ.
މައުލޫމާތު: އޭޕީ
